ރާއްޖޭގައި ޗުއްޓީ ހޭދަކުރުމުގެ ފުރުސަތާއެކު، ފަތުރުވެރިކަމުގެ ދާއިރާ ހުޅުވުމަށް ކުރާ މަސައްކަތް މިރޭ ދުނިޔެއަށް ދައްކާލަނީ!

ދިވެހި ރާއްޖޭގައި ޗުއްޓީ ހޭދަކުރުމުގެ ފުރުސަތާއެކު، ފަތުރުވެރިކަމުގެ ދާއިރާ ހުޅުވުމަށް ކުރާ މަސައްކަތް މިރޭ ދުނިޔެއަށް ދައްކާލުމަށް ހާއްސަ އިވެންޓެއް ބޭއްވުމަށް މޯލްޑިވިސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ން ނިންމައިފިއެވެ.

މިކަމާއި ގުޅޭ ތަފްސީލް ހިއްސާކޮށް އެމްއެމްޕީއާރުސީން ނެރެފައިވާ ބަޔާނެއްގައި ބުނެފައިވަނީޯ، ކޮވިޑް19ގެ ސަބަބުން ފަތުރުވެރިކަމުގެ ސިނާޢަށް ހުއްޓިފައިވާ މި ދަނޑިވަޅުގައި ދިވެހިރާއްޖޭގެ ގުދުރަތީ ރީތިކަމުގެ ހަނދާންތައް ވާޗުއަލްކޮށް ދުނިޔެއަށް ދައްކާލުމަށްޓަކައި ގެނެސްދޭ ފޭސްބުކް ލައިވް އިވެންޓް "މޯލްޑިވިސް: ދި ސަން ވިލް ޝައިން އެގެއިން" ގެ ނަމުގައި ކުރިއަށް ގެންދާ ލައިވް އިވެންޓް ހޯމަ ދުވަހުގެ ރޭ އޮންނާނެ ކަމަށެވެ.

އެގޮތުން، ބެލުންތެރިންގެ ޝައުގުވެރިކަން ދެމެހެއްޓުމުގެ ގޮތުން ރާއްޖޭގައި ޗުއްޓީ ހޭދަ ކޮށްލުމުގެ ފުރުސަތު ދިނުމުގެ ގޮތުން އިވެންޓުގެތެރޭގައި ކުއިޒްއެއް ކުރިއަށް ގެންދާނެކަމަށާއި ރިސޯޓުތަކާއި ގެސްޓްހައުސް ހިމެނޭ ގޮތަށް 30 ފަރާތަކުން ގުރުއަތުން ހޮވޭ ފަރާތްތަކަށް ދިވެހިރާއްޖޭގައި ޗުއްޓީ ހޭދަކުރުމުގެ ފުރުސަތު ދިނުމަށް ހަމަޖެހިފައިވާކަމަށް އެމްއެމްޕީއާރުސީން ބުނެއެވެ.

މި އިވެންޓުގައި ދުނިޔޭގެ އެކި ކަންކޮޅުތަކުގައި ތިބި ރާއްޖެއަށް ހެޔޮއެދޭ ފަރާތްތަކުން ދިވެހިރާއްޖެއަށް އޮތް ލޯބި ދައްކުވައިދިނުމުގެ ގޮތުން ރާއްޖޭގެ ފަތުރުވެރިކަމުގެ ސިނާޢަތުގެ ފަރާތްތަކުން ބައިވެރިވެ، ރާއްޖެއާ ގުޅޭ އުންމީދުން ފުރިގެންވާ މެސެޖުތައް ގެނެސްދިނުމުގެ އިތުރުން އަލުން ފަތުރުވެރިންނަށް މަރުހަބާކިޔުމަށް މުޅި ރާއްޖެ ވަމުން އަންނަ ތައްޔާރީތައް ހާމަކުރެވިގެން ދާނެކަމަށް އެމްއެމްޕީއާރުސީގެ ބަޔާނުގައި ވަނީ ބުނެފައެވެ.

އިވެންޓު އިތުރަށް ފުރިހަމަ ކުރުމުގެ ގޮތުން މިއުޒީޝަނުންނާއި އާޓިސްޓުންނާއި މިފަދަ ފަރާތްތަކުން ދިވެހިރާއްޖެއާ ގުޅޭ އުންމީދުން ފުރިގެންވާ މެސެޖުތައް ގެނެސްދިނުމަށް ވަނީ ހަމަޖެހިފައިވާކަމަށް އެމްއެމްޕީއާރުސީން ބުނެއެވެ.

މިރޭ 8:00ން 00؛00ށް ކުރިއަށްދާ މި ލައިވް އިވެންޓް ކުރިއަށް ގެންދާނީ މިނިސްޓްރީ އޮފް ޓޫރިޒަމް އާއި ޕަބްލިކް ސާވިސް މީޑިއާ، މޮންދު ޕްރޮޑަކްޝަން އަދި އޯރކާ މީޑިއާ ގްރޫޕް ގުޅިގެންނެވެ.