ސެންޓްރަލް ޒޯން ވޮލީ މުބާރާތުގެ ކޮލިފިކޭޝަނުގައި ވާދަކުރާ އަންހެން ވޮލީ ޓީމުގެ ތަމްރީނުތައް ކުރިއަށް ގެންދަނީ ބްލޮކާއި ޑިފެންސަށް އިސްކަން ދީގެން ކަމަށް އެޓީމުގެ ކޯޗު އަހުމަދު އަދީލް (ބޭބެ) ބުނެފި އެވެ.
ކޮލިފިކޭޝަނަށް އަންހެން ޓީމު ވަމުންދާ ތައްޔާރީތަކާ ބެހޭ ގޮތުން ވާހަކަ ދައްކަމުން އަދީލް ބުނީ ކޮލިފައިން އަށް ތައްޔާރުވުމަށް ފަރިތަކުރުންތައް ކުރިއަށް ގެންދާތާ މިހާރު ވަރަށް ދުވަސް ވެފައިވާ ކަމަށާއި އެގޮތުން ކުޅުންތެރިންގެ ހުނަރަށް ބަލާއިރު، ވަރަށް ބޮޑުތަން ރަނގަޅު ކުރެވިފައިވާ ކަމަށެވެ.
ކޮލިފިކޭޝަންގައި ވާދަކުރާ އެހެން ޓީމުތަކުގެ ކުޅުންތެރިންގެ އިސްކޮޅާ ބެހޭ ގޮތުން ވާހަކަ ދައްކަމުން އަދީލް ބުނީ އިދިކޮޅުން ކުޅޭ ޓީމުތަކުގެ ކުޅުންތެރިންނަކީ އިސްކޮޅުން ދިގު ކުޅުންތެރިންތަކެއް ކަމަށާއި އެ ކުޅުންތެރިންނާ އަޅާ ކިޔާއިރު، ރާއްޖޭގައި އޮތީ އެއަށްވުރެން އިސްކޮޅުން ކުރު ކުޅުންތެރިންތަކެއް ހިމެނޭ ޓީމެއް ކަމަށެވެ.
އަދީލް ބުނީ ކޮލިފައިންގައި ދެން ވާދަކުރާ ޓީމުތަކުގެ ކުޅުންތެރިންގެ އިސްކޮޅަށް ބަލައި ރާއްޖެ އަށް މިވަގުތަށް އެންމެ މުހިންމު ވާނީ ޑިފެންސް ކުރުމާއި ބްލޮކްތައް ވަރުގަދަ ކުރުން ކަމަށާއި އެހެން ކަމުން ޓްރެއިނިންގައި އެކަމަށް ވަރަށް ބޮޑަށް ސަމާލުކަން ދެމުން އަންނަ ކަމަށެވެ.
ބްލޮކަކީ ޑިފެންސްގެ ފެށުންކަން ފާހަގަކުރަމުން އަދީލް ބުނީ މީގެ ކުރިން ވާދަކުރި ބައެއް މުބާރާތްތަކުގައި ވެސް ލިބުނު ފިލާވަޅަށް ބަލައި މި ދެ ކަންތަކަށް މިފަހަރު ވަރަށް ބޮޑު ސަމާލުކަމެއް ދީފައި ވާނެ ކަމަށެވެ. އެހެން ކަމުން ހިތްހަމަޖެހޭ ވަރަށް ކުޅުންތެރިންގެ ފަރާތުން އެކަމުގެ އެދެވޭ ހެޔޮ ބަދަލު ފެންނަމުންދާ ކަމަށް ވެސް އަދީލް ބުންޏެވެ.
އަދީލް ބުނީ ފަރިތަކުރުންތަކުގައި ކުޅުންތެރިންނަށް ދަސްވި ފިލާވަޅާއެކު މުބާރާތުގައި ރަނގަޅު ފައިޓެއް އިދިކޮޅު ޓީމުތަކަށް ދެވޭނެ ކަމަށް އުންމީދުކުރާ ކަމަށެވެ.
ތިން ގައުމު ވާދަކުރާ މި މުބާރާތުން ކުރި ހޯދާ ޓީމަކަށް އޭޝިޔާ ބައްރުގެ ކޮލިފިކޭޝަނުން ޖާގަ ލިބޭނެއެވެ. ގްރޫޕް ސްޓޭޖުން ޖާގަ ލިބޭނީ އޭޝިޔާ ބައްރުގެ ކޮލިފައިންގައި ވާދަކޮށް ކުރި ހޯދައިގެންނެވެ.
