ރާއްޖޭގައި ތިބި ބަންގްލަދޭޝްގެ 152 މީހުން ގައުމަށް ފޮނުވާލައިފި
22 މެއި 2020 | ހުކުރު 09:16ހުކުރު ދުވަހު މިމީހުން ފޮނުވާލީ މޯލްޑިވިއަންގެ ފްލައިޓެއްގައި
ބަންގްލަދޭޝް މީހުން ފްލައިޓަށް އެރުމަށް ދަނީ
ރާއްޖޭގައި ތިބި ބަންގްލަދޭޝްގެ އިތުރު 152 މީހުން އަނބުރާ ގައުމަށް ފޮނުވައިފިއެވެ.
ރާއްޖޭގައި ގަވައިދާ ހިލާފަށް އުޅެމުންދާ މި މީހުން ހުކުރު ދުވަހު ފޮނުވާލީ ގައުމީ އެއާލައިން މޯލްޑިވިއަންގެ ފްލައިޓެއްގައެވެ.
މޯލްޑިވިއަންއިން ބުނީ ބަންގްލަދޭޝް އިތުރު 152 މީހުން ފޮނުވައިލީ ކޮވިޑް-19އާ ގުޅިގެން ކުރަމުންދާ މަސައްކަތުގެ ތެރެއިން ފޮރިން މިނިސްޓްރީއާއި އިކޮނޮމިކް މިނިސްޓްރީ އަދި ވެސް ކަމާގުޅުން ހުރި މުއައްސަސާތަކުގެ އެހީތެރިކަމާއެކު ކަމަށެވެ.
މިމަހުގެ 17ވީ އާދިއްތަ ދުވަހު ވެސް 67 ބަންގްލަދޭޝް މީހަކު އަނބުރާ ގައުމަށް ފޮނުވާލާފައިވާއިރު ސައްހަ ލިޔެކިއުން ނެތި ރާއްޖޭގައި އުޅުނު ބަންގްލަދޭޝްގެ 335 މީހަކު މިމަހުގެ 16ވީ ހޮނިހިރު ދުވަހު ވެސް ވަނީ އެ ގައުމަށް އަނބުރާ ފޮނުވާލާފައިވެއެވެ.
ރާއްޖެ އާއި ބަނގްލަދޭޝްގެ ސަރުކާރާއި ދެމެދު ވެފައިވާ އެއްބަސްވުމުގެ ދަށުން ގަވައިދާހިލާފަށް ރާއްޖޭގައި އުޅެމުންދާ ބަންގްލަދޭޝްގެ މީހުން ފޮނުވާލުމުގެ މަސައްކަތް ދަނީ ކުރަމުންނެވެ.
ރާއްޖެއިން ކޮވިޑް-19 ފެނުމާ ގުޅިގެން އެންމެ ބޮޑަށް ނިކަމެތިވެގެން ދިޔަ އެއްބަޔަކީ ބިދޭސީންނެވެ. އަދި އެމީހުންނަށް އެހީވުމުގެ ގޮތުން ގިނަ އަދަދެއްގެ ބަޔަކު ވަނީ ކަރަންޓީން ފެސިލިޓީތަކަށް ވެސް ގެންގޮސްފައެވެ.
