ފުލުހުންނާ ޕީޖީ އޮފީހުގެ ގުޅުން އިތުރަށް ބަދަހިވެ، ދައުވާކުރަން ނަގާ މުއްދަތު ދެގުނަ ދަށްކޮށްފި
8 ޖޫން 2020 | ހޯމަ 14:41މިދިޔަ އަހަރު ދައުވާ އުފުލުމަށް އެވްރެޖްކޮށް 87.70 ދުވަސް ނަގާ
ޕީޖީ ހުސައިން ޝަމީމް- ޕީޖީ ވިދާޅުވީ، މައްސަލަތަކުގައި ދައުވާ ކުރަން ނަގާ މުއްދަތު ކުޑަކުރެވުނީ ފުލުހުންގެވެސް ބުރަ މަސައްކަތާއެކުގައި ކަމަށް
ފުލުހުންނާ ޕީޖީ އޮފީހުގެ ގުޅުން އިތުރަށް ބަދަހިވެ، މައްސަލަތަކުގައި ދައުވާކުރަން ނަގާ މުއްދަތު ދެގުނައަށް ދަށް ކުރެވިފައިވާކަމަށް ޕްރޮސެކިއުޓަރ ޖެނެރަލް އޮފީހުން ބުނެފިއެވެ.
އެކަމާ ގުޅޭގޮތުން ޕީޖީ ހުސައިން ޝަމީމް ކުރެއްވި ޓްވީޓެއްގައި ވިދާޅުވީ، ފުލުހުންގެ ތަހުޤީޤީ އޮފިސަރުންނާއި، ޕީޖީ އޮފީހުގެ މުވައްޒަފުންގެ މިންނެއް މަސައްކަތުން މައްސަލަތަކުގައި ދައުވާ ކުރަން އެވްރެޖްކޮށް ނަގާ މުއްދަތު ދަށް ކުރެވިފައިވާ ކަމަށެވެ. އެގޮތުން 2019 ވަނަ އަހަރު މައްސަލަތަކުގައި ތަހުޤީޤު ނިންމި ދައުވާ އުފުލުމަށް އެވްރެޖްކޮށް 87.70 ދުވަސް ނަގާކަން ޕީޖީ ފާހަގަ ކުރެއްވިއެވެ.
އެހެން ނަމަވެސް، މިއަހަރުގެ މެއި މަހުގެ ނިޔަލަށް އެ އަދަދު 47.45ށް ދަށް ކުރެވިފައިވާކަން ޕީޖީ ފާހަގަ ކުރެއްވިއެވެ. އަދި މިއީ ޕީޖީ އޮފީހަށް ވަޑައިގެން ފުރަތަމަ 6 މަހުގެ ތެރޭގައި ލިބުނު މުހިއްމު ކާމިޔާބީއެއް ގޮތުގައި ޕީޖީ ޝަމީމް ވަނީ ސިފަ ކުރައްވާފައެވެ.
ޕީޖީ ވިދާޅުވީ، މިދިޔަ އަހަރުގެ ވަކިވަކި ދުވަސްތަކުގެ ނިސްބަތުން ބަލާއިރު، އެންމެ ގިނައިން ދައުވާ އުފުލާފައިވަނީ ހަފްތާގެ ބުރާސްފަތި ދުވަހު ކަމަށެވެ. އެގޮތުން މުވައްޒަފުންނަށްވެސް ވަޒީފާގެ މަސައްކަތުގެ ބެލެންސް އޮންނަން ޖެހޭނެކަން ފާހަގަ ކުރައްވައި ޕީޖީ ވިދާޅުވީ، މިއަހަރު އެކަމަށް ޚާއްސަ ސަމާލުކަމެއް ދީ، ހަފްތާގެ ދުވަސްތަކަށް ބަހާލައިގެން މަސައްކަތްތައްވެސް ބެލެންސް ކުރެވިފައިވާ ކަމަށެވެ.
ޕީޖީ އެހެން ވިދާޅުވެފައިވާއިރު، 2019 ވަނަ އަހަރު ދައުވާ އުފުލާފައިވާ މައްސަލަތަކުގެ ތެރެއިން 47.56 އިންސައްތަ މައްސަލަތަކުގައި ދައުވާ އުފުލާފައިވަނީ ބުރާސްފަތި ދުވަހުއެވެ. އެހެން ނަމަވެސް 2020 ވަނަ އަހަރު ހަފްތާގެ ދުވަސްތަކަށް މަސައްކަތްތައް ބެލެންސް ކުރެވި، އެ އަދަދު ވަނީ 25.76 އިންސައްތައަށް ތިރިކުރެވިފައެވެ.
އެކަމާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން ޕީޖީ އޮފީހުގެ މީޑިއާ އޮފިޝަލު ވިދާޅުވީ، މައްސަލަތަކުގައި ދައުވާ އުފުލުމަށް ނަގާ މުއްދަތު ދަށް ކުރެވިފައި ވަނީ ފުލުހުންނާއި، ތަހުޤީޤީ އިދާރާތަކާއި އޮންނަ ގުޅުން އިތުރަށް ބަދަހި ކުރެވި، މަސައްކަތްތައް އަވަސް ކުރުމަށް މަޝްވަރާތައް ކުރެވޭތީ ކަމަށެވެ. އެގޮތުން ކުރީގައި ނަމަ ޑިއުޓީ ޕްރޮސެކިއުޝަނަށް ގެނެވޭ މައްސަލަތައް ދައުވާ އުފުލައި ކޯޓަށް ހުށައެޅެނީ މުއްދަތު ހަމަވާ ދުވަހު ކަން ފާހަގަ ކުރައްވައި އޭނާ ވިދާޅުވީ، މިހާރު ފުލުހުންނާ ގުޅިގެން އެ މަސައްކަތްތައް އަވަސް ކުރެވިފައިވާ ކަމަށެވެ. އަދި ކުރިއަށް އޮތް ތަނުގައިވެސް ލަނޑުދަނޑިތަކެއް ޤާއިމު ކުރެވި، މަސައްކަތްތައް މިހާރަށްވުރެ އަވަސް ކުރުމަށް ކަމާބެހޭ އިދާރާތަކާ ގުޅިގެން މަސައްކަތްތައް ކުރެވެމުންދާކަން އޭނާ ފާހަގަ ކުރެއްވިއެވެ.
