ސްޕެއިންގައި ކުރިޔަށް ގެންދިޔަ އެންޓިބޮޑީ ޓެސްޓު: އާބާދީގެ 5 އިންސައްތައަށް ވައިރަސްގެ އަސަރު ކޮށްފައިވޭ
14 މެއި 2020 | ބުރާސްފަތި 03:53އޭޕްރީލް މަހުގެ 27 ވަނަ ދުވަހު ފެށި ޓެސްޓައް ސްޕެއިންގެ 90،000 މީހުންނަށް ކޮށްފައިވޭ
ސްޕެއިންގައި ލޮކްޑައުންގައި އަޅާފައިވާ ފިޔަވަޅުތަކަށް ލުއިދިނުމާއެކު ރައްޔިތުން މަގުތަކަށް ނިކުމެ
މުޅި ސްޕެއިންގައި ކުރިޔަށްގެންދިޔަ އެންޓިބޮޑީ ޓެސްޓްގެ ފުރަތަމަ ނަތީޖާ ދައްކާގޮތުން އާބާދީގެ 5 އިންސައްތަ އަށް ކޮވިޑް-19 ގެ އަސަރުކޮށްފައިވާ ކަން ހާމަވާ ކަމަށް އެގައުމުގެ ހެލްތު މިނިސްޓްރީން ބުނެފި އެވެ.
މިޓެސްޓަކީ ސްޕެއިންގެ އެކި ސަރަހައްދު ތަކުގައި ކުރިޔަށް ގެންދިޔަ ޓެސްޓުތަކެކެވެ. ޓެސްޓުގެ ނަތީޖާ އެކި ސަރަހައްދުތަކުގައި ތަފާތު ކަމަށް އެގައުމުގެ ހެލްތު މިނިސްޓްރީން ބުނެއެވެ. މި ޓެސްޓްތައް ކުރިޔަށް ގެންދިޔައީ ކާރލޮސް ތްރީ ފޮރ ހެލްތު އެންޑް ދަ ނޭޝަނަލް ސްޓެޓިސްޓިކްސް އިންސްޓިޓިއުޓުންނެވެ. އޭޕްރީލް މަހުގެ 27 ވަނަ ދުވަހު ފެށި ޓެސްޓައް ސްޕެއިންގެ 90،000 މީހުންނަށް ކޮށްފައިވެ އެވެ. އެއީ 36،000 ގޭބެސީއެވެ.
ވައިރަސް އާ ދެކޮޅު ހެދުމުގެ ދިފާޢީ ބާރު ހަށިގަނޑުގައި ހުރި މީހުން ދެނެގަތުމަށް ކުރިޔަށް ގެންދިޔަ މިޓެސްޓުގެ ސަބަބުން ސްޕެއިންގެ ސަރުކާރަށް މިވައިރަސްގެ އަސަރު ކޮށްފައިވާ މީހުން ރަނގަޅަށް ދެނެގަތުމަށް ފަސޭހަވެގެންދާނެ އެވެ. އަދި މިވައިރަސް އިން އަސަރު ނުކުރާނެ ނުވަތަ 'އިމިއުނ' ވާނެ މީހުންނަކީ ކޮބައިތޯ ދެނެގަތުމަށް ފަސޭހަވެގެންދާނެ އެވެ.
ސްޕެއިން އަކީ ދުނިޔޭގައި ދެ ވަނަ އަށް އެންމެ ގިނަ އަދަދެއްގެ މީހުންނަށް ވައިރަސް ޖެހިފައިވާ ގައުމެވެ. އެއީ 271,095 ( ދެ ލައްކަ ހަތްދިހަ އެއްހާސް ނުވަދިހަ ފަސް) މީހުންނެވެ. ސްޕެއިންގައި މިވައިރަސް ޖެހިގެން 27,104 މީހުން ވަނީ މަރުވެފަ އެވެ.
ވައިރަސް ކޮންޓްރޯލް ކުރުމަށް ސްޕެއިންގައި އަޅާފައިވާ ލޮކްޑައުންގެ ފިޔަވަޅުތަކަށް މިހާރު ވަނީ ލުއި ދޭން ފަށާފަ އެވެ.
