ޗައިނާ އިން ހޯމަ ދުވަހު ރިޕޯޓު ކުރީ އެންމެ 6 ކޭސް ކަމަށް އެ ޤައުމުގެ ނެޝަނަލް ހެލްތު ކޮމިޝަނުން ބުނެފި އެވެ.

އެ ކޮމިޝަނުން ބުނީ ލޯކަލް ޓްރަންސްމިޝަން އާއި ގުޅުން ހުރި ދެ ކޭސް ފެނިފައިވަނީ ޗައިނާގެ ޖިލިންގް ޕްރޮވިންސުންނާއި މި ބަލި އެންމެ ފުރަތަމަ ފެނުނު ޗައިނާގެ ހޫބެއި ޕްރޮވިންސްގެ ވޫހާން ސިޓީން ނެވެ. ހަމައެއާއެކު، އެއްވެސް އަލާމާތެއް ނެތް 17 މީހެއް ވައިރަހަށް ޕޮޒިޓިވްވެފައިވާ ކަމަށެވެ.

މިއާއެކު ޗައިނާއިން ރިޕޯޓު ކުރެވުނު ކޭސްތަކުގެ ޢަދަދު ވަނީ 82,960 (އަށްޑިހަ ދެހާސް ނުވަސަތޭކަ ފަސްދޮޅަސް) ށް އަރާފައެވެ. މީގެ ތެރެއިން 78,241 (ހަތްދިހަ އަށްހާސް ދުއިސައްތަ ސާޅީސް އެކެއް) މީހުން ވަނީ ފަރުވާ ދީގެން ބަލިން ފަސޭހަވެފައެވެ.

މިހާރު ޗައިނާއިން ކޮވިޑް-19 އަށް ފަރުވާދެމުން ދަނީ 85 މީހަކަށެވެ.

ގިނަ ދުވަސްތަކަކަށް ފަހު، ވޫހާން ސިޓީން ކޮވިޑް-19 ޖެހިފައިވާ ބަޔަކު ފެނުމާއި ގުޅިގެން އެ އަވަށުގެ އާބާދީ އެއްކޮށް ޓެސްޓުކުރުމުގެ މަސައްކަތް ޗައިނާ ސަރުކާރުން ފަށާފައި ވާއިރު ލޯކަލީ ޓްރާންސްމިޓެޑް ކޭސްތަކެއް ވަނީ ފެންމަތިވެ ފައެވެ. މޭ މަހުގެ 12 ވަނަ ދުވަހުން ހޯމަ ދުވަހުގެ ނިޔަލަށް ވޫހާން ސިޓީން 854,606 (އަށްލައްކަ ފަންސާސް ހަތަރުހާސް ހަސަތޭކަ ހައެއް) މީހުން ވަނީ ޓެސްޓު ކުރެވިފައެވެ.