އޭޑީކޭއިން ކޮވިޑް ޓެސްޓު ހަދައިދެނީ އެންމެ ހެޔޮ އަގުގައި: އައްފާލް
8 ޖޫން 2020 | ހޯމަ 18:55މެޝިން ލިބުނީ ގިނަ ދުވަސްތަކެއް ފަހުން ފާހަގަކުރެއްވި
އެންއީއޯސީގައި ބޭއްވި ޕްރެސްގައި އޭޑީކޭގެ އެމްޑީ އައްފާލް ބައިވެރިވެވަޑައިގަންނަވަނީ
އޭޑީކޭއިން ކޮވިޑް-19އަށް ޓެސްޓު ކުރެވޭ އަގަކީ ކުޑަ އަގެއް ކަމަށާއި، އެ އަގަކީ ރާއްޖެއިން ކޮވިޑަށް ޓެސްޓު ކުރެވޭ އެންމެ ހެޔޮ އަގު ކަމަށް އޭޑީކޭގެ މެނޭޖިން ޑިރެކްޓަރ އަހުމަދު އައްފާލް ވިދާޅުވެއްޖެއެވެ.
އޭޑީކޭއިން ކޮވިޑް-19 އަށް ޓެސްޓެއް ހަދައިދެނީ 675 ރުފިޔާ އަށެވެ. ޓެސްޓު ހަދާ އަގު ބޮޑު ކަމަށް ބުނެ ބައެއް ފަރާތްތަކުން ވަނީ ކަންބޮޑުވުންތައް ފާޅުކޮށްފައެވެ. އެކަމާއި ގުޅުވައި ހޯމަ ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރިމަތި ކުރިވި ސުވާލަށް ޖަވާބު ދެއްވަމުން އައްފާލް ވިދާޅުވީ, އޭޑީކޭއިން ޓެސްޓު ހަދައިދެނީ ރާއްޖޭގައި ކޮވިޑް-19 ޓެސްޓު ހަދައިދޭ އެންމެ ހެޔޮ އަގުގައި ކަމަށެވެ. އައްފާލް އެހެން ވިދާޅުވެފައިވާއިރު، ކޮވިޑުގެ ޓެސްޓު ހެދުމަށް ސަރުކާރުން ހުއްދަ ދީފައިވާ ހަމައެކަނި ޕްރައިވެޓް ބޮޑީ އަކީވެސް އޭޑީކޭއެވެ.
އައްފާލް ވިދާޅުވީ، ކޮވިޑް-19އަށް ޓެސްޓު ކުރުމަކީ ހަމައެކަނި ޕީސީއާރް މެޝިނެއް ގެނެސްގެން ވާނެ ކަމެއް ނޫން ކަމަށެވެ. އޭގެ ބަދަލުގައި ލެބޯޓަރީއެއްގެ ތެރެއިން ވަކި ލެބެއް ހަދައިގެން ޓެސްޓު ހެދޭނެ އިންތިޒާމް ހަމަޖެއްސުމަކީ ބުރަ މަސައްކަތެއްގެ ގޮތުގައި އޭނާ ސިފަކުރެއްވިއެވެ.
ޕީސީއާރް މެޝިނެއް ހޯދަން އޭޑީކޭއިން އޯޑަރު ކޮށްފައިވަނީ ފެބްރުއަރީ މަހުގައިއެވެ. ދުނިޔޭގައި ޕީސީއާރް މެޝިން ޑިމާންޑު ބޮޑުވުމުގެ ސަބަބުން އޭޑީކޭއިން އޯޑަރުކުރި މެޝިން ލިބުނީ ލަހުންކަން ފާހަގަކުރައްވަމުން އޭނާ ވިދާޅުވީ، ރާއްޖެއާ ހިސާބަށް މެޝިން އަންނަނީ އެތައް މަރުހަލާއެއް ކަޑައްތު ކުރުމަށް ފަހު ކަމަށެވެ.
އައްފާލު އިތުރަށް ވިދާޅުވީ، އޭޑީކޭއިން ކޮވިޑް-19ށް ޓެސްޓު ކޮށްދޭ އަގަކީ އަސްލު ޓެސްޓަކަށް ޖެހޭ އަގަށް ވުރެވެސް ދަށް އަގެއް ކަމަށެވެ.
ގިނަ ޓެސްޓުތަކެއް ހަދައިގެން ފައިދާތަކެއް ހޯދުމުގެ ބަދަލުގައި، އެ މެޝިނަކީ ކޮވިޑަށް ފަހު ވެސް ޓެސްޓުކުރަން ބޭނުންކުރެވޭނެ ފަދަ މެޝިނެއް ކަމަށް ހެދުމަކީ އަމާޒެއް ކަމަށް އޭޑީކޭއިން ބުންޏެވެ.
