އާ ހިތްވަރަކާއެކު ތަމްރީނު ދޭ ތަންތަން މަސައްކަތް ކުރަންޖެހޭ: ނައިބް ރައީސް
17 މެއި 2020 | އާދީއްތަ 07:12ތައުލީމީ ދާއިރާގެ އިސްފަރާތްތައް ބައިވެރިވެ ވަޑައިގެންނެވި
ތައުލީމީ ދާއިރާގައި ހިމެނޭ ފަރާތްތަކާއި އެކު ނައިބް ރައީސް ބޭއްވެވި މަޝްވަރާ ބައްދަލުވުމުގެ ތެރެއިން
ކޮވިޑް-19 އާއި ގުޅިގެން އައި ބަދަލާއެކު އާ ހިތްވަރަކާއެކު، ރާއްޖޭގައި ހުރި މީހުން ބިނާކޮށް ތަމްރީނުދޭ ހުރިހާ ތަންތަން އެކުވެގެން މަސައްކަތްތަކެއް ކުރަންޖެހިފައިވާ ކަމަށް ނައިބް ރައީސް ފައިސަލް ނަސީމް ވިދާޅުވެއްޖެ އެވެ.
ނައިބް ރައީސް އެހެން ވިދާޅުވީ، ތައުލީމީ ދާއިރާ އަދި މަތީ ތައުލީމުގެ ދާއިރާގެ އިސްފަރާތްތަކާއި އެކު ހޮނިހިރު ދުވަހު އޮންލައިންކޮށް ބޭއްވި މަޝްވަރާ ބައްދަލުވުމުގަ އެވެ.
ރައީސް އޮފީހުން ބުނީ، އެ ބައްދަލުވުމުގައި މަޝްވަރާ ކޮށްފައިވަނީ ކޮވިޑް-19 އާ ގުޅިގެން އަޅާފައިވާ ފިޔަވަޅުތަކާއެކު ތައުލީމީ ދާއިރާ އާއި މަތީ ތައުލީމުގެ ދާއިރާއަށް ކުރިމަތިވެފައިވާ ދަތިތަކާ ބޭހޭ ގޮތުންނާއި، މި ހަލާތުގައި އެންމެ ބޮޑަށް އިންސާނީ ވަސީލަތްތައް ބޭނުންވެފައިވާ ދާއިރާތަކުން މީހުން ތަމްރީނުކުރުން ފަދަ ކަންކަމާ ބެހޭގޮތުން ކަމަށެވެ.
އަދި، މި ހާލަތުގައި ތައުލީމީ ދާއިރާއާއި މަތީ ތައުލީމުގެ ދާއިރާގެ ކުދިންގެ ކިޔެވުން ކުރިޔަށް ގެންދިއުމަށް ރޭވިފައިވާ ގޮތްތަކާ ބެހޭ ގޮތުންވެސް ބައްދަލުވުމުގައި މަޝްވަރާކުރެވުނު ކަަމަށް ރައީސް އޮފީހުން މައުލޫމާތު ދިނެވެ.
އަދި މުޖުތަމައުގައި ތިބި މަސައްކަތްކުރެވޭ އުމުރުގެ އެންމެންނަކީ މަސައްކަތެއްކުރާ ބަޔަކަށް ވުމުގެ މުހިންމުކަމާއި، ރިޓަރޔަރ ކޮށްފައިވާ ސިއްހީ ދާއިރާގެ ބައެއް ފަރާތްތަކަށްވެސް އިތުރަށް ބޭނުންވާ ތަމްރީނުދީ އަލުން މަސައްކަތުގެ މާހައުލާ ގުޅުމަށް ފުރުސަތު ފަހިކޮށްދިނުމުގެ މުހިންމު ކަމުގެ މައްޗަށް އެމަނިކުފާނު ވަނީ އަލިއަޅުއްވާލައްވާފަ އެވެ.
މަޝްވަރާ ބައްދަލުވުމުގައި ހަޔަރ އެޑިޔުކޭޝަން މިނިސްޓަރު ޑރ. އިބްރާހީމް ޙަސަންއާއި، އެޑިއުކޭޝަން މިނިސްޓަރު ޑރ. އައިޝަތު އަލީއާއި، އިސްލާމިކް މިނިސްޓާރު ޑރ. އަޙްމަދު ޒާހިރުގެ އިތުރުން ގައުމީ ޔުނިވަރސިޓީއާ ރާއްޖޭގެ އިސްލާމީ ޔުނިވަރސިޓީގެ އިސްވެރިން، އަދި މަތީ ތައުލީމާ ގުޅޭ އެހެން ބައެއް އިދާރާތަކުގެ އިސްވެރިން ބައިވެރިވެ ވަޑައިގެންނެވި އެވެ.
