ފަސް އެއާރޕޯޓް އަޅަން 57.5 މިލިއަން ޑޮލަރަށް މެލޭޝިއާ ކުންފުންޏަކާ ހަވާލުކޮށްފި
އެ ފަސް އެއާރޕޯޓް އަންނަ އަހަރުގެ އޮގަސްޓަށް ނިންމަންޖެހޭ
މިނިސްޓަރު މޫސާ ޒަމީރާއި މެލޭޝިއާ ކުންފުނީގެ ފަރާތުން އެ އެއްބަސްވުމުގައި ސޮއިކުރެއްވި ފަރާތް
ރާއްޖޭގެ ފަސް ރަށެއްގައި އެއާރޕޯޓް އެޅުމަށް 57.5 މިލިއަން ޑޮލަރު (886.5 މިލިއަން ރުފިޔާ)ގެ ޕްރޮޖެކްޓެއް ހިންގުމަށް މެލޭޝިއާގެ ކުންފުންޏަކާ އެކު ޓޫރިޒަމް މިނިސްޓްރީން ސޮއިކޮށްފިއެވެ.
އަންގާރަ ދުވަހު ޓޫރިޒަމް މިނިސްޓްރީގައި ބޭއްވި ސޮއިކުރުމުގެ ރަސްމިއްޔާތުގައި ޓޫރިޒަމް މިނިސްޓްރީގެ ފަރާތުން ސޮއި ކުރެއްވީ މިނިސްޓަރު މޫސާ ޒަމީރުއެވެ. އެ ޕްރޮޖެކްޓް ހިންގުމަށް ހަވާލުކޮށްފައި ވަނީ މެލޭޝިއާގެ ކުންފުންޏެއް ކަމަށްވާ ގްރިފޯން އެނާޖީ ސިންޑަރްމަ ބަރުހާދާ އެވެ.
ޓޫރިޒަމް މިނިސްޓްރީއާއި މެލޭޝިއާ ކުންފުންޏާ ދެމެދު އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
އެ ޕްރޮޖެކްޓްގެ ދަށުން 57.5 މިލިއަން ޑޮލަރު ޚަރަދުކޮށްގެން ރީޖަނަލް އެއާރޕޯޓްގެ ގޮތުގައި ތަރައްގީ ކުރުމަށް ނިންމާފައިވާ ފަސް ރަށަކީ ހދ. ކުޅުދުއްފުށި، ށ. ފުނަދޫ، ފ. ނިލަންދޫ، ގދ. މާވަރުލު އަދި ގދ. ފަރެސްމާތޮޑާ އެވެ.
އެ އެއްބަސްވުމުގައިވާ ގޮތުން، އެ ފަސް އެއާރޕޯޓް އަންނަ އަހަރުގެ އޮގަސްޓްމަހުގެ ނިޔަލަށް ނިންމަޖެހެއެވެ.
