އޮގަސްޓް މަހުގެ ކުރީކޮޅާ ހަމައަށް ބްރެޒިލްގައި ކޮވިޑް-19 ޖެހިގެން 125،000 މީހުން މަރުވާނެ ކަމަށް ޔުނިވަރސިޓީ އޮފް ވޮޝިންގޓަން އިން ހެދި ދިރާސާއަކުން ދައްކައިފި އެވެ.

ބްރެޒިލްއަކީ މިވަގުތު ދުނިޔޭގައި އެންމެ ހަލުވި މިނުގައި ވައިރަސް ފެތުރެމުންދާ ގައުމެވެ. ބްރެޒިލްގައި ހޯމަ ދުވަހު ވަނީ އެމެރިކާއަށް ވުރެ ގިނަ މީހުން މަރުވެފަ އެވެ. އެދުވަހު ބްރެޒިލް އިން މަރުވެފައި ވަނީ 807 މީހުންނެވެ. އެމެރިކާ އިން މަރުވެފައިވަނީ 620 މީހުންނެވެ. އެއާއެކު ބްރެޒިލް އެއްކޮށް 'ލޮކްޑައުން' ކުރުމަށް އެ ގައުމުގެ ރައީސަށް އަންނަނީ ގޮވާލަމުންނެވެ.

އެއާއެކު ހޯމަ ދުވަހުގެ ރޭ އެމެރިކާއިން ވަނީ ފާއިތުވި ދުވަސްތަކުގައި ބްރެޒިލް އަށް ގޮސްފައިވާ މީހުން އެމެރިކާއަށް ނޭރުވުމަށް ނިންމާފަ އެވެ. އޭގެ ދެ ދުވަސްކުރިން ބްރެޒިލް ވަނީ ދުނިޔޭގައި ދެވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިގެން ރިޕޯޓުކުރަމުން އަންނަ ގައުމަށް ވެފަ އެވެ.

ޔުނިވަރސިޓީ އޮފް ވޮޝިންގޓަން ގެ އިންސްޓިޓިއުޓް ފޮރ ހެލްތު މެޓްރިކްސް އެންޑް އެވަލުޔޭޝަންގެ ޑިރެކްޓަރ ޑރ ކްރިސްޓޮފަރ މުއްރޭ ވިދާޅުވާ ގޮތުން ބްރެޒިލް އިން ވައިރަސް ފެތުރުން ކޮންޓްރޯލް ކުރުމަށް ވުހާން އާއި، ޗައިނާ، އިޓަލީ އަދި ސްޕެއިން އާއި ނިއުޔޯރކުން ގެންގުޅުނު ފަދަ ސިޔާސަތުތައް ގެންގުޅެން ޖެހެއެވެ. އެހެންނޫން ކަމަށްވާނަމަ ބްރެޒިލްގައި ހަލުވި މިނުގައި ފެތުރެމުންދާ ކޮވިޑް-19 ނުހުއްޓުވޭނެ ކަމަށް މުއްރޭ ވިދާޅުވި އެވެ.

މުއްރޭ ވިދާޅުވީ މި ދިރާސާ ހެދުމުގައި ބަލާފައި ވަނީ ސޯޝަލް ޑިސްޓެންސް ޕްރެކްޓިސް ކުރަމުންދާ މިންވަރާއި، ކޮވިޑް-19ށް މީހުން ޓެސްޓް ކުރެވޭ މިންވަރާއި، މީހުން ހަރަކާތްތެރިވަމުންދާ މިންވަރަށް ކަމަށެވެ. މިހާރު ބްރެޒިލްގައި މި ސިޔާސަތުތައް ތަންފީޒު ކުރަމުންދާ ގޮތުގެ މައްޗަށް މި ދިރާސާ ހެދިއިރު ކުރިޔަށް އޮތްތަނުގައި އެ އަދަދުތަކަށް ބަދަލު އައުމަކީ ވެސް އެކަށީގެންވާ ކަމެއްކަމަށް މުއްރޭ ވިދާޅުވި އެވެ.

އަދި މި ދިރާސާ ހެދި މޮޑެލް އަށް ޑާޓާ ތައް ލިބެމުންދާ ވަރަކުން ނަންބަރުތަކަށް ބަދަލު އަންނަމުންދާނެ އެވެ.