ކޮވިޑް-19 ފެތުރުން ހުއްޓުވުމުގެ ގޮތުން މާލެ ސިޓީގައި އިއުލާނު ކޮށްފައިވާ ފުރަބަންދުގެ އަމުރާ ޚިލާފުވެގެން ހުކުރު ދުވަހު ޖުމުލަ 128 މީހަކު ޖޫރިމަނާ ކޮށް، އިތުުރު 9 މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.

މޯލްޑިވްސް ޕޮލިސް ސަރވިސް އިން އާންމު ކޮށްފައިވާ ތަފާސް ހިސާބު ތަކަށް ބަލާއިރު، ހުކުރު ދުވަހު މާލެ ސިޓީން ޖުމުލަ 128 މީހަކު ޖޫރިމަނާ ކޮށްފައި ވެއެވެ. އެއާއެކު ފުރަބަންދު އަމުރާއި ޚިލާފުވެގެން މިހާތަނަށް ޖޫރިމަނާ ކުރި މީހުންގެ ޖުމުލަ ޢަދަދަކީ 4،020 އެވެ. މި އަދަދުތަކާއެކު މިހާތަނަށް ޖޫރިމަނާ ކޮށްފައިވާ ފަރާތްތަކުން ދައުލަތަށް ދައްކަން ޖެހޭ ފައިސާގެ އަދަދަކީ 4،020،000ރ ( ހަތަރު މިލިއަން ވިހި ހާސް ރުފިޔާ ) އެވެ. ފުރަބަންދު އަމުރާއިި ޚިލާފުވެގެން ޖޫރިމަނާ ކުރާ މީހުންގެ އަދަދު ދަނީ އިތުރުވަމުންނެވެ. މެއި މަހުގެ 15 ވަނަ ދުވަހުގެ ނިޔަލަށް ޖުމުލަ 219 މީހަކު ވަނީ ހައްޔަރުކޮށްފައެވެ.

ފުރަބަންދު އަމުރާ ޙިލާފުވާ ފަރާތްތައް ޖޫރިމަނާ ކުރަނީ 1000ރ. އިންނެވެ. މި އަމަލު ތަކުރާރު ކުރާނަމަ، ޤާނޫނުލް އުޤޫބާތުގެ 533 ވަނަ މާއްދާގެ (ހ) ދަށުން ހައްޔަރުކުރުމުގެ ބާރު ފުލުހުންނަށް ލިބެއެވެ.

ކުރިޔަށް އޮތް 2 ހަފުތާއަކީ މާލެ ސިޓީގައި ކޮވިޑް-19ގެ ބަލިމަޑުކަން އެންމެ ބޮޑަށް ފެތުރޭނެ ހަފުތާތައް ކަމަށް ޑޮކްޓަރުންގެ ޓީމުން އަންދާޒާކޮށްފައި ވާއިރު ގްރޭޓަރ މާލެ ސަރަހައްދު (މާލެ، ވިލިމާލެ، ހުޅުމާލެ، ގުޅީފަޅު) ގައި އިއުލާނު ކޮށްފައިވާ ލޮކްޑައުންގެ މުއްދަތު 14 ދުވަހަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ އިތުރުކޮށްފަ އެވެ.