ފަލަސްތީނުގެ ރެފިއުޖީން އެނބުރި ގައުމަށް ދިއުމުގެ ހައްގު ހޯދުމަށް ގޮވާލައި މާޗް މަހުގެ 30 ވަނަ ދުވަހު ފެށި މުޒާހަރާތަކުގެ މިހަފްތާގެ ހަފްތާބަންދުގައި  އިސްރާއީލުގެ ސިފައިން ފަލަސްތީނުގެ 7 މީހުން މަރާލައި 1،000 އަށް ވުރެ ގިނަ މީހުން ޒަޚަމްކޮށްލައިފިއެވެ.

ފަލަސްތީނުގެ ހެލްތު މިނިސްޓްރީއިން ހުކުރު ދުވަހު ބުނީ އަސްލުވަޒަން ބޭނުންކުރުމުގެ ސަބަބުން ޒަޚަމްވި މީހުންގެ އަދަދު އެކަނިވެސް 293 އަށް އަރާ ކަމަށެވެ.

އެތައްހާސް ބަޔަކު ބައިވެރިވި މި މުޒާހަރާގައި ކަރުނަގޭހުގެ އަސަރުކޮށްގެންނާއި އެހެނިހެން ގޮތްގޮތުން އެތައް ސަތޭކަ ބަޔަކު ޒަޚަމްވެފައިވެއެވެ.

"ގްރޭޓް މާޗް އޮފް ރިޓާން"ގެ ނަމުގައި ހަ ހަފުތާގެ މުއްދަތަށް ފަލަސްތީނު ރައްޔިތުން ފެށި މުޒާހަރާގައި ފަލަސްތީނު މީހުން ޑިމާންޑް ކުރަމުން ދަނީ އިސްރާއީލުގައި މިހާރު ދިރިއުޅޭ ފަލަސްތީނުގެ ރެފިއުޖީން އެ މީހުންގެ ގެދޮރަށް އަނބުރާ ދިއުމުގެ ފުރުސަތު ދިނުމަށެވެ.

މާޗް މަހުގެ 30 ވަނަ ދުވަހުން ފެށިގެން ކުރިޔަށްގެންދާ މުޒާހަރާތަކުގައި މިހާތަނަށް ޖުމްލަ 21 އަށް ވުރެ ގިނަ މީހުން މަރާލާފައިވާއިރު  1،600 އަށް ވުރެ ގިނަ މީހުންވަނީ ޒަޚަމްކޮށްލާފައެވެ.

އިސްރާއީލް ސިފައިންވަނީ މުޒާހަރާގެ ފުރަތަމަ ހަފްތާގައިވެސް މުޒާހިރީންނާއި ކުރިމަތިލައި، ފަލަސްތީނުގެ 773 މީހެއްގެ ގަޔަށް  ބަޑި ޖަހާފައެވެ.

އިހްތިޖާޖް ނިންމަން ހަމަޖައްސާފައި ވަނީ މެއި 15 ވަނަ ދުވަހު ކަމަށްވާއިރު އެއީ ފަލަސްތީނުން ކިޔާ ގޮތުން ނަކްބާ ނުވަތަ ހަލާކުގެ ދުވަހެވެ. ނުވަތަ 1948 ވަނަ އަހަރު އިސްރާއީލް އުފެދުނު ދުވަހެވެ.