ހުޅުމާލެ ޖަލުންވެސް ރެންޑަމް ސާމްޕަލް ނަގައިފި
22 މެއި 2020 | ހުކުރު 10:11ޖަލު އޮފިސަރުންނާއި ޤައިދީންގެ ރެންޑަމް ސާމްޕަލް ނަގާފައިވޭ
ހުޅުމާލޭ ޖަލުގައި ރެންޑަމް ސާމްޕްލިންގެ މަސައްކަތް ކުރިއަށްދަނީ
ކޮވިޑް-19 ފެތުރުން ކޮންޓްރޯލް ކުރުމަށް ކުރަމުންދާ މަސައްކަތްތަކުގެ ތެރެއިން ހުޅުމާލޭ ޖަލުގައިވެސް 'ރެންޑަމް ސާމްޕްލިންގ' ކުރިއަށް ގެންގޮސްފި އެވެ.
އެކަމާ ގުޅޭގޮތުން މޯލްޑިވްސް ކަރެކްޝަނަލް ސަރވިސަސްއިން ބުނީ، މިއީ ކަރެކްޝަންސްއާއި ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގުޅިގެން ކުރަމުންދާ މަސައްކަތެއް ކަމަށެވެ. އެގޮތުން މި މަސައްކަތުގެ ތެރެއިން ހުޅުމާލޭ ޖަލުގައި މަސައްކަތް ކުރަމުންދާ ޖަލު އޮފިސަރުންނާއި ޤައިދީންގެ ރެންޑަމް ސާމްޕަލް ނަގާފައިވާކަމަށް ކަރެކްޝަންސް އިން ބުނެ އެވެ.
އެގޮތުން މި ހަރަކާތުގައި ޤައިދީންގެ ތެރެއިން 15 މީހެއްގެ ސާޕަލް ނަގާފައިވާއިރު، 'ޑިޓެއިނީސް' ގެ ގޮތުގައި ތިބި 5 ބިދޭސީންގެ އިތުރުން، ޖަލުގެ 10 އޮފިސަރުންނާއި މުވައްޒަފުންގެ ކޮވިޑް-19 އަށް ޓެސްޓު ކުރަން ސާމްޕަލް ނަގާފައި ވެއެވެ. އަދި މި 30 ސާމްޕަލް ނެގުމުގައި ބަލާފައިވާނީ ވަކި ޔުނިޓް ތަކުގެ ތެރެއިން ހޮވާލެވުނު ޤައިދީންނާއި ތަފާތު އެކި ދާއިރާތަކުގައި މަސައްކަތްކުރާ އޮފިސަރުންނާއި މުވައްޒަފުންނަށް ކަމަށް ކަރެކްޝަންސްއިން ބުނެއެވެ.
ކަރެކްޝަންސްއިން ބުނީ، މިއީ ޖަލުތަކަށް ވައިރަހުގެ އަސަރުކޮށްފައިވާ މިންވަރު ދެނެގަތުމައްޓަކައި ކުރަމުންދާ މަސައްކަތެއް ކަމަށެވެ.
ކަރެކްޝަންސްއާއި އެންއީއޯސީ ގުޅިގެން މީގެ ކުރިން ވަނީ މާފުށީ ޖަލާއި، އައްސޭރި ޖަލުގެ އިތުރުން މާލޭ ޖަލުގައި ތިބި ޤައިދީންގެ ސާމްޕަލް ނަގާފަ އެވެ. އަދި އެ ހުރިހާ ސާމްޕަލެއްގެ ނަތީޖާ ވަނީ ނެގެޓިވް ވެފައެވެ.
