މިނިސްޓްރީތަކުގެ މަސައްކަތްތަކުގެ މައުލޫމާތު އެންމެ ފުރިހަމައަށް ރައްޔިތުންނަށް ފޯރުކޮށްދީފައެއް ނުވޭ: ކޮމިޓީ ރިޕޯޓު
ހަތް ހުށަހެޅުމެއްވޭ
ސަރުކާރުގެ މައްސޫލިއްޔަތު އަދާ ކުރާ ކޮމިޓީގެ މުގައްރިރު އަދި މާފަންނު ހުނޅަގު ދާއިރާގެ މެމްބަރު މުޙައްމަދު ފަލާޙް
މިނިސްޓްރީތަކުން ދެމުންގެންދާ ޚިދުމަތްތަކާ ގުޅޭގޮތުން ރައްޔިތުންގެ ޝަކުވާ ހުށަހެޅުމުގެ ނިޒާމެއް ޤާއިމުކުރުމަށް ގޮވާލާ ރައްޔިތުންގެ މަޖިލީހުގެ ސަރުކާރުގެ މައްސޫލިއްޔަތު އަދާ ކުރާ ކޮމިޓީގެ ރިޕޯޓު ހުށަހަޅައިފި އެވެ.
ހޯމަ ދުވަހުގެ ޖަލްސާއަށް މި ރިޕޯޓު ހުށަހަޅުއްވައިދެއްވީ ކޮމިޓީގެ މުޤައްރިރު އަދި މާފަންނު ހުނޅަގު ދާއިރާގެ މެންބަރު މުޙައްމަދު ފަލާޙް އެވެ.
ކޮވިޑް -19 އާއި ގުޅިގެން އަޅަމުންދާ ފިޔަވަޅުތަކުގެ ސަބަބުން ސަރުކާރުން ހިންގުމަށް ނިންމާފައިވާ ޕްރޮގުރާމް ތަންފީޒުކުރުމަށް ރައްޔިތުންގެ މަޖިލީހުން ދެކޭ ގޮތް ކަނޑައެޅުމާ ގުޅޭ ގޮތުން ހުށަހެޅިފައިވާ މައްސަލައާ ގުޅިގެން ސަރުކާރު ގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން އެކުލަވާލި ރިޕޯޓުގައި ހަތް ކަމެއް ހުށަހަޅާފައި ވެއެވެ.
ކޮމެޓީން ކުރި ދިރާސާއިން ވަނީ މިނިސްޓްރީތަކުން "ކޮމިއުނިކޭޝަން ސްޓްރެޓެޖީ ޕްލޭން" އެއް އެކުލަވާލާފައި ނުވުމުގެ ސަބަބުން ދަތިތަކާއި ކުރިމަތިލާން ޖެހިފައިވާކަމަށް އެނގި ފައެވެ. އެހެންކަމުން ކޮމެޓީން ހުށަހަޅާފައި ވަނީ "ކޮމިއުނިކޭޝަން ސްޓްރެޓެޖީ ޕްލޭން" އެއް އެކުލަވާލައި، އެ ޕްލޭނާ އެއްގޮތަށް މިނިސްޓްރީތަކުން ފޯރުކޮށްދޭ ޚިދުމަތްތައް ރައްޔިތުންނާ ޙިއްޞާކުރެވޭނެ ގޮތްތަކެއް އެކަށައަޅައި، އެ މަޢުލޫމާތު މީޑިއާގެ ވަޞީލަތްތައް މެދުވެރިކޮށް ރައްޔިތުންނަށް ފޯރުކޮށްދިނުމަށެވެ.
