ރާއްޖެއިން ޕޮޒިޓިވްވި މާބަނޑު މީހާ ވިހެއި ދަރިފުޅު ނެގެޓިވް!
16 މެއި 2020 | ހޮނިހިރު 18:28ދަރިފުޅު ކޮވިޑް-19 އަށް ޓެސްޓްކުރިއިރު، ނަތިޖާ ނެގެޓިވް
ޑރ ނަޒްލާ ރަފީޤް- ޑޮކްޓަރ ވަނީ މާބަނޑު މީހާ ވިހެއި ދަރިފުޅުގެ ނަތީޖާ ނެގެޓިވްކަން ކަށަވަރު ކޮށްދެއްވާފައި
ކޮވިޑް-19 އަށް ޕޮޒިޓިވްވެގެން ޓްރީޓޮޕް ހޮސްޕިޓަލަށް ބަދަލުކުރި މާބަނޑު މީހާ ވިހެއި ދަރިފުޅު ނެގެޓިވްކަން ކޮވިޑް-19 ޓާސްކްފޯހުން ހާމަކޮށްފި އެވެ.
ހޮނިހިރު ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ޑރ. ނަޒްލާ ރަފީޤް ވިދާޅުވީ، ރާއްޖެއިން ކޮވިޑް-19 އަށް ޕޮޒިޓިވްވި މާބަނޑު މީހާ ވިހެއި ދަރިފުޅު ކޮވިޑް-19 އަށް ޓެސްޓްކުރިއިރު، ނަތިޖާ ނެގެޓިވްވެފައިވާ ކަމަށެވެ.
އިންދިރާ ގާންދީ މެމޯރިއަލް ހޮސްޕިޓަލުގައި އޮތް މި އަންހެން މީހާގެ ސާމްޕަލް ނަގާފައިވަނީ ރެންޑަމް ސާމްޕްލިންގެ ތެރެއިންނެވެ. އަދި ނަތީޖާ ޕޮޒިޓިވްވުމާއެކު އޭނާ ޓްރީޓޮޕް ހޮސްޕިޓަލަށް ގެންދެވުނު ނަމަވެސް، ޖުމުލަކޮށް އޭނާގެ ޙާލު ރަނގަޅުކަން ޑޮކްޓަރުން ވަނީ ފާހަގަކޮށްފަ އެވެ.
މިފަދަ ކޭސްތަކާ ގުޅޭގޮތުން ދުނިޔޭގެ ސިއްޙަތު ޖަމިއްޔާއިން ބުނެފައިވާ ގޮތުގައި، ވިހެއުމުގެ ތެރޭގައި ނުވަތަ މާބަނޑު ދުވަސްވަރު މައިމީހާގެ ފުށުން ދަރިފުޅަށް ވައިރަސް ވާސިލުވާކަން ނުވަތަ ނޫންކަން މިހާތަނަށް ކަށަވަރުވެފައެއް ނުވެ އެވެ. އެހެން ނަމަވެސް ދަރިފުޅު ރަހިމުގައި އޮންނަ "އެމްނިއޮޓިކް ފްލުއިޑް" ތެރެއިންނާއި، ގާތުންދޭ ކިރުން މިހާތަނަށް ވައިރަސް ފެނިފައި ނުވާކަމަށް އެ ޖަމިއްޔާއިން ބުނެ އެވެ.
އޭގެ އިތުރުން، މާބަނޑު މީހުންގެ ތެރެއިން އަލާމަތްތައް ހުންނަ މީހުން ކޮވިޑް-19 އަށް ޓެސްޓް ކުރުމަށް ޚާއްސަ އިސްކަމެއް ދިނުމަށްވެސް ދުނިޔޭގެ ސިއްޙަތު ޖަމިއްޔާއިން ވަނީ ގޮވާލާފަ އެވެ.
