ކޮވިޑް-19 ރޯގާ މާލެ ޞަރަޙައްދުގައި ފެތުރުން ކޮންޓްރޯލް ކުރުމަށް، މާލެ ޞަރަޙައްދު ފުރަބަންދުކޮށްފައި މި ދަނޑިވަޅުގައި، ކުށްކުރުން މަދުކަމަށް ކޮމިޝަނަރަ އޮފް ޕޮލިސް (ސީޕީ) މުޙައްމަދު ޙަމީދު ވިދާޅުވެއްޖެ އެވެ.
މާލެ ޞަރަޙައްދު ފުރަބަންދުގައި އޮތް 45 ދުވަހުގެ ތެރޭގައި، ކުށްކުރުން މަދުކަން ފާހަގަ ކުރައްވައި، ސީޕީ ހަމީދު ހޯމަ ދުވަހު ކުރެއްވި ޓްވީޓެއްގައި ވިދާޅުވެފައި ވަނީ، ކޮވިޑް-19 ފެތުރުނަ ނުދިނުމަށް އެޅި ފިޔަވަޅުތަކާއި، އަދި ފުލުހުންގެ ޤާނޫނީ ޒިންމާ އަދާކުރުމުގައި ކަންކަން މެނޭޖުކުރުމާއި، ޢަމަލުކޮށްފައިވާ ގޮތާމެދު ހިތްހަމަ ޖެހިވަޑައިގަންނަވާ ކަމަށެވެ. އަދި ހުރިހާ ފުލުހުންނަށް ސީޕީ ހަމީދު ވަނީ ޝުކުރު އަދާ ކުރައްވާފަ އެވެ.
ސީޕީ ހަމީދު، ކުރެއްވި ޓްވީޓުގައި ހާމަކުރައްވާފައިވާ ތަފާސް ހިސާބުތައް ދައްކާގޮތުން، ފުރަބަންދު ކުރި މުއްދަތުގެ ތެރެއިން، އޭޕްރީލް މަހުގެ ތެރޭގައި 6،058 މީހަކު ހުއްޓުވާ ސުވާލުކޮށްފައި ވާއިރު، މެއި މަހު 45،504 މީހަކު ހުއްޓުވާ ސުވާލުކޮށްފައި ވެއެވެ.
މީގެއިތުރުން، ފުރަބަންދުގެ މުއްދަތުގައި އޭޕްރީލް މަހުގެ ތެރޭގައި، ޞަރަޙައްދުތައް ބަލާ ފާސް ކުރުމުގައި، 35،688 ފަހަރު ތަންތަން ފާސްކޮށްފައި ވާއިރު، މެއި މަހުގެ ތެރޭގައި 86،118 ފަހަރު ފާސް ކުރަންޖެހޭ ޞަރަޙައްދުތައް ފުލުހުން ޗެކް ކޮށްފައި ވެއެވެ.
ފުރަބަންދުގެ މުއްދަތުގައި އޭޕްރީލް މަހުގެ ތެރޭގައި 219 ޕަރމިޓެއް 'ޗެކް' ކުރި ކަމަށާއި، މެއި މަހުގެ ތެރޭގައި 20،508 ޕަރމިޓެއް ޗެކް ކޮށްފައިވާ ކަމަށްވެސް ފުލުހުން ބުނެއެވެ.
ކޮވިޑް-19 ރޯގާ މާލެ ޞަރަޙައްދުގައި ފެތުރުން ކޮންޓްރޯލް ކުރުމަށް ނޭޝަނަލް އިމަރޖެންސީ އޮޕަރޭޝަން ސެންޓަރުގައާއި، ޕަރމިޓް ދޫކުރުމާއި، މާލެ ޞަރަޙައްދު ބަލާ މޮނީޓަރ ކުރުމުގަައި ވެސް ފުލުހުންގެ ދައުރު ވަރަށް ބޮޑަށް ފެނިގެން ދެއެވެ.
މިމަހުގެ 5 ވަނަ ދުވަހުން ފެށިގެން، ފުރަބަންދުގެ ޙާލަތުގައި އެކިއެކި ބޭނުންތަކަށް ބޭރަށް ދިއުމަށާއި، ޚިދުމަތްތައް ދިނުމަށް ދޫކުރާ ހުރިހާ ހުއްދައެއް ދޫކުރަމުން ދަނީ ފުލުހުންގެ މުއައްސަސާއިން ނެވެ. އޭގެ ކުރިން ފުލުހުން ދޫކުރަމުން ދިޔައީ، ޢާންމު ރައްޔިތުންގެ ޒަރޫރީ ބޭނުންތަކަށް، ފިހާރަތަކަށް ދިއުމުގެ ހުއްދަ އެކަންޏެވެ.
އޮފީސްތަކާއި ވިޔަފާރީގެ އެކި ބޭނުންތަކަށް ތަންތަން ހުޅުވުމުގެ ހުއްދައަށް މީގެކުރިން އިކޮނޮމިކް މިނިސްޓްރީގައި އެދުނު ނަމަވެސް މިދިޔަ ހުކުރު ދުވަހުން ފެށިގެން ހުއްދައަށް އެދެންޖެހޭނީ ފުލުހުންގެ ޕޯޓަލް މެދުވެރިކޮށެވެ.
