ފުރަބަންދު އަމުރާ ހިލާފުވެގެން ޖޫރިމަނާގެ ގޮތުގައި 3.8 މިލިއަން ރުފިޔާ!
14 މެއި 2020 | ބުރާސްފަތި 06:31ޖުމްލަ 3824 މީހަކު ވަނީ ޖޫރިމަނާކުރެވިފައި، މީގެ ތެރެއިން 3287 ޖޫރިމަނާކުރީ މާލެއިން
ލޮކްޑައުން އަމުރު ތަންފީޒުކުރުމަށް ފުލުހުން މަގުތަކުގައި ހަރަކާތްތެރިވަނީ
ކޮވިޑް-19 ފެތުރުން ހުއްޓުވުމުގެ ގޮތުން މާލެ ސިޓީގައި އިއުލާނުކޮށްފައިވާ ފުރަބަންދު އަމުރާ ހިލާފުވެގެން މިހާތަނަށް 3824 މީހަކު ޖޫރިމަނާ ކޮށްފި އެވެ.
މޯލްޑިވްސް ޕޮލިސް ސަރވިސް އިން އާންމުކޮށްފައިވާ ތަފާސްހިސާބުތަކަށް ބަލާއިރު، އެންމެ ގިނަ ބަޔަކު ޖޫރިމަނާ ކޮށްފައިވަނީ މާލެ އިންނެވެ. އެގޮތުން މާލެ އިން އެކަނިވެސް 3287 ފަރާތެއް ވަނީ ޖޫރިމަނާކޮށްފަ އެވެ.
މި އަދަދުތަކާއެކު މިހާތަނަށް ޖޫރިމަނާ ކޮށްފައިވާ ފަރާތްތަކުން ދައުލަތަށް ދައްކަން ޖެހޭ ފައިސާގެ އަދަދަކީ 3،824،000ރ. އެވެ. ފުރަބަންދު އަމުރާ ޙިލާފުވާ ފަރާތްތައް ޖޫރިމަނާ ކުރަނީ 1000ރ. އިންނެވެ. މި އަމަލު ތަކުރާރު ކުރާނަމަ، ގާނޫނުލް އުގޫބާތުގެ 533 ވަނަ މާއްދާގެ (ހ) ދަށުން ހައްޔަރުކުރުމުގެ ބާރު ފުލުހުންނަށް ވަނީ ލިބިފަ އެވެ.
މިހާތަނަށް ފުލުހުން ވަނީ 189 މީހަކު ހައްޔަރުކޮށްފަ އެވެ. އޭޕްރީލް މަހުގެ 13 ވަނަ ދުވަހުގެ ނިޔަލަށް ޖުމުލަ 207 މީހަކު ހައްޔަރު ކޮށްފައިވާއިރު އޭގެތެރެއިން 189 މީހުން ހައްޔަރުކޮށްފައިވަނީ މާލެއިންނެވެ. ހުޅުމާލެއިން 16 މީހަކު ހައްޔަރު ކޮށްފައިވާއިރު ވިލިމާލެ އިން 2 މީހަކު ހައްޔަރު ކޮށްފައިވާކަމަށް ފުލުހުން ވަނީ ބުނެފަ އެވެ. ޖޫރިމަނާ ކުރާ މީހުންނާއި ފުލުހުންގެ ހައްޔަރަށް ގެންދާ މީހުންގެ އަދަދު ދަނީ އިތުރު ވަމުންނެވެ.
ކުރިޔަށް އޮތް 2 ހަފުތާއަކީ މާލެ ސިޓީގައި ކޮވިޑް-19ގެ ބަލިމަޑުކަން އެންމެ ބޮޑަށް ފެތުރޭނެ ހަފުތާތައް ކަމަށް ޑޮކްޓަރުންގެ ޓީމުން އަންދާޒާކޮށްފައި ވާއިރު ގްރޭޓަރ މާލެ ސަރަހައްދު (މާލެ، ވިލިމާލެ، ހުޅުމާލެ، ގުޅީފަޅު) ގައި އިއުލާނު ކޮށްފައިވާ ލޮކްޑައުންގެ މުއްދަތު 14 ދުވަހަށް އިތުރުކޮށްފި އެޗްޕީއޭއިން ވަނީ ނިންމާފައެވެ.
