މާލެސިޓީގައި ދިރިއުޅޭ މީހުން ބޭރަށް ނުކުންނަ ނަމަ، އައިޑީ ކާޑް ހިފައިގެން ނުކުތުމަށް އިލްތިމާސްކޮށްފި
އެކްޓިވް ސާންޕަލިންގެ މަސައްކަތް ކުރިއަށްދޭ
ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް، ގައިދުރުކަން ދެމެހެއްޓުމަށް ތަކުރާރުކޮށް އިލްތިމާސް ކުރައްވާފައިވޭ
ކޮވިޑް-19ގެ މި ހާލަތުގައި މާލެ ސިޓީގައި ދިރިއުޅޭ މީހުން ބޭރަށް ނުކުންނަ ނަމަ، އައިޑީކާޑް ހިފައިގެން ނުކުތުމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް ވިދާޅުވެއްޖެ އެވެ.
ހޮނިހިރު ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ މިދުވަސްކޮޅު އެކްޓިވް ސާންޕަލިންގެ މަސައްކަތް ކުރިއަށް ގެންދާ ކަމަށާއި، ގެއިން ބޭރަށް ނުކުންނައިރު އައިޑީ ކާޑު ހިފައިގެން ނުކުތުމަށް ހަނދާން ބެހެއްޓުން މުހިންމު ކަމަށެވެ.
ޑރ. އަފްޒަލް ވިދާޅުވީ މޮނިޓަރިންގެ ހާލަތުގައިވާ ގެތަކުގައި ދިރިއުޅޭ މީހުން ކޮވިޑް-19ށް ޓެސްޓު ކުރުން ވަރަށް މުހިންމު ކަމަށާއި، އެމީހުންގެ ސާމްޕަލްތައް ނަގަން ދާއިރު، ގެތަކުގެ އުޅޭ މީހުން ތިރިއަށް އައުމަށް ވެސް މާސްކް އެޅުން މުހިންމު ކަމަށެވެ. އަދި ތިރިއަށް އައުމުގެ ކުރިން ރަނގަޅަށް ސައިބޯނި ލައިގެން އަތްދޮވުމަށް ވެސް ޑރ. އަފްޒަލް އިލްތިމާސް ކުރެއްވި އެވެ.
ކޮވިޑް-19ން ރައްކާތެރިވުމަށް އަޅަން ޖެހޭ ފިޔަވަޅުތައް ހަނދުމަކޮށްދެއްވާ ޑރ.އަފްޒަލް ވިދާޅުވީ ބޭރަށް ނުކުމެ އުޅޭއިރު، ތިން ފޫޓުގެ ގައިދުރުކަން ބަހައްޓަން ޖެހޭ ކަމަށާއި، ގިނަ ގިނައިން ސައިބޯނި ލައިގެން އަތް ދޮންނަން ޖެހޭ ކަމަށެވެ. އަދި ކޮންމެ ގެއަކުން ވެސް ފިހާރައިން އެއްޗެހި ގަތުމަށް ދާ މީހާ ކަނޑައެޅުމާއި، ފިހާރައިން ގަންނަ އެއްޗެހީގެ ތެރެއިން ދޮވެވޭ އެއްޗެހި ރަނގަޅަށް ޑިސްއިންފެކްޓް ކުރުމަށް ޑރ. އަފްޒަލް އިލްތިމާސް ކުރެއްވި އެވެ.
ޑރ. އަފްޒަލް ވިދާޅުވީ ކޮވިޑް-19ގެ ރިސްކް ގުރޫޕުގައި ހިމެނޭ، އުމުރުން ދުވަސްވީ މީހުންނާއި، ދިގު މުއްދަތަކަށް ބޭސް ފަރުވާ ކުރާ މީހުންނާއި، މާބަނޑު އަންހެނުންނާއި، އަދި އުމުރުން 5 އަހަރުން ދަށުގެ ކުޑަ ކުދިންނަށް ޚާއްސަ ސަމާލު ކަމެއް ދޭން ޖެހޭ ކަމަށެވެ.
