ނައިފަރުގައި ޕީޕީއެމް ސަޕޯޓަރުން ކުރިއަށްގެންދިޔަ މުޒާހަރާ ފުލުހުން ހުއްޓުވައިފި
ބުދަ ދުވަހުގެ ހަވީރު 4:45ށް ރަށުގައި އިހުތިޖާޖެއް ކުރުމަށް ނުކުތުމަށް ގޮވާލި
ޅ ނައިފަރު ރައްޔިތުން ކުރި މުޒާހަރާގެ ތެރެއިން- އެއްވި މީހުން ވަނީ ރައީސް ޔާމީން ދޫކޮށްލުމަށްވެސް ގޮވާލާފައި
ޅ އަތޮޅު ނައިފަރުގައި އިދިކޮޅު ކޯލިޝަންގެ ސަޕޯޓަރުން ކުރިއަށް ގެންދިޔަ މުޒާހަރާ ފުލުހުން ހުއްޓުވައިފި އެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ނައިފަރު ކައުންސިލުގެ ރައީސް މުޙައްމަދު ކާރިމް ވިދާޅުވީ، އިދިކޮޅު ކޯލިޝަންގެ ސަޕޯޓަރުން ބުދަ ދުވަހުގެ ހަވީރު 4:45ށް ރަށުގައި އިހުތިޖާޖެއް ކުރުމަށް ނުކުތުމަށް ގޮވާލާފައި ވާއިރު، އިހުތިޖާޖަށް ގާތްގަނޑަކަށް 100އެއްހާ މީހުން ނުކުމެފައިވާ ކަމަށެވެ.
އެގޮތުން ކޮވިޑް-19 އާ ގުޅިގެން ރައްކާތެރި ކަމުގެ ފިޔަވަޅެއްގެ ގޮތުން މި ދުވަސްވަރު ގިނަ މީހުން އެއްވެ އުޅުން ހެލްތު ޕްރޮޓެކްޝަން އޭޖެންސީ (އެޗްޕީއޭ)އިންނާއި، ކަމާބެހޭ ޞިއްޙީ މާހިރުންވެސް މަނާ ކުރަމުންދާ މިފަދަ ދަނޑިވަޅެއްގައި އިހުތިޖާޖު ކުރަން ނުކުތުމުން އެކަމުގެ ކަންބޮޑުވުން ރަށުން ވާހަކަދެއްކި ބައެއް ފަރާތްތަކުން ވަނީ ހިއްސާކޮށްފަ އެވެ.
ކައުންސިލުން ބުނީ، ގަޑިއެއްހާއިރު ފަހުން ފުލުހުން އެ އެއްވުން ހުއްޓުވާފައިވާ ކަމަށެވެ. އަދި އެއްވުމުގެ ތެރެއިން އެއްވެސް ކަހަލަ ހަމަނުޖެހުމެއް ހިނގާފައި ނުވާކަމަށް ކައުންސިލުން މައުލޫމާތު ދެއެވެ.
މައުލޫމާތު ލިބިފައިވާ ގޮތުގައި ނައިފަރު ރައްޔިތުން މުޒާހަރާ ކޮށްފައި ވަނީ ނައިފަރު ދާއިރާގެ މެންބަރު އަހުމަދު ޝިޔާމްއަށް މަޖިލިސް ޖަލްސާގައި އަނިޔާ ލިބިފައިވާކަމަށް ބުނެ، އެކަމަށް އިންސާފު ހޯދައިދިނުމަށް އެދިއެވެ. އަދި މަނީ ލޯންޑަރިންގެ ދައުވާގެ ކުށް ސާބިތުވެ ޖަލު ޙުކުމް ތަންފީޒު ކުރައްވަމުން ގެންދަވާ ކުރީގެ ރައީސް ޢަބްދުﷲ ޔާމީން ދޫކޮށްލެއްވުމަށް ވެސް މުޒާހަރާގެ ބައިވެރިން ވަނީ ގޮވާލާފަ އެވެ.
