އޭޑީކޭގައި ކޮވިޑް-19ށް ޓެސްޓް ކުރަން ފަށައިފި
21 މެއި 2020 | ބުރާސްފަތި 17:29އޭޑިކޭއިން ދުވާލެއްގެ މައްޗަށް 500 ޓެސްޓް ހެދޭނެ
އޭޑީކޭ ހޮސްޕިޓަލް
އޭޑީކޭގައި ކޮވިޑް-19ށް ޓެސްޓްކުރަން ފަށައިފި އެވެ.
ބުރާސްފަތި ދުވަހުގެ ރޭ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓާސްކްފޯހުގެ ތަރުޖަމާނު މަބްރޫކް އަޒީޒް ވިދާޅުވީ، އައިޖީއެމްއެޗުގައިި އައު އެކްސްޓެރެކްޝަން މެޝިނެއް ބެހެއްޓުމުގެ މަސައްކަތް ފަށާފައިވާ ކަމަށާއި، މަސައްކަތް ނިމުމުން ދުވާލަކަށް 600 ޕީސީއާރު ޓެސްޓު އައިޖީއެމްއެޗުން ހެދޭނެ ކަމަށެވެ. އަދި އޭޑީކޭގައިވެސް ޓެސްޓުކުރުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ. އެގޮތުން، އެ ހޮސްޕިޓަލުން ދުވާލަކަށް 500 ޓެސްޓު ހެދޭނެ ކަމަަށެވެ.
ކޮވިޑް-19 އަށް ޓެސްޓް ކުރުމަށް އޭޑީކޭގައި މިހާރު ބަހައްޓާފައިވާ މެޝިނުން މެދުކެނޑުމެއްނެތި ޓެސްޓުތައް ހެދުމުގެ މަސައްކަތްކުރަމުން ގެންދާނެ ކަމަށް އެޑީކޭގެ ޖެނަރަލް މެނޭޖަރ އަހްމަދު އައްފާލް ވެސް މީގެ ކުރިން ވިދާޅުވެފަ އެެވެ. އެގޮތުން ހޮސްޕިޓަލުގައި ޢާންމު ރައްޔިތުންނަށް ވީހާވެސް ފުޅާދާއިރާއެއްގައި ޚިދުމަތް ދެވޭތޯ މަސައްކަތްކުރަމުންދާ ކަމަށާއި އެގޮތަށް އަންނަ ބަލި މީހުން ވެސް ކޮވިޑް-19 އަށް ޓެސްޓު ކުރެވޭނެ އިންތިޒާމެއް ހަމަޖެހިފައި އޮންނަންޖެހޭކަމަށް އޭނާ ވިދާޅުވެފައި އެވެ.
އައްފާލް ވިދާޅުވީ މިވަގުތު އޭޑީކޭގެ އަމާޒަކީ ސަރުކާރަށް ޓެސްޓިން ކެޕޭސިޓީ އިތުރު ކުރުމުގައި އެހީތެރިކަން ފޯރުކޮށްދިނުން ކަމަށެވެ. އެހެންނަމަވެސް ކުރިޔަށް އޮތްތަނުގައި އެހެން ގޮތްގޮތުން ވެސް އެހީތެރިކަން ފޯރުކޮށްދެމުން ގެންދާނެކަމަށް އައްފާލް ވިދާޅުވި އެވެ.
މިހާރު ރާއްޖޭގައި ކޮވިޑް-19 އަށް ޓެސްޓް ކުރަމުންދަނީ އައިޖީއެމްއެޗްގެ ލެބޯރެޓަރީންނާއި ފުލުހުންގެ ފޮރެންސިކް ލެބޯރެޓަރީންނެވެ. މިހާރު ދުވާލެއްގެ މައްޗަށް 350-400 އާ ދެމެދުގެ އަދަދަކަށް ޓެސްޓު ހެދުމުންދާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވަނީ ވިދާޅުވެފަ އެވެ. އަދި މިހާރު ރާއްޖެ ގެނައުމަށް ސަރުކާރުން މަސައްކަތް ކުރަމުންދާ ދެ މެޝިން މިހާރު ވަނީ ޓްރާންސިޓްގައި އިންޑިއާގައި ކަމަށެވެ. އަންނަ ހަފުތާތެރޭގައި އެ މެޝިންތައް ލިބޭނެކަން މަބްރޫކް ފާގަކުރެއްވިއެވެ.
