ބިލް ތައްޔާރުކުރުމަށް މިމަހުގެ 23 ކުރިން މީޓަރުގެ ފޮޓޯ ފޮނުވައިދިނުމަށް ސްޓެލްކޯއިން އެދިއްޖެ
17 މެއި 2020 | އާދީއްތަ 16:24ފޮޓޯ ނުފޮނުވޭ މީހުންނަށް ލިބޭނީ އެވްރެޖް ބިލެއް
ސްޓޭޓް އިލެކްޓްރިކް ކޮމްޕެނީ ލިމިޓެޑުން ވަނީ ރައްޔިތުންގެ ފަރާތުން ލިބޭ އެއްބާރުލުން ވަނީ ފާހަގަކޮށްފައި
މެއި މަހުގެ ކަރަންޓު ބިލް ތައްޔާރުކުރުމަށް މިމަހުގެ 23 ކުރިން މީޓަރުގެ ފޮޓޯ ފޮނުވައިދިނުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އެދިއްޖެ އެވެ.
ސްޓެލްކޯއިން ބުނީ އެދިފައިވާގޮތަށް މި މަހުގެ 23 ވަނަ ދުވަހުގެ ކުރިން ރީޑިންގ ނެގުމަށް މީޓަރުގެ ފޮޓޯ ވެބް ޕޯޓަލްhttps://stelco.com.mv/smrމެދުވެރިކޮށް ނުފޮނުވޭ ފަރާތްތަކަށް ލިބޭނީ އެވްރެޖް ބިލެއް ކަމަށެވެ.
ސްޓެލްކޯއިން ބުނީ ކޮވިޑް-19 އާ ގުޅިގެން އިއުލާން ކޮށްފައިވާ ފުރަބަންދުގެ މުއްދަތުގައި މީޓަރުގެ ރީޑިންގ ނަގަން ގޭގެއަށް ވަދެ އުޅުމަކީ ގޭގޭތަކުގެ މީހުންނަށާއި، ކުންފުނީގެ މުވައްޒަފުންނަށް ވެސް ރައްކާތެރި ގޮތަކަށް މި ހާލަތުގައި ނުވާތީ، ނިމިދިޔަ އެޕްރީލް މަހުވެސް މީޓަރުގެ ފޮޓޯ ނަގައި ކުންފުނީގެ ވެބް ޕޯޓަލް www.stelco.com.mv/smr މެދުވެރިކޮށް ފޮނުވުމަށް އެދިފައިވާ ކަމަށެވެ.
ކޮވިޑް-19އާ ގުޅިގެން މާލެ ސަރަހައްދުގެ ހާލަތު އިތުރަށް ގޯސްވެފައިވާތީ މިހިނގާ މެއި މަހު ވެސް ބިލް ތައްޔާރު ކުރުމަށް މީޓަރުގެ ފޮޓޯ ނަގާ، މިމަހުގެ 23 ވަނަ ދުވަހުގެ ކުރިން އެ ފޮޓޯތައް ކުންފުނީގެ ވެބް ޕޯޓަލް ފޮނުވާ ދިނުމަށް އެދޭ ކަމަށެވެ.
ފޮޓޯ ފޮނުވުމުގައި ކުންފުނީގެ ސޯޝަލް މީޑިއާ ޕްލެޓްފޯމްތަކަށް ފޮނުވުމުގެ ބަދަލުގައި ވެބް ޕޯޓަލް ބެނުން ކުރުމަށް ސްޓެލްކޯއިން ވަނީ އިލްތިމާސްކޮށްފަ އެވެ. މި ޚާއްސަ ހާލަތުގައި އެންމެންގެ ރައްކާތެރިކަމަށް، ބިލަށް ފައިސާ ދެއްކުމަށް ކުންފުނީގެ އެޕްލިކޭޝަނާއި، ވެބްސައިޓް ބޭނުން ކުރުމަށް ވެސް ވަނީ އިލްތިމާސްކޮށްފަ އެވެ.
މިފަދަ ކަންކަމުގައި ކަސްޓަމަރުންގެ ފަރާތުން ލިބޭ އެއްބާރުލުން ފާހަގަކޮށް އިތުރަށް އެހީތެރިކަން ދިނުމަށް ސްޓެލްކޯއިން އެދިފައި ވެއެވެ.
