ދަ ބެސްޓް ފީފާ ފުޓްބޯލް އެވޯޑްސް ފަސްކޮށްފި

އަންނަ ސެޕްޓެމްބަރު މަހު ބާއްވަން ނިންމާފައިވާ "ދަ ބެސްޓް ފީފާ ފުޓްބޯލް އެވޯޑްސް" ފަސްކޮށްފި އެވެ.

މި އަހަރުގެ ސެޕްޓެމްބަރު މަހުގެ 21 ވަނަ ދުވަހު އިޓަލީގެ މިލާނުގައި ބާއްވަން ތާވަލުކޮށްފައި އޮތް އެވޯޑްސް ހަފުލާ ފަސްކޮށްފައިވާ ކަން ފީފާ އިން ވަނީ އިއުލާން ކޮށްފައެވެ. އެކަމަކު ދެން އެވޯޑްސް ހަފުލާ ބާއްވާނެ ތާރީޚެއް އަދި ކަނޑައަޅާފައެއް ނުވެއެވެ.

މިއަހަރުގެ އެވޯޑްސް ހަފުލާ ވެސް މިލާނުގައި ބޭއްވުމަށް ފީފާ އިން ކުރިން ތާވަލުކުރިއިރު، މިދިޔަ އަހަރުގެ ހަފުލާ ވެސް ބާއްވާފައިވަނީ މިލާނުގައެވެ. އެކަމަކު ރިޕޯޓުތައް ބުނާ ގޮތުން ކޮރޯނާވައިރަސް (ކޮވިޑް-19) އާ ގުޅިގެން މި އަހަރުގެ ހަފުލާ އެހެން ގައުމެއްގައި ބޭއްވުމަށް ފީފާ އިން އަންނަނީ މަޝްވަރާ ކުރަމުންނެވެ. އިޓާލީ އަކީ ކޮވިޑް-19 ގެ އަސަރު އެންމެ ބޮޑަށް ކުރި އެއް ގައުމެވެ. އެކަމަކު އެ ގައުމުގެ ހާކަތު މިހާރު ރަނގަޅު ވަމުން އަންނައިރު، އިޓާލިއަން ލީގު ވެސް އަލުން ފަށަން މިހާރު އަންނަނީ ތައްޔާރު ވަމުންނެވެ.

ދަ ބެސްޓް ފީފާ ފުޓްބޯލް އެވޯޑްސް ދޭން ފެށީ 2016 ވަނަ އަހަރު އެވެ. އޭގެ ކުރިން ވެސް ފީފާ މޮޅު ކުޅުންތެރިޔާގެ އެވޯޑް ދެމުން އައި ނަމަވެސް، 2010ން 2015ށް ފީފާ އިން އެވޯޑް ދިނީ ފްރާންސް ފުޓްބޯލް މަޖައްލާއިން ދޭ ބަލޮންޑޯ އެވޯޑާ ގުޅިގެންނެވެ.

ފީފާ އިން ހޮވި މިދިޔަ އަހަރުގެ އެންމެ މޮޅު ކުޅުންތެރިޔާގެ މަގާމު ހޯދީ ބާސެލޯނާގެ ތަރި ލިއޮނަލް މެސީ އާއި އެމެރިކާގެ އަންހެން ޓީމުގެ މޭގަން ރެޕިނޯ އެވެ.