މެންބަރުންނާއި އެއްވަރުގެ މުސާރައެއް ދިނުމަށް އީވާ އެދިވަޑައިގެންފި
21 މެއި 2020 | ބުރާސްފަތި 17:20އީވާގެ މުސާރަ ކުޑަކުރުމަށް މަޖިލީހުން ވަނީ ނިންމާފައި
ރައްޔިތުންގެ މަޖިލީހުގެ ނައިބް ރައީސް އީވާ އަބްދުﷲ
ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲއަށް މެންބަރުންނާއި އެއްވަރުގެ މުސާރައެއް ދެއްވުމަށް އެދިވަޑައިގެންފި އެވެ.
ބުރާސްފަތި ދުވަހުގެ ރޭ ރައްޔިތުންގެ މަޖިލީހުން ކޮށްފައިވާ ޓްވީޓެއްގައި ވަނީ މަޖިލީހުގެ ނައިބު ރައީސް އީވާ ޢަބްދުﷲ އަށް މެންބަރުންނާއި އެއްވަރުގެ މުސާރައެއް ދެއްވުމަށް އެދިވަޑައިގެންފައި ވާތީ އެގޮތަށް ޢަމަލުކުރުމަށް ނިންމާފައިވާ ކަމަށެވެ.
ބުދަ ދުވަހު ބޭއްވި މަޖިލީހުގެ ޖަލްސާގައި ރައްޔިތުންގެ މަޖިލީހުން ކަނޑައަޅަން ޖެހޭ މުސާރަތައް ކޮވިޑް-19އާ ގުޅިގެން ކުޑަކުރުމަށް 18 މާރޗު 2020 ގައި ނިންމަވާފައިވާ ނިންމުމަށް އަލުން މުރާޖަޢާ ކުރުމުގެ މައްސަލަ، މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓު ވަނީ ފާސްކޮށްފަ އެވެ.
ރިޕޯޓުގައި ވާގޮތުން ރައްޔިތުންގެ މަޖިލީހުގެ ނައިބު ރައީސްގެ މުސާރަ 91,000ން 75,700 ރުފިޔާއަށް ކުޑަކުރުމަށް ވަނީ ނިންމާފައެވެ. އިވާގެ މިހާރުގެ އަސާސީ މުސާރައަކީ 51،000 އެވެ.
މަޖިލީހުގެ މެންބަރެއްގެ އަސާސީ މުސާރައިގެ ގޮތުގައި 42،500 ރުފިޔާ ލިބިވަޑައިގަންނަވަ އެވެ. އަދި ލިވިން އެލަވެންސާއި ކޮމިޓީ އެލަވެންސާއެކު ޖުމުލަ މުސާރައިގެ ގޮތުގައި މެންބަރަކަށް 82،500 ރުފިޔާ ލިބިވަޑައިގަންނަވަ އެވެ. ރިޕޯޓުގައިވާ ގޮތުން 30،000 އާއި 60،000 އާއި ދެމެދުގެ މުސާރަ ލިބޭ ފަރާތްތަކުގެ މުސާރައިން %30 ކުޑަކުރަން ވަނީ ނިންމާފަ އެވެ. އެހެންކަމުން މެންބަރަކަށް ޖުމުލަ މުސާރައިގެ ގޮތުގައި ލިބިވަޑައިގަންނަވާނީ 69،750 ރުފިޔާއެވެ.
