އިޖުތިމާއީ ގައިދުރުކަން ކާމިޔާބު: ގައިންގަޔަށް އަރާ ބަލިތައް ފެތުރޭ މިންވަރު ދަށަށް
އަރިދަފުސް ރޯގާ ރިޕޯޓްކުރެވޭ މިންވަރުވެސް ދަށް
ޑރ. އިބްރާހިމް އަފްޒަލް: ގައިދުރުކުރުން އިސްކުރުމުން ގައިންގަޔަށް އަރާ ބަލިތައް ރިޕޯޓް ކުރެވޭ އަދަދު މަދު ކަމަށް ވިދާޅުވި
މާލެ 'ލޮކްޑައުން' ކޮށްފައިވާ މި ދަނޑިވަޅުގައި ގައިދުރުކުރުމަށް އިސްކަން ދިނުމުން، ވޭތުވެދިޔަ ތިން އަހަރާއި އަޅާބަލާއިރު މިއަހަރުގެ މި މުއްދަތުގައި ގައިންގަޔަށް އަރާ ބަލިތައް ރިޕޯޓު ކުރެވޭ އަދަދު ދަށްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އެޕީޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވެއްޖެ އެވެ.
ނެޝަނަލް އިމަރޖެންސީ އޮޕަރޭޝަން ސެންޓަރުގައި އަންގާރަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވަނީ، ފާއިތުވި ތިން އަހަރާއި މި އަހަރުގެ މިހާތަނަށް ގައިން ގަޔަށް އަރާ ބަލިތައް ރިޕޯޓުކުރެވޭ އަދަދު ދައްކުވައިދޭ ގްރާފެއް ހިއްސާ ކުރައްވާފަ އެވެ.
ޑރ. ވިދާޅުވީ، ފާއިތުވި ތިން އަހަރާއި އަޅައި ބަލާއިރު ފެންނަނީ މި އަހަރުގެ މި މުއްދަތުގައި ގައިންގަޔަށް އަރާ ބަލިތަަކުގެ ޓްރެންޑް ވަރަށް ބޮޑަށް ތިރިވެފައިވާ ތަން ކަަަމަށެވެ. އެގޮތުން އެކި ކަހަލަ ރޯގާތަކާއި، ހުން ރިޕޯޓު ކުރެވޭ މިންވަރުވެސް ދަށްވެފައިވާ ކަމަށެވެ.
ރޯދަ މަހަކީ ބޭރަށް ހިނގުން އިތުރުވާ ދުވަސްވަރަކަށް ވާއިރު، މި ފަހަރުގެ ރޯދަ މަހު ބޭރަށް ހިނގުން މަދުވެފައިވާކަން ޑރ. އަފްޒަލް ދިވާޅުވި އެވެ. އެއީ ބޭރުން ނުކައި، ގައިދުރުކުރުމަށް އިސްކަންދޭތީ ކަމަށް އޭނާ ފާހަގަކުރެއްވި އެވެ.
