ޗެލްސީގެ މައްސަލައިގައި ފީފާ އިން އިނގިރޭސި އެފްއޭ ވެސް ޖޫރިމަނާ ކުރުމުން، އެ މައްސަލަ ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އަށް ހުށަހަޅައިފި އެވެ.

މިދިޔަ އަހަރުގެ ފެބްރުއަރީ މަހު ފީފާ އިން ވަނީ ގަވާއިދާ ޚިލާފާށް ކުޅުންތެރިން ރަޖިސްޓްރީ ކުރުމުގައި ޗެލްސީން ފީފާ ގަވާއިދުގެ 150 ކަމަކާ ހިލާފުވެފައިވާތީ ދެ ޓްރާންސްފާ ބާޒާރުގައި ކުޅުންތެރިން ނުގެނެވޭ ގޮތަށް އަދަބު ދިނުމުގެ އިތުރުން އެ ކްލަބު ޖޫރިމަނާ ކޮށްފަ އެވެ. އެކަމަކު ޑިސެމްބަރު މަހުގެ ތެރޭގައި ސީއޭއެސް އިން ވަނީ ފީފާ އިން ޗެލްސީ އަށް ދިން އަދަބު ލުއިކޮށްދީފަ އެވެ. އެގޮތުން މިދިޔަ ޖެނުއަރީ ޓްރާންސްފާގައި ކުޅުންތެރިން ގަތުމުގެ ފުރުސަތު ޗެލްސީ އަށް ލިބުނެވެ.

ޗެލްސީގެ މައްސަލައިގައި ފީފާ އިން ވަނީ އިނގިރޭސި އެފްއޭ ވެސް ޖޫރިމަނާ ކޮށްފައެވެ. އެކަމަކު ފީފާ އިން ފަހުން ވަނީ އިނގިރޭސި އެފްއޭ ޖޫރިމަނާކުރި އަދަދު 290،000 (ދެ ލައްކަ ނުވަދިހަ ހާސް) ޕައުންޑަށް ކުޑަކޮށްދީފަ އެވެ.

މި މައްސަލައިގައި ފީފާއާ ދެކޮޅަށް އިނގިރޭސި އެފްއޭ އިން ސީއޭއެސް އަށް މައްސަލަ ހުށަހެޅިއިރު، މި މައްސަލައިގެ ފުރަތަމަ އަޑުއެހުން ޖޫން މަހުގެ 26 ވަނަ ދުވަހަށް މިހާރު ވަނީ ތާވަލުކޮށްފަ އެވެ. ރިޕޯޓުތައް ބުނާ ގޮތުން ސީއޭއެސް އިން މި މައްސަލަ ބެލުމަށްފަހު ފީފާ އިން އިނގިރޭސި އެފްއޭ ޖޫރިމަނާކުރި އަދަދު މަދުކުރާނެ އެވެ.

ފީފާ އިން ޗެލްސީ އަށް ދިން އަދަބު މިދިޔަ އަހަރުގެ ޑިސެމްބަރު މަހު ސީއޭއެސް އިން ލުއިކޮށްދިން އިރު، އެ ކްލަބުން މިހާތަނަށް ސޮއި ހޯދާފައިވަނީ އެންމެ ކުޅުންތެރިއެއްގެ އެވެ. އެއީ ނެދަލެންޑްސްގެ އަޔަކްސް އަށް ކުޅެމުން އަންނަ މޮރޮކޯގެ ތަރި ހަކީމް ޒިޔެކް އެވެ. އެކަމަކު އޭނާ ޗެލްސީއާ ގުޅޭނީ މި ސީޒަނުގެ އިނގިރޭސި ޕްރިމިއާ ލީގު ނިމުމުންނެވެ.