އައްޑޫ ސިޓީއަށް މިހާރު ކުރަމުންދާ ވިއްސާރައިގައި އެ ސިޓީގެ 150ށް ވުރެ ގިނަ ގެއަށް ފެން ވަދެ އެކިވަރުގެ ގެއްލުން ވެއްޖެއެވެ.

އައްޑޫސިޓީ ކައުންސިލުން ބުނީ، ބުރާސްފަތި ބުދަ ދުވަހުގެ ހަވީރުން ފެށިގެން ކުރަމުންދާ ވިއްސާރައިގައި އެކި އަވަށްތަކުގައި ފެންބޮޑުވެ ގިނަ ގޭގެއަށް އަސަރު ކޮށްފައިވާ ކަމަށެވެ. މި ވިއްސާރައިގައި އެންމެ ބޮޑަށް ގެއްލުން ވީ ފޭދުއަށް ކަމަށްވެސް ސިޓީ ކައުންސިލުން ބުނެއެވެ.

އެގޮތުން މިހާތަނަށް ފެންބޮޑުވެގެން ރެކޯޑު ކުރެވިފައިވަނީ، ފޭދޫ އިން 93 ގެ، މަރަދޫފޭދޫ 19 ގެ، މަރަދޫ 11 ގެ، އަދި ހިތަދޫ 28 ގެ ކަމަށް އައްޑޫ ސިޓީ ކައުންސިލުން ބުނެއެވެ.

ވިއްސާރަ އާއި ގުޅިގެން ފެން ހިއްކުމުގެ މަސައްކަތާއި އަދި އިތުރަށް ގޭގެއަށް ފެން ވަނަ ނުދިނުމަށް ވެލި ބަސްތާ ޖެހުމުގެ މަސައްކަތްވެސް އައްޑޫސިޓީ ކައުންސިލާއި، ފުލުހުންނާއި ސިފައިން އަދި ބައެއް އާންމުން ގުޅިގެން ދަނީ ކުރަމުންނެވެ.

މި ވިއްސާރައިގެ ސަބަބުން ހާލުގައި ޖެހުނު ގޭތަކުގައި ދިރިއުޅޭ، 400 މީހުންގެ ރޯދަވީއްލުމުގެ އިންތިޒާމު ކައުންސިލުން ވަނީ ހަމަޖައްސައި ދީފައެވެ. އަދި އެހެނިހެން ގޮތްގޮތުން ވެސް އެހީތެރިކަން ފޯރުކޮށްދެމުން ދާކަމަށްވެސް އައްޑޫ ސިޓީ ކައުންސިލުން ބުނެއެވެ.