ސުޕްރީމް ކޯޓުގެ ޝަރީޢަތެއް ފުރަތަމަ ފަހަރަށް ވީޑިއޯ ކޮންފަރެންސްކޮށް!

ސުޕްރީމް ކޯޓުގެ ޝަރީޢަތެއް ފުރަތަމަ ފަހަރަށް ވީޑިއޯ ކޮންފަރެންސް މެދުވެރިކޮށް ބާއްވައިފި އެވެ.

އެކަމާ ގުޅޭގޮތުން ސުޕްރީމް ކޯޓުން ސުޕްރީމް ކޯޓުގެ "ޝަރީޢަތްތައް ދުރުން ކުރިއަށްގެންދާނެ ގޮތުގެ ޤަވާއިދު"ގެ ދަށުން ހޯމަ ދުވަހު ބޭއްވި މި އަޑުއެހުން ފަށާފައި ވަނީ ހޯމަ ދުވަހުގެ މެންދުރު 13:00 ގައި ކަމަށެވެ. އެގޮތުން މި ޤަޟިއްޔާއަކީ ޕްރޮސިކިއުޓަރ ޖެނެރަލްގެ އޮފީހުގެ މައްޗަށް ދަޢުވާކޮށް، ބ. ތުޅާދޫ ގުލްބަހާރުގެ ޢަދުނާން ޙުސައިންގެ ފަރާތުން ހުށަހަޅާފައިވާ މައްސަލައެއް ކަމަށް ސުޕްރީމް ކޯޓުން ބުނެއެވެ.

އެގޮތުން މި ޝަރީޢަތުގެ މަޖިލީހުގައި ފަނޑިޔާރުންނާއި، ދަޢުވާކުރާ ފަރާތާއި އެ ފަރާތުގެ ވަކީލު އަދި ދަޢުވާ ލިބޭ ފަރާތާއި ކޯޓުގެ މުވައްޒަފުން ބައިވެރިވެ ވަޑައިގެންނެވީ އެ ފަރާތެއް ޤާއިމުވެ ހުރި ތަނުން ވީޑިއޯ ކޮންފަރެންސް މެދުވެރިކޮށް ކަމަށް ކޯޓުން މައުލޫމާތު ދެއެވެ.

ސުޕްރީމް ކޯޓުން ބުނީ، މި މައްސަލައިގެ ބެންޗުގައި ހިމެނި ވަޑައިގެންނެވީ ސުޕްރީމް ކޯޓުގެ ފަނޑިޔާރު އަލްއުސްތާޛު މަޙާޒް ޢަލީ ޒާހިރު އާއި، ފަނޑިޔާރު ޑރ. އަޒްމިރާލްދާ ޒާހިރު އާއި، ފަނޑިޔާރު ޢާއިޝާ ޝުޖޫން މުޙައްމަދު ކަމަށެވެ. އަދި މައްސަލައިގެ ރިޔާސަތު ބެލެހެއްޓެވީ ފަނޑިޔާރު މަޙާޒް ޢަލީ ޒާހިރު ކަމަށް ސުޕްރީމް ކޯޓުން މައުލޫމާތުދެ އެވެ.

އޭގެ އިތުރުން، ސުޕްރީމް ކޯޓުގެ ޝަރީޢަތްތައް ދުރުން ކުރިއަށްގެންދާނެ ގޮތުގެ ޤަވާއިދުގެ ދަށުން ބާއްވާ ޝަރީޢަތްތައް ލައިވްކުރުމަށް ހަމަޖެހިފައި ވީނަމަވެސް، ހޯމަ ދުވަހު ކުރިއަށް ގެންދިޔަ ޝަރީޢަތުގެ މަޖިލީހަކީ ޤާނޫނުއަސާސީގެ 42 ވަނަ މާއްދާގެ ދަށުން ޢާންމުކޮށް ހުޅުވައިނުލައި ކުރިއަށް ގެންދަންޖެހޭ ބާވަތުގެ މައްސަލައަކަށް ވާތީ ލައިވް ކުރެވިފައި ނުވާކަމަށް ކޯޓުން މައުލޫމާތުދެ އެވެ.