ފިތުރު ޒަކާތުގެ ގޮތުގައި ދެ މިލިއަނަށް ވުރެ ގިނަ ރުފިޔާ ލިބިއްޖެ: މިނިސްޓްރީ
މިއަަހަރު މިހާތަނަށް 2،480،200ރ ލިބިފައިވޭ
މީގެ ކުރީގެ އަހަރެއްގައި ފިތުރު ޒަކާތް އިސްލާމިކް މިނިސްޓްރީގައި ބަލައިގަންނަނީ: ކޮވިޑް-19 އާ ގުޅިގެން މިއަހަރު ފިތުރު ޒަކާތް ބަލައިގަތުމަށް އޮންލައިން ޕޯޓަލް، އަދި ބައެއް ބޭންކްތަކާއި މޮބައިލް ހިދްމަ
ފިޠުރު ޒަކާތުގެ ގޮތުގައި މިހާތަނަށް ދެ މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު އަލީ ވިދާޅުވެއްޖެ އެވެ.
ދައުލަތުގެ މީޑިއާއިން ގެނެސް ދޭ ކޮވިޑް-19 ކަވަރޭޖްއަށް ދެއްވި އިންޓަވިއުގައި މިނިސްޓަރު ޒާހިރު ވިދާޅުވީ، މި އަހަރުގެ މިހާތަނަށް 2،480،200ރ (ދެ މިލިޔަން ހަތަރުލައްކަ އަށްޑިހަ ހާސް ދުއިސައްތަ ރުފިޔާ) ލިބިފައިވާ ކަމަށެވެ.
ކޮވިޑް-19ގެ މިހާލަތުގައި މާލެސިޓީ ސަރަހައްދުގައި ދިރިއުޅޭ ފަރާތްތަކުން، މިއަހަރުގެ ފިތުރު ޒަކާތް ދައްކާނީ އޮންލައިންކޮށް ކަމަށް އިސްލާމިކް މިނިސްޓްރީން ބުނެފައި ވެއެވެ.
އިސްލާމިކް މިނިސްޓްރީން ބުނެފައިވަނީ 1441 ވަނަ އަހަރު މާލެ ސިޓީ (މާލެ، ވިލިމާލެ، ހުޅުމާލެ) ދިރިއުޅޭ މީހުން ފިޠުރު ޒަކާތް ދެއްކުމަށް ފަސޭހަ އިންތިޒާމުތަކެއް ހަމަޖައްސާފައިވާ ކަމަށެވެ. އެގޮތުން 4 އޮންލައިން ފްލެޓްފޯމެއް ބޭނުންކޮށް ޒަކާތް ދެއްކޭނެ ކަމަށް މިނިސްޓްރީން ބުނެފައި ވެއެވެ.
އިސްލާމިކް މިނިސްޓްރީން ބުނެފައިވާ ގޮތުގައި، ދިރާގު ޕޭ އެންޑް ލައިފްސްޓައިލް އެޕްލިކޭޝަން އަދި އެސް.އެމް.އެސް މެދުވެރިކޮށް ޒަކާތް ދެއްކޭނެ ކަމަށާއި، އުރީދޫ އެމް ފައިސާ އެޕްލިކޭޝަން އަދި އެސް.އެމް.އެސް މެދުވެރިކޮށްވެސް ޒަކާތް ދެއްކޭނެ ކަމަށެވެ.
އޭގެއިތުރުން މޯލްޑިވްސް އިސްލާމިކް ބޭންކުން އޮންލައިން ބޭންކިންގ "ފައިސާ ނެޓް" އަދި މޯބައިލް ބޭންކިންގ "ފައިސާމޮބައިލް" މެދުވެރިކޮށް ފައިސާ ދެއްކޭނެ ކަމަށާއި، ބޭންކް އޮފް މޯލްޑިވްސްގެ ވެބްސައިޓް މެދުވެރިކޮށް ވެސް ފިތުރު ޒަކާތް ދެއްކޭނެ ކަމަށް އިސްލާމިކް މިނިސްޓްރީން ބުނެފައި ވެއެވެ.
މި ފަހަރު ފިތުރު ޒަކާތް ދައްކަންޖެހޭ ގޮވާމުގެ އަގު:
އާދައިގެ ހަނޑޫ- 15 ރުފިޔާ
ތައިލެންޑް ހުދު ހަނޑޫ- 48 ރުފިޔާ
ބާސްމަތީ ހަނޑޫ- 105 ރުފިޔާ
ރަތް ހަނޑޫ- 65 ރުފިޔާ
އާދައިގެ ފުށް- 12 ރުފިޔާ
އާޓާފުށް- 55 ރުފިޔާ
އިސްލާމިކް މިނިސްޓްރީން މިއަހަރުގެ ފިޠުރު ޒަކާތް ބެހުމަށް ނިންމާފައިވަނީ މިދިޔަ އަހަރު އެކުލަވާލާފައިވާ ފަޤީރުންގެ ލިސްޓަށެވެ. އެގޮތަށް ބެހުމަށް ނިިންމާފައިވަނީ ކޮވިޑް-19 ގެ މިހާލަތުގެ ސަބަބުން ދަފްތަރު އެކުލުވާލުމުގައި ހުރި ދަތިތަކުގެ ސަބަބުން އެކަން ލަސްކޮށްފައި ވާތީ ކަމަށް އެ މިނިސްޓްރީން ބުނެފައި ވެއެވެ.
އިސްލާމިކް މިނިސްޓްރީން ބުނެފައިވާ ގޮތުގައި މިވަގުތު ރާއްޖޭގައި ފަޤީރުންގެ ގޮތުގައި ތިބީ 8،764 މީހުން ނެވެ. އޭގެ ތެރޭގައި މާލޭގެ ދަފްތަރުގައި 1717 މީހަކާއި އަތޮޅުތަކުން 7047 މީހުން ފަޤީރުންގެ ގޮތުގައި އެބަތިއްބެވެ.
އިސްލާމިކް މިނިސްޓްރީން 1441 ވަނަ އަހަރު (މިދިއަ އަހަރު) މައުލޫމާތު ދެމުން ބުނެފައިވާ ގޮތުގައި، މާލެއާއި ވިލިމާލެ އަދި ހުޅުމާލެއިން މިދިޔަ އަހަރު ފިތުރު ޒަކާތުގެ ގޮތުގައި، 5،644،118.00ރ (ފަސް މިލިއަން ހަ ލައްކަ ސާޅީސް ހަތަރުހާސް އެއްސަތޭކަ އަށާރަ ރުފިޔާ) ލިބުނެވެ. އަދި ފަޤީރުންގެ ދަފުރަތުގައި ރަޖިސްޓްރީވެފައިވާ 1128 މީހުންނަށް މި ފައިސާ ބެހުމުން ކޮންމެ ބޮލަކަށް 5000 ރުފިޔާ ލިބޭ ކަމަށް މިނިސްޓްރީން މިދިއަ އަހަރު ބުނެފައި ވެއެވެ.
ފިޠުރު ޒަކާތް ނެރުން ވާޖިބު ވަޤުތަކީ، ރަމަޟާންމަހުގެ ފަހު ދުވަހުގެ އިރު އޮއްސުނީއްސުރެ، ޢީދު ނަމާދަށް ދިއުމާއި ދެމެދުގައެވެ. އަދި ފިޠުރު ޒަކާތް އަދާކުރުން ސުންނަތް ވަޤުތަކީ، ޢީދު ދުވަހުގެ ހެނދުނު، ޢީދު ނަމާދަށް ދިއުމުގެ ކުރިންނެވެ.
