ޖަރުމަންގެ ހުނަރުވެރި ފޯވާޑް ޓިމޯ ވާނާގެ ސޮއި ޗެލްސީން ހޯދި ކަމަށް ދެކޭވޭ ވާހަކަތައް އާރުބީ ލެއިޕްޒީގުގެ ޗީފް އެގްޒެކުޓިވް އޮލިވާ މިންޒްލަފް ދޮގުކޮށްފި އެވެ.

ލެއިޕްޒީގާއެކު ވާނާ ހަދާފައިވާ އެއްބަސްވުމުގައިވާ ގޮތުން މިމަހު 15 ވަނަ ދުވަހުގެ ކުރިން 54 މިލިއަން ޕައުންޑް ޓްރާންސްފާ ފީ އެއް ދައްކައިގެން އޭނާ ގަތުމުގެ އިޚުތިޔާރު ލިބެ އެވެ.

މީގެ ކުރިން ބީބީސީން ވަނީ ވާނާގެ ސޮއި ޗެލްސީން ހޯދާފައިވާ ކަމަށާއި، އޭނާ ލެއިޕްޒީގާއެކު ހަދާފައިވާ އެއްބަސްވުން އުވާލަން ދައްކަން ޖެހޭ 54 މިލިއަން ޕައުންޑް ޗެލްސީން ދައްކަން އެއްބަސްވި ކަމަށް ވެސް ރިޕޯޓުކޮށްފައެވެ.

އެކަމަކު ލެއިޕްޒީގުގެ ޗީފް އެގްޒެކުޓިވް އޮލިވާ މިންޒްލަފް ވިދާޅުވީ ޗެލްސީން މިހާތަނަށް ވާނާ ހޯދުމަށް އެއްވެސް ހުށަހެޅުމެއް ހުށަހަޅާފައި ނުވާ ކަމަށެވެ. އަދި ވާނާ އަކީ ލެއިޕްޒީގުގެ ކުޅުންތެރިއެއް ކަމަށާއި، އޭނާގެ އެއްބަސްވުން އިތުރު ކުރުމުގެ މަސައްކަތް އެ ކްލަބުން މިހާރު ކުރަމުންދާ ކަމަށް ވެސް ވިދާޅުވި އެވެ.

ވާނާގެ ސޮއި ޗެލްސީން ހޯދި ކަމަށް މީގެ ކުރިން މީޑިއާތަކުން ރިޕޯޓުކުރިއިރު، އޭނާ ހޯދުމަށް މީގެ ކުރިން އިންޓަ މިލާނާއި، ބާސެލޯނާ އާއި، މެންޗެސްޓާ ޔުނައިޓެޑް އަދި ލިވަޕޫލުން ވެސް ވަނީ މަސައްކަތްކޮށްފަ އެވެ. މީގެ ތެރެއިން ވާނާ އަށް އެންމެ ބޮޑަށް ފާރަލީ ލިވަޕޫލުންނެވެ.

އެގޮތުން މީގެ ކުރިން ލިވަޕޫލްގެ ކޯޗު ޔާގެން ކްލޮޕް އާއެކު މަސައްކަތްކުރަން ބޭނުންވާ ކަމަށް ވާނާ ބުނި ނަމަވެސް، ލިވަޕޫލުން ވަނީ ކޮރޯނާވައިރަސް (ކޮވިޑް-19) ގެ މި ހާލަތުގައި އެ ވަރުގެ އަގެއް އިތުރު ފޯވާޑަކަށް ޚަރަދުކުރަން ބޭނުންނުވާ ކަމަށް ބުނެ، އަގު ކުޑަކުރަން ހުށަހަޅާފަ އެވެ. އެކަމަކު ލެއިޕްޒީގުން އެކަމަށް އެއްބަސްވެފައެއް ނުވެއެވެ.