ރަށްރަށުގައި ކުޅިވަރު ކުޅުމުގެ ހުއްދަ ދިނުމަށް ވާނީ ލަފަޔަކަށް އެދިފައި: މަހުލޫފް

ރަށްރަށުގައި ކުޅިވަރު ކުޅުމުގެއް ހުއްދަ ދިނުމަށް ޓެކްނިކަލް އެޑްވައިޒަރީ ގްރޫޕް (ޓެގް) އާއި ހެލްތު ޕްރޮޓެކްޝަން އޭޖެންޗީ (އެޗްޕީއޭ) ގެ ލަފަޔަކަށް އެދިފައިވާނެ ކަމަށް ކުޅިވަރާ ބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.

މިދިޔަ ހުކުރު ދުވަހުން ފެށިގެން މޮނިޓަރިންގައި ނެތް ރަށްތަކުގެ މިސްކިތްތަކުގައި ޖަމާޢަތުގައި ނަމާދުކުރުމުގެ ހުއްދަ އިސްލާމިކް މިނިސްޓްރީން ވަނީ ދީފައެވެ. އެއާއެކު މިސްކިތްތައް ހުޅުވާފައިވާ ރަށްރަށުގައި ކުޅިވަރު ކުޅުމުގެ ހުއްދައަށް އެދި އެކިފަރާތްތަކުން އަންނަނީ އެދެމުންނެވެ.

މަހުލޫފް ކުރެއްވި ޓްވީޓެއްގައި ވިދާޅުވީ މިސްކިތްތައް ހުޅުވާފައިވާ ރަށްރަށުގައި ކުޅިވަރު ކުޅުމުގެ ހުއްދައަށް އެދި އެކިފަރާތްތަކުން އެދެމުން އަންނަ ކަމަށާއި އެހެންކަމުން ޓެގް އާއި އެޗްޕީއޭގެ ލަފަޔަކަށް މިހާރު އެދިފައިވާނެ ކަމަށެވެ.

ކޮވިޑް 19 ފެތުރުނަ ނުދިނުމުގެ ގޮތުން ރާއްޖޭގެ ހުރިހާ ރަށެއްގައި ވަނީ ކުޅިވަރުގެ ހުރިހާ ހަރަކާތެއްހެން ހުއްޓާލަން އަންގާފައެވެ. އަދި ކުޅިވަރާ ބެހޭ ވުޒާރާއިން ވަނީ އެ ވުޒާރާގެ ދަށުގައިވާ ހުރިހާ ކުޅިވަރު ކުޅެ ތަންތަނާއި މަރުކަޒުތައް މާޗު މަހުގެ 15 ވަނަ ދުވަހުން ފެށިގެން ބަންދު ކޮށްފައެވެ.

ކޮވިޑް-19 ރާއްޖޭގައި ހަލުވިކަމާއެކު ފެތުރެމުންދާއިރު، މިހާތަނަށް ރާއްޖެއިން މި ވައިރަހަށް 1،395 މީހަކު ވަނީ ޕޮޒިޓިވް ވެފައެވެ. މި ވައިރަސް ޖެހިގެން ރާއްޖެއިން 4 މީހަކު މަރުވެފައިވާއިރު، 144 މީހަކު ވަނީ ވައިރަހުން ރަނގަޅު ވެފައެވެ.