ލަންކާ އަށް އަންނަ މީހުންގެ ފަރާތުން ކޮވިޑް-19 ފެތުރުމަށް ޖާގަ ނުދެއްވާނެ ކަމަށާއި، ރައްކާތެރިކަމުގެ ފިޔަވަޅުތައް ވަރުގަދަ ކޮށްފައިވާ ކަމަށް ލަންކާގެ ހެލްތް މިނިސްޓަރު ޕަވިތްރަ ވިދާޅުވެއްޖެ އެވެ.

ލަންކާ ސަރުކާރުން ދަނީ، ގައުމުން ބޭރުގައި ތިބި އެ ގައުމުގެ ރައްޔިތުން ގެނައުމުގެ މަސައްކަތް ފަށާފަ އެވެ. ބޭރުން އަންނަ އެންމެންވެސް 14 ދުވަހުގެ ކަރަންޓީނު މުއްދަތު ފުރިހަމަ ކުރަން ޖެހެ އެވެ.

ހެލްްތް މިނިސްޓަރު ވިދާޅުވީ، ކަރަންޓީނު ފެސިލިޓީސް ގައި މީހުން ތިބެނީ ރައްކާތެރި ކަމުގެ ފިޔަވަޅުތަކާއި އެކު ކަމަށެވެ. އަދި ކަރަންޓީނު ގައި ތިބޭއިރު، މީހަކު ޕޮޒިޓިވްވެއްޖެނަމަ، ސިއްހީ މާހިރު އެ މީހުން ހޮސްޕިޓަލަށް ގެންދަނީ ސިއްހީ ގޮތުން ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތައް އަޅައިގެން ކަމަށެވެ.

ގައުމުގެ އެތެރޭގައި އިތުރަށް ވައިރަސް ނުފެތުރޭތޯ ބެލުމަށް އެޅެން ހުރި ފިޔަވަޅުތައް ސަރުކާރުން ދަނީ އަޅަމުންނެވެ. ހެލްތު މިނިސްޓަރު ވިދާޅުވީ، އެހެނިހެން ގައުމުތަކުގައި އެއްވެސް ލިޔެކިޔުމަކާއި ނުލާ ތިބި ލަންކާގެ ރައްޔިތުން ގެނައުމުގެ މަަސައްކަތުގައި ގޮންޖެހުންތަކެއް ދިމާވާ ކަމަށެވެ.

ނަމަވެސް ގައުމުން ބޭރުގައި ތިބި ލަންކާ މީހުން ގެނައުމުގެ މަސައްކަތް މަޑުޖައްސާނުލާ ކުރިޔަށް ގެންދާނެ ކަމަށް ލަންކާ ސަރުކާރުން ވަނީ ބުނެފަ އެވެ. އަދި އޭގެ ތެރޭގައި ބަލި ޖެހިފައި ތިބި މީހުން ތިބިޔަސް އެމީހުން ގެނައުމުގައި ސަރުކާރުން ފަސް ނުޖެހޭނެ ކަމަށްވެސް ވަނީ ބުނެފަ އެވެ.

ލަންކާގައި މިހާތަނަށް ކޮވިޑް-19 އަށް 1500 ށް ވުރެ ގިނަ މީހުން ވަނީ ޕޮޒިޓިވްވެފައި އެވެ. މީގެ ތެރެއިން 700ށް ވުރެ ގިނަ މީހުން ވަނީ ބަލިން ފަސޭހަވެފައި އެވެ.