ގަލްފް ކަނޑުގެ ސަރަހައްދުގައި އެމެރިކާގެ އަދި އިރާނުގެ މަނަވަރުތަކުގެ ކޯޅުން ބޮޑު ވެއްޖެ
އީރާންގެ 11 މަނަވަރެއް އެމެރިކާ މަނަވަރުތަކާ ވަރަށް ބޮޑަށް ކައިރިވެފައިވޭ
އެމެރިކާގެ ސިފައިންގެ މީހެއް ދުރުމީ އަޅާގެން އެސަރަހައްދު މޮނިޓަރ ކުރަނީ
ގަލްފް ކަނޑުގެ ސަރަހައްދުގައި ހަރަކާތްތެރިވަމުންދާ އެމެރިކާގެ މަނަވަރުތަކާ ކައިރިން އީރާންގެ މަނަވަރުތައް ދުއްވުމުން މައްސަލަ ހޫނުވެއްޖެ އެވެ.
ރިޕޯޓުތައް ބުނާ ގޮތުން މިމަހުގެ 13 ވީ ބުދަ ދުވަހު ގަލްފް ކަނޑުގެ ސަރަހައްދުގައި ހަރަކާތްތެރިވަމުންދާ އީރާންގެ 11 މަނަވަރެއް އެމެރިކާ މަނަވަރުތަކާ ވަރަށް ބޮޑަށް ކައިރިން ދުއްވާ އެމެރިކާ މަނަވަރުތަކަށް އުނދަގޫ ކޮށްފައިވާ ކަމަށެވެ.
އީރާނުގެ ސިފައިންގެ ދެން އެފަދަ ގޮތަކަށް އަމަލުކޮށްފިނަމަ ހަމަލާ ދިނުމަށް ފަސް ނުޖެހޭނެ ކަމަށް އެމެރިކާއިން ވަނީ ބުނެފަ އެވެ.
އެމެރިކާގެ ނޭވީއިން މިމައްސަލާ ގުޅިގެން ނެރިފައިވާ އިންޒާރުގެ މެސެޖްގައި ބުނެފައިވަނީ އެމެރިކާގެ މަނަވަރުތަކާއި 100 މީޓަރަށްވުރެ ކައިރި ވެއްޖެ ނަމަ އެކައިރިވާ އުޅަނދާ ދެކޮޅަށް ހަމަލާ ދޭން ޖެހިދާނެ ކަމަށެވެ.
މިކަން މިހެން ހިނގާފައިވާއިރު، މިދިޔަ މަހު އެމެރިކާގެ ރައީސް ޑޮނަލްޑް ޓްރަމްޕް ވަނީ އެމެރިކާގެ މަނަވަރުތަކާއި އީރާނުގެ މަނަވަރުތައް ކައިރި ވެއްޖެ ނަމަ ހަމަލާ ދިނުމުގެ ހުއްދަ ދީފަ އެވެ.