މީގެއިތުރުން ޢާންމު ޞިއްޙަތުގެ ކުއްލި ނުރައްކަލުގެ ޙާލަތާ ގުޅިގެން ސަރުކާރު ބަންދުކޮށްފައިވާ ދުވަސްވަރުގައި މިނިސްޓްރީތަކުން ދެމުންދާ މަސައްކަތްތަކުގެ އެންމެ ފުރިހަމަ މަޢުލޫމާތު ރައްޔިތުންނަށް ފޯރުކޮށްދީފައި ނުވާކަމަށް ކޮމިޓީން ވަނީ ފާހަގަކޮށްފަ އެވެ. އަދި މި ދަނޑިވަޅަކީ ރައްޔިތުންނަށް ލުއިފަސޭހަކަމާއެކު ޚިދުމަތްތަކެއް ފޯރުކޮށްދޭންވީ ވަގުތެއްކަމުން، ސަރުކާރުގެ ވުޒާރާތަކުން ޚިދުމަތް ފޯރުކޮށްދިނުމަށް ހަމަޖެހިފައިވާ އުޞޫލުތައް ހަމައެކަނި ގެޒެޓުގައި ޝާއިޢު ކުރުމުގެ ބަދަލުގައި މީޑިއާގެ ވަޞީލަތްތައް މެދުވެރިކޮށް އެ މަޢުލޫމާތު ރައްޔިތުންނާ ޙިއްޞާކުރެވޭނެ ގޮތްތަކެއް ރޭވިފައި އޮތުން މުހިންމުކަމަށް ކޮމެޓީން ދެކެއެވެ.
ކޮމެޓީން ވަނީ މިނިސްޓްރީތަކުން ދެމުންގެންދާ ޚިދުމަތްތަކާއި ހުއްޓިފައިވާ ޚިދުމަތްތަކާއި ބެހޭ މަޢުލޫމާތު ފޯރުކޮށްދިނުމަށް ކޮންމެ މިނިސްޓްރީއަކުން ފޯކަލް ޕޮއިންޓެއް ހަމަޖައްސައި އެ މަޢުލޫމާތު ރައްޔިތުންނާ ޙިއްޞާކުރުމަށް ހުށަހަޅާފައެވެ. އަދި މިދުވަސްވަރު ޚިދުމަތް ލިބިގަންނަ ފަރާތްތަކަށް ލުއިފަސޭހަ ގޮތްތަކެއް ޤާއިމުކުރުމަށާއި މިނިސްޓްރީތަކުން ދެމުންގެންދާ ޚިދުމަތްތަކާ ގުޅޭގޮތުން ރައްޔިތުންގެ ޝަކުވާ ހުށަހެޅުމުގެ ނިޒާމެއް ޤާއިމު ކުރުމަށްވެސް ހުށަހަޅާފައި ވެއެވެ.
ސަރުކާރުގެ މައްސޫލިއްޔަތު އަދާ ކުރާ ކޮމެޓީން ހުށަހަޅާފައިވާ އިތުރު ކަންކަމުގެ ތެރޭގައި އެސް.އޯ.ޕީތަކުގައި ބަޔާންކޮށްފައިވާ ގޮތަށް މިނިސްޓްރީތަކުން ޢަމަލު ކުރަމުންދޭތޯ ކަށަވަރުކުރުމުގެ ގޮތުން މިނިސްޓްރީތަކާ ބައްދަލުކޮށް މިނިސްޓްރީތައް ޖަވާބުދާރީ ކުރުވުމާއި ރައްޔިތުންނަށް ބޭނުންވާ އެންމެ އަސާސީ ޚިދުމަތްތައް މެދު ނުކެނޑި ދިނުމަށް ބޭނުންވާ އެންމެ މަދު މުވައްޒަފުން މަސައްކަތަށް ނެރެގެން އެ ޚިދުމަތް ދެވޭނެ އިންތިޒާމު ހަމަޖެއްސުން ވެސް ހިމެނެއެވެ. އަދި ސަރުކާރާއި ސަރުކާރު ޙިއްޞާވާ ކުންފުނިތަކުގެ ޚަރަދު ކުޑަކުރުމަށް އިސްކަންދީ، ޚަރަދު ކުޑަކުރެވޭނެ ދާއިރާތައް ފާހަގަކޮށް، އެއާ އެއްގޮތަށް މިނިސްޓްރީތަކާއި ސަރުކާރު ޙިއްޞާވާ ކުންފުނިތަކުގެ ބަޖެޓު އަލުން އެކުލަވާލުމަށް ވެސް ހުށަހަޅާފައި ވެއެވެ.
