ސީއެސްސީ އިން އާމިރާ ވަކިކުރުމަށް، ތަޅުމަށް ނަން ފޮނުވުމަށް ކޮމެޓީން ނިންމައިިފި
3 ޖޫން 2020 | ބުދަ 07:11މި ހުށަހެޅުއްވުން ފާސްވީ ކޮމެޓީގެ 6 މެމްބަރުންގެ ވޯޓާއި އެކު
ސިވިލް ސަރވިސް ކޮމިޝަންގެ މެމްބަރު ފާތިމަތު އާމިރާ
ސިވިލް ސަރވިސް ކޮމިޝަން (ސީއެސްސީ)ގެ މެމްބަރު ފާތިމަތު އާމިރާ މަގާމުން ވަކިކުރުމަށް ރައްޔިތުންގެ މަޖިލީހުގެ ތަޅުމަށް ނަން ފޮނުވުމަށް ރައްޔިތުންގެ މަޖިލީހުގެ މިނިވަން މުއަައްސަސާތަކުގެ ކޮމިޓީން ނިންމައިފިއެވެ.
ކޮމެޓީން އަންގާރަ ދުވަހުގެރޭ ބޭއްވި ބައްދަލުވުމުގައި ވަނީ ސިީއެސްސީގެ މެމްބަރު އާމިރާގެ ނަން ތަޅުމަށް ފޮނުވުމަށް ނިންމާ، އެ ކޮމިޝަންގެ 5 މެމްބަރުން އެކީ ވަކި ކުރުމަށް ނިންމާފައެވެ.
ވެލިދޫ ދާއިރާގެ މެމްބަރު އަބްދުﷲ ޝަފީގު ހުށަހެޅުއްވި މި ހުށަހެޅުއްވުން ފާސްވީ ކޮމެޓީގެ 6 މެމްބަރުންގެ ވޯޓާއި އެކުއެވެ. ނުފެންނަ ކަމަށް 5 މެމްބަރުން ވޯޓުދެއްވާފައިވެއެވެ.
މީގެކުރިން މަގާމުގެ ޒިންމާ އަދާ ނުކުރެވޭކަމަށް ގަބޫލު ކުރެވޭތީ ސިވިލް ސަރވިސް ކޮމިޝަންގެ 4 މެންބަރަކު ވަކި ކުރުމަށް، ގަމު ދާއިރާގެ މެންބަރު މުހައްމަދު ވިސާމް ހިމެނިވަޑައިގަންނަވާ މިނިވަން މުއައްސަސާތަކުގެ ކޮމެޓީން މާރޗު މަހުގެ 1 ވަނަ ދުވަހު ފާސްކުރި އެވެ. ކޮމިޓީން މަޤާމުން ވަކިކުރުމަށް ނިންމާފައި ވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، މެންބަރު އިބްރާހިމް ޝަހީގުގެ އިތުރުން އަލްއުސްތާޛު ޒަކަރިއްޔާ ޙުސައިނެވެ. އެހެންނަމަވެސް، ކޮމިޝަންގެ 4 މެންބަރުން ވަކިކުރުމުގެ މައްސަލަ ކޮމިޓީން ނިންމިގޮތުގެ ރިޕޯޓު ވަނީ ކޮމިޓީއަށް އަނބުރާ ފޮނުވާލާފައެވެ.
ސީއެސްސީގެ މެމްބަރުން ވަކި ކުރުމުގެ މައްސަލާގައި ގޮތެއް ނުނިންމި ދިގުލައިގެންދާކަން ފާހަގަކޮށް ކޮމެޓީގެ މެމްބަރުން ވަނީ އެ މައްސަލައިގެ ރިޕޯޓު ވީހާވެސް އަވަހަކަށް ނިންމައިދިނުމަށް އެދިވަޑައިގެންފައެވެ.
