މަޖިލީހުގެ ރައީސް ކޮމިޓީތަކުގެ މުޤައްރިރުންނާ ބައްދަލު ކުރައްވައިިފި
މަޝްވަރާ ކުރައްވާފައިވަނީ ކޮމެޓީތަކުގެ މަސައްކަތްތަކާގުޅޭ ގޮތުން
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މަޖިލީހުގެ ކޮމިޓީތަކުގެ މުޤައްރިރުންނާއެކު ބޭއްވެވި ބައްދަލު ކުރެއްވުުމުގެ ތެރެއިން
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މަޖިލީހުގެ ކޮމިޓީތަކުގެ މުޤައްރިރުންނާ ބައްދަލު ކުރައްވައިިފި އެވެ.
މިބައްދަލު ކުރެއްވުން އޮތީ މަޖިލީހުގެ އިދާރާގަ އެވެ. މި ބައްދަލުވުމުގައި މަޝްވަރާ ކުރައްވާފައިވަނީ ކޮމެޓީތަކުގެ މަސައްކަތްތަކާގުޅޭ ގޮތުން ކަމަށް އެނގިފައި ވެއެވެ.
މިހާރު ހިނގަމުންދާ 19 ވަނަ މަޖިލީހުގެ ރައީސް މީގެކުރިންވެސް ކޮމެޓީތަކުގެ މުޤައްރިރުންނާ ބައްދަލުވުންތައް ބާއްވައި ކޮމެޓީތަކުގެ މަސައްކަތްތަކާގުޅޭގޮތުން މަޝްވަރާކުރައްވާފައިވެއެވެ. އަދި މަޖިލީހުގެ ޖަލްސާތައް ބޭވުމާގުޅޭގޮތުންވެސް ޕާލަމެންޓްރީ ގްރޫޕްތަކުގެ ލީޑަރުންނާވެސް ބައްދަލުކުރައްވާ މަޝްވަރާތައް ކުރައްވަމުން ގެންދަވައެވެ.
އެގޮތުން، ކޮވިޑް-19 ރޯގާ ރާއްޖެގައި ފެތުރުމާގުޅިގެން، މަޖިލީހުގެ މަސައްކަތް ކުރިއަށް ގެންދާނެގޮތާއި ބެހޭގޮތުން ވެސް މަޖިލީހުގެ ރައީސް ވަނީ، މަޖިލީހުގެ ކޮމިޓީތަކުގެ މުގައްރިރުންނާއި މަޖިލީހުގައި ހިމެނޭ ސިޔާސީ ޕާޓީތަކުގެ ލީޑަރުންނާ މަޝްވަރާ ކުރެއްވުމަށްފަހު، މަޖިލީހުގެ މަސައްކަތްތައް މެމްބަރުން ގޭގައި ތިއްބަވައިގެން އިންޓަރނެޓް މެދުވެރިކޮށް، ކުރިއަށް ގެންދަން ނިންމާފައިވެއެވެ.
އެނިންމުމާއެކު، މާރޗު މަހުގެ 31 ވަނަ ދުވަހުން ފެށިގެން މަޖިލީހުގެ ޖަލްސާތަކާއި ކޮމެޓީ ބައްދަލުވުންތައް ކުރިއަށް ގެންގޮސްފައިވަނީ، މައިކްރޯސޮފްޓް ޓީމްސް ބޭނުންކޮށް، ވެބް ކޮންފަރެންސް މެދުވެރިކޮށެވެ.
ވެބް ކޮންފަރެންސް މެދުވެރިކޮށް، ބާއްވައިމުން އައި ޖަލްސާތައް، މެދުކަނޑާލައި، މަޖިލީހުގެ އިދާރާގައި ޖަލްސާތައް ބާއްވާފައިވަނީ، ކޮވިޑް-19 ރޯގާއާ ގުޅިގެން އޭޕްރީލް 4 ވަނަ ދުވަހު ބޭއްވުމަށް ނިންމި ލޯކަލް ކައުންސިލްތަކުގެ އިންތިހާބު ފަސްކުރަން ޖެހުމާގުޅިގެން، މިހާރު ހިނގަމުންދާ ލޯކަލް ކައުންސިލްތަކުގެ ދައުރު ދިގުދައްމާލަން ގާނޫނުއަސާސީއަށް ހުށަހެޅުނު އިސްލާހު ގެނައުމުގެ ބިލްގެ މަސައްކަތް ކުރެއްވުމަށެވެ.
ގާނޫނުއަސާސީއަށް އިސްލާހު ގެނައުމުގެ ބިލްގެ މަސައްކަތް މަޖިލީހުން ނިންމާފައިވާތީ، އަދި އޭގެފަހުން މަޖިލީހުގެ ޖަލްސާއެއް ބާއްވާފައި ނުވާތީ، ދެން މަޖިލީހުގެ ޖަލްސާތައް ކުރިއަށް ގެންދާނީ މަޖިލީހުގެ އިދާރާގަ ކަމެއް ނުވަތަ ވެބް ކޮންފަރެންސް މެދުވެރިކޮށް ކަމެއް މަޖިލީހުގެ އިދާރާއިން ހާމަކޮށްފައެއް ނުވެއެވެ.
