ރައީސް އޮފީހުގެ ހުއްދައާއެކު ސަރުކާރު އޮފީސްތައް ހުޅުވޭނެ، ހުޅުވޭނީ ދުވާލަކު 4 ގަޑިއިރަށް
އޮފީސްތަކުން ކުރާ މަސައްކަތައް އެޗްޕީއޭއަށް ހިއްސާކުރަން ޖެހޭނެ
ވެލާނާގެ- ސަރުކާރުގެ ގިނަ އޮފީސްތަކެއް ހިމެނޭ އިމާރާތެއް
ލޮކްޑައުންއަށް ލުއިތަކެއް ދޭއިރު ސަރުކާރު އޮފީސްތަކުގެ ތެރެއިން ހުޅުވާލާނީ ރައީސް އޮފީހުން ހުއްދަ ލިބިގެން ކޮންމެހެން ހުޅުވަންޖެހޭ އޮފީސްތައް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
ކޮވިޑް-19 ޓާސްކް ފޯހުގެ ފަރާތުން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ ނަޒްލާ ރަފީގު ވިދާޅުވީ ކޮންމެހެން ވަކި ޚިދުމަތްތަކެއް ދޭންޖެހޭ ނުވަތަ ބައެއް ކަހަލަ މަސައްކަތްތައް ކުރަންޖެހޭ އޮފީސްތައް ހުޅުވާނެ ކަމަށާއި ނަމަވެސް އެ އޮފީސްތަކުން ކުރާ މަސައްކަތައް އެޗްޕީއޭއަށް ހިއްސާކުރަން ޖެހޭނެ ކަަމަށް ޑރ ނަޒްލާ ވިދާޅުވި އެވެ. އަދި އޮފީސްތައް ހުޅުވާފައި ބެހެއްޓޭނީ ދުވާލަކު އެންމެ ގިނަވެގެން 4 ގަޑިއިރު ކަމށް ޑރ ނަޒްލާ ވިދާޅުވި އެވެ.
މީގެއިތުރުން ޕްރައިވެޓް އޮފީސްތައްވެސް އެކޮނޮމިކް މިނިސްޓްރީން ދޭން ހުއްދައާއެކު ހުޅުވޭނެ ކަމަށް ޑރ ނަޒްލާ ވިދާޅުވި އެވެ. އަދި ޕްރައިވެޓް އޮފީސް ތަކުގައިވެސް މަސައްކަތް ކުރަންޖެހޭނީ އެއްވަގުތެއްގައި އެއް ބަޔެއްގައި ފަސް މީހުންނަށް ވުރެ ގިނަ ނުވާގޮތަށް ކަމަށް ޑރ ނަޒްލާ ވިދާޅުވި އެވެ.
އޮފީސް ހުޅުވާފައި ބެހެއްޓޭނީ އެންމެ ގިނަ ވެގެން 4 ގަޑިއިރު ކަމަށާއި ޝިފްޓުވާ އުސޫލުން އެއް ބަޔަކު އަނެއް ބަޔަކު ދިމާނުވާގޮތަށް މަސައްކަތްތައް ކުރިޔަށް ގެންދެވޭނެ ކަމަށް ޑރ ނަޒްލާ ވިދާޅުވި އެވެ.
ފުރަތަމ ފޭސްގައި ސްކޫލްތައް ނުހުޅުވާނެ ކަމަށާއި އެހެންނަމަވެސް ކޮވިޑް-19 ގެ ކޭސްއެއް ނެތް ރަށްރަށުގައި ޓީޗަރުންނާއި ސްޓާފުންނަށް ތައްޔާރުވުމުގެ ގޮތުން މަސައްކަތަށް ނިކުމެވޭނެ ކަމަށް ޑރ ނަޒްލާ ވިދާޅުވި އެވެ.
