ހާލު ބޮޑުވި އަންހެންމީހާގެ ދަރިފުޅު ފަސް މަހުގައި ނަގާއިފި

އެޗް1އެން1 އަށް ޖެހިގެން ހާލު ބޮޑުވި މާބަނޑު އަންހެން މީހާ ސިޒޭރިއަން ހަދައި ދަރިފުޅު ނަގައިފިއެވެ.

ރާއްޖެއެމްވީއަށް މައުލޫމާތު ދެމުން އައިޖީއެމްއެޗްގެ މީޑިއާ އޮފިޝަލް ވިދާޅުވީ، ސިޒޭރިއަން ހަދައި ފަސް މަހުގެ ދަރިފުޅު ނަގާފައި ވަނީ އަންހެންމީހާގެ ހާލު ސީރިއެސްވުމުން ކަމަށެވެ. ދަރިފުޅު ނެގުމަށް ފަހު ވެސް އަންހެންމީހާއަށް ފަރުވާދެމުން ދަނީ އައިސޫގައި ވެންޓިލޭޓަރެއްގެ އެހީގަކަމަށް އޭނާ ވިދާޅުވި އެވެ.

ދުވަސް ނުފުރޭ ދަރިފުޅު ނެގުމަށް ފަހު ދަރިފުޅަށް އައިޖީއެމްއެޗް ހޮސްޕިޓަލްގެ ނާސަރީގައި ފަރުވާދެމުން އަންނަ ކަމަށް އޮފިޝަލް ވިދާޅުވި އެވެ. އަދި ވިދާޅުވީ، ދަރިފުޅާއި ދޭތެރޭ އެއްޗެއް ބުނަން އިނގޭނީ ފަރުވާދިނުމަށް ފަހު ޓެސްޓްތަށް ހަދާފައި ކަމަށެވެ.

މާބަނޑު މިހާ އެޗ1އެން1 އަށް ޕޮޒިޓިވްކަން ހާމަކުރީ ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައެވެ. ވައިރަހާއި ގުޅިގެން އުފައްދާފައިވާ ޓާސްކް ފޯހުގައި އިސްކޮށްވެސް ހަރަކާތްތެރިވެވަޑައިގަންނަވާ ޑރ. އަބްދުﷲ ނިޔާފް އެރޭގައި ވިދާޅުވީ، އަންހެން މީހާގެ ހާލު ވަރަށް ސީރިއަސް ކަމަށެވެ. އަދި އަންހެން މީހާއަށް ވަރަށް ގާތުން ފަރުވާދެމުން އަންނަ ކަމަށް ނިޔާފް ވިދާޅުވި އެވެ.

އެޗްޕީއޭއިން ހާމަކޮށްފައިވާގޮތުގައި އެޗް1އެން1 އަށް ޕޮޒިޓިވްވެ، ސީރިއަސް ހާލަތުގައި ތިން މީހަކުވެއެވެ. އަދި އެ މީހުންނަށް އެންމެ ރަނގަޅު ފަރުވާދެމުން އަންނަކަމަށް އެޗްޕީއޭއިން ބުނެ އެވެ. އޭގެ ތެރޭގައި ކުޑަކުއްޖެއްވެސް ހިމެނެވެ. އެންމެ ފަހުން އާންމުކޮށްފައިވާ ތަފަށް ހިސާބުތައް ދައްކާގޮތުން 51 މީހަކު ވަނީ ވައިރަހަށް ޕޮޒިޓިވްވެފައެވެ.