ސާމްޕަލް ނަގާ ޓީމުގެ މެންބަރުންނާއި ގާތް ނުވުމަށް އިލްތިމާސް ކޮށްފި
ސާމްޕަލް ނަގަންދާ ރެޕިޑް ރެސްޕޮންސް ޓީމް މެންބަރުން ހަރަކާތްތެރިވަމުން ދާނީ ހައިރިސްކް ތަންތަނުގައި
ޑރ. މޫސާ މުރާދު: އާރްއާރް ޓީމުން ހަރަކާތްތެރިވަމުން ދާނީ ހައިރިސްކް ތަންތަނުގައި ކަމަށް ވިދާޅުވި
ކޮވިޑް-19 އަށް ޓެސްޓްކުރުމަށްޓަކައި ސާމްޕަލް ނަގަންދާ ރެޕިޑް ރެސްޕޮންސް ޓީމް (އާރުއާރުޓީ) ގެ މެންބަރުންނާއި އާންމުން ގާތް ނުވުމަށް އިލްތިމާސްކޮށްފި އެވެ.
ނޭޝަނަލް އެމެޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓެކްނިކަލް އެޑްވައިޒަރީ ގްރޫޕް (ޓެގް) ގައި ހިމެނިވަޑައިގަންނަވާ ޑޮކްޓަރ ޑރ. މޫސާ މުރާދު ވިދާޅުވީ، ސާމްޕަލް ނަގަން ހަރަކާތްތެރިވާ ޓީމުގެ މެންބަރުން ސައިޓްތަކަށް ގޮސް އުޅޭއިރު ބައެއް ކަހަލަ އުނދަގޫތަކާއި ދިމާވާ ކަމަށެވެ.
އެގޮތުން ޓީމުން ކުރާ މަސައްކަތްތައް ބެލުމަށާއި، ފޮޓޯ ނެގުމުގެ ބޭނުމުގައި، ޢާންމު ބައެއް ފަރާތްތަކުން އެ ޓީމުގެ ބޭފުޅުންނާއި ގާތްވަމުންދާކަމުގެ ޝަކުވާ ލިބެމުންދާކަން ޑރ. މުރާދު ފާހަގަކުރެއްވި އެވެ. އަދި އެންމެންގެ ރައްކާތެރިކަމަށް އެކަން އެގޮތަށް ނުކުރުމަށް އިލްތިމާސް ކުރެއްވި އެވެ.
ޑރ. މުރާދު އިތުރަށް ވިދާޅުވީ، އާރުއާރުޓީގެ މެންބަރުން ހަރަކާތްތެރިވާނީ މި ބަލި އޮތް އެންމެ ހައިރިސްކު ނުވަތަ ބަލި ފެތުރުމުގެ ފުރުޞަތު އޮތް ތަންތަނުގައިކަމަށެވެ. އެ ތަންތަނުގައި ޕޮޒިޓިވް މީހުން ތިބުމަކީ އެކަށީގެންވާކަމެއްކަމަށާއި، އެހެންކަމުން އެޓީމްގެ މެންބަރުންނާއި ޢާންމުން ގާތްވެ އުޅުމަކީ ރައްކާތެރިކަމެއް ނޫންކަމަށް ވިދާޅުވި އެވެ.
ޓެކްނިކަލް އެޑްވައިޒަރީ ގްރޫޕުން ދަނީ، މިހާރު އަޅާފައިވާ ފިޔަވަޅުތަކަށް ކޮންމެވެސް ވަރެއްގެ ލުއިތަކެއް ދިނުމަށް މަޝްވަރާ ކުރަމުން ނެވެ. މިހާރު އަޅާފައިވާ ފިޔަވަޅުތައް ލުއިކުރާއިރު. ކޮންމެ މަރުހަލާއެއްގެ މަޢުލޫމާތު އާންމުންނާ ހިއްސާކުރަމުން ގެންދާނެ ކަމަށް ވަނީ މައުލޫމާތު ލިބިފަ އެވެ.
