ފުވައްމުލަކު ސިޓީގެ ގޮނޑުދޮށުން ވެލި ނަގާ ފަރާތްތަކާއި މެދު ފިޔަވަޅު އަޅާނެ ކަމުގެ އިންޒާރު، އެ ސިޓީގެ ކައުންސިލުން ދީފި އެވެ.
ކައުންސިލުން ނެރުނު ބަޔާނެއްގައި ބުނީ، ރަށުގެ ގޮނޑުދޮށުން އެއްވެސް މިންވަރަކަށް ވެލި ނެގުން މަނާކުރެވިފައިވާ ވާހަކަ ތަކުރާރުކޮށް ހަނދާން ކޮށްދެމުން ދިޔަ ނަމަވެސް ވެލިނަގަމުންދާ ކަމަށެވެ.
އެހެންކަމުން ކުރިޔަށް އޮތް ދުވަސް ތަކުގައި ވެލި ނަގަމުންދާ ފަރާތްތަކާއި މެދު އަޅަންޖެހޭ ފިޔަވަޅުތައް ކައުންސިލާއި، ކަމާއިބެހޭ އިދާރާތައް ގުޅިގެން އަޅަމުން ގެންދާނެ ކަމަށް ފުވައްމުލަކު ކައުންސިލުން ހޮނިހިރު ދުވަހު ނެރެފައިވާ ބަޔާނެއްގައި ބުންޏެވެ.
ފުވައްމުލަކު ގޮނޑުދޮށުން ވެލި ނަގާ މައްސަލަ ވަނީ މި ފަހަކަށް އައިސް އިތުރުވެފައި އެވެ. ފާއިތުވި ހަފްތާގައި އެކަނިވެސް ގަވާއިދާ ހިލާފަށް 87 ބަސްތާ ވެލި ނަގާފައިވާ ކަމަށް ސިޓީ ކައުންސިލުން ވަނީ ބުނެފައި އެވެ. ކައުންސިލުން ވަނީ ނަގާފައިވާ ވެލިތައް އަނބުރާ ގޮނޑުދޮށަށް އަޅާފަ އެވެ.
ފުވައްމުލަކަކީ ރަށް ގިރުމުގެ މައްސަލަ ބޮޑު ރަށެކެވެ. ރަށްގިރުމުގެ ނުރައްކަލުން ރަށް ހިމާޔަތް ކުރުމަށްޓަކައި ފުވައްމުލަކުގެ ގޮޑުދޮށުން އެއްވެސް ސަރަހައްދަކުން އެއްވެސް މިންވަރަކަށް ވެލި ފަދަ ތަކެތި ނެގުމަކީ މަނާ ކަމެކެވެ. ގަވައިދާ ހިލާފަށް ވެލި ނަގާނަމަ ކައުންސިލް ހޮޓްލައިން 1618 އަށް ގުޅައި މައުލޫމާތު ހިއްސާ ކޮށްދިނުމަށް ސިޓީ ކައުންސިލުން ވަނީ އާއްމުންގެ އެހީތެރިކަމަށް އެދިފަ އެވެ.
