މަސައްކަތުގެ ތަމްރީނު ލިބިފައިވާ ޒުވާން ޖީލެއް ބިނާ ކުރުމަށް ސްކިލް ޑިވޮލެޕްމެންޓް މާސްޓަރ ޕްލޭނެއް ތައްޔާރުކުރަނީ
18 މެއި 2020 | ހޯމަ 12:30މި މަސައްކަތަކީ ދިވެހިރާއްޖޭގެ އިޤްތިސޯދު ހިންގުމުގައި ޒުވާނުންގެ ހަކަތަ އިތުރުކުރުމަށް ކުރެވޭ ކަމެއް
މިނިސްޓަރ އޮފް ހަޔަރ އެޑިއުކޭޝަން ޑރ އިބްރާހިމް ހަސަން ޖަލްސާއެއްގައި ވާހަކަ ދައްކަވަނީ
ނެޝަނަލް ސްކިލް ޑިވެލޮޕްމަންޓް މާސްޓަރ ޕްލޭންއެއް ތައްޔާރުކުރުމަށް، މިނިސްޓްރީ އޮފް ހަޔަރ އެޑިޔުކޭޝަނާއި، ނެޝަނަލް ސްކިލް ޑިވެލޮޕްމަންޓް ކޯރޕަރޭޝަން، އިންޑިޔާ އާއި އެކު ފަހުމުނާމާއެއްގައި ސޮއިކޮށްފި އެވެ.
މިކަމާއި ގުޅިގެން ހަޔަރ އެޑިއުކޭޝަން މިނިސްޓްރީން ޢާންމުކޮށްފައިވާ ނޫސްބަޔާނެއްގައި ބުނެފައި ވަނީ، 2020 ވަނަ އަހަރުގެ 3 ވަނަ ކުއާޓަރއަށް ދާއިރު، 5 އަހަރު ދުވަހަށް ޕްލޭން ކުރެވިގެން ހެދޭ މި މާސްޓަރ ޕްލޭން ފުރިހަމަކޮށް ނިންމޭނެ ކަމަށް ސަރުކާރުން ލަފާކުރާ ކަމަށެވެ. އަދި ނެޝަނަލް ސްކިލް ޑިވެލޮޕްމަންޓް ޕްލޭން ތައްޔާރު ކުރެވިގެން ދާނީ ދިވެހި ސަރުކާރުގެ ޤައުމީ ތަރައްޤީގެ ޕްލޭނާއި 2019-2023 ސްޓްރެޓެޖިކް އެކްޝަން ޕްލޭނުގައި ޙާޞިލު ކުރުމަށް ކަނޑައެޅިފައިވާ ލަނޑުދަނޑިތަކާއި، ސިޔާސަތުތަކާއި އެއްގޮތަށް ކަމަށެވެ. މި މަޝްރޫޢަށް ޚަރަދުކުރާނީ މިނިސްޓްރީ އޮފް ހަޔަރ އެޑިޔުކޭޝަނާއި ވަރލްޑް ބޭންކާއެކު ހިންގާ މީރީ ޕްރޮޖެކްޓްގެ ތެރެއިން ކަމަށް ހަޔަރ އެޑިއުކޭޝަން މިނިސްޓްރީން ބުނެއެވެ.
ދިވެހިރާއްޖެއަށް ބޭނުންވާ ހުނަރުވެރި، މަސައްކަތުގެ ތަމްރީނު ލިބިފައިވާ ޒުވާން ޖީލެއް ބިނާ ކުރުމަށް ދިވެހި ސަރުކާރުގެ އިސް ނެގުމާއެކު ފަށާ މި މަޝްރޫޢު ވެގެންދާނީ ދިވެހިރާއްޖޭގެ އިޤުތިޞާދު ހިންގުމުގައި ޒުވާނުންގެ ހަކަތަ އިތުރު ކުރެވި ވަޒީފާގެ ބާޒާރުގައާއި ވިޔަފާރި ކޮށްގެން ނަފާ ހޯދުމަށް ދިވެހި ޒުވާނުންނަށް ގިނަގުނަ ފުރުޞަތުތަކެއް ފަހިވެގެންދާނެ މަޝްރޫޢަކަށެވެ.
މި މަޝްރޫޢު ކުރިއަށްދާނީ ސްޓިއަރިންގް ކޮމިޓީއެއް އެކުލަވާލެވި، މި ކޮމިޓީގެ ލަފައާއި މަޝްވަރާގެ މަތިންކަމަށް ބަޔާނުގައި ވެއެވެ. ނެޝަނަލް ސްކިލް ޑިވެލޮޕްމަންޓް ކޯރޕަރޭޝަން މަސައްކަތްކުރަމުން ދާނީ ދިވެހިރާއްޖޭގެ ޓިވެޓް އޮތޯރިޓީއާއި އެކުގައެވެ. އަދި މި މާސްޓަރ ޕްލޭން ތައްޔާރު ކުރެވިގެން ދާއިރު އެކި ދާއިރާތަކުގެ ކަމާއި ގުޅުންހުރި ސަރުކާރުގެ މުއައްސަސާތަކާއި، އަމިއްލަ ފަރާތްތަކާއެކުގައި ވެސް މަޝްވަރާ ކުރެވިގެންދާނެ އެވެ. އަދި މި ކޮންސަލްޓަންސީ ކުރިއަށް ދާނީ 2 ފިޔަވައްސަކަށް ބަހާލެވިގެންނެވެ. ފުރަތަމަ ފިޔަވަހީގައި މަސައްކަތް ކުރާނީ ފަންނީ ދާއިރާ އެނަލައިޒް ކުރުމަށާ،އި ދިރާސާއަށެވެ. އަދި ދެވަނަ ފިޔަވަހީގައި ކުރިޔަށް ދާނީ މާސްޓަރ ޕްލޭން ތައްޔާރު ކުރުމާއި، ސްޓްރެޓެޖީތައް އެކަށައެޅުމުގެ މަސައްކަތް ކަމަށް ބަޔާނުގައި ވެއެވެ.
