ބޭލް ގަތުމަށް ނިއުކާސަލް އިން 53 މިލިއަން ޕައުންޑް ޚަރަދު ކުރަނީ

ރެއާލް މެޑްރިޑަށް ކުޅެމުން އަންނަ ވޭލްސްގެ ތަރި ގެރެތު ބޭލް ގަތުމަށް ނިއުކާސަލް ޔުނައިޓެޑުން 53 މިލިއަން ޕައުންޑް ޚަރަދުކުރަން ތައްޔާރަށް އޮތް ކަމަށް ރިޕޯޓުތައް ބުނެފި އެވެ.

ބޭލް ހޯދުމަށް ނިއުކާސަލް އިން ބޮޑު ޚަރަދެއް ކުރަން ތައްޔާރަށް އޮތް ކަމަށް ރިޕޯޓުތައް ބުނިއިރު، ސައުދީގެ އިންވެސްޓަރުންގެ ބޮޑު ހިއްސާއަކާ އެކު 300 މިލިއަން ޕައުންޑަށް ނިއުކާސަލް ގަތުމަށް އަމަންޑާ ސްޓަވިލީސްގެ ޕީސީޕީ ކެޕިޓަލް ޕާޓްނާސް އިން އަންނަނީ މަސައްކަތް ކުރަމުންނެވެ. އަމަންޑާއާ އެކު ނިއުކާސަލް ގަތުމުގައި ހިއްސާވަނީ ސައުދީ ވަލީ އަހުދު މުހައްމަދު ބިން ސަލްމާނެވެ.

ރެއާލްއަށް 2013 ވަނަ އަހަރުގެ ސީޒަނުގައި ބަދަލުވި ބޭލް، އެ ކްލަބާއެކު ހަދާފައިވާ އެއްބަސްވުން 2022 ގެ ނިޔަލަށް އާކޮށްފައިވީ ނަމަވެސް، ކުރިއަށް އޮތް ހޫނު މޫސުމުގެ ޓްރާންސްފާ ބާޒާރުގައި ބޭލް ގަތުމަށް ނިއުކާސަލް އިން 53 މިލިއަން ޕައުންޑް ހުށަހަޅަން ތައްޔާރަށް އޮތް ކަމަށް ވަނީ ރިޕޯޓުކޮށްފަ އެވެ.

އެކަމަކު ދާދި ފަހުން ބޭލް ވަނީ ރެއާލް އާއެކު ހަދާފައިވާ އެއްބަސްވުން ހަމަވުމުން، ދެން ކުޅެން ޝައުގުވެރިވަނީ އެމެރިކާގެ މޭޖާ ލީގުގައި ކަމަށް ބުނެފަ އެވެ. އެއާއެކު އެމެރިކާގެ އިންޓަ މަޔާމީން ވެސް އަންނަނީ ބޭލް ހޯދުމަށް މަސައްކަތް ކުރަމުންނެވެ. ދެން ބޭލް ހޯދަން މަސައްކަތް ކުރަމުން އަންނަނީ އޭނާގެ ކުރީގެ ކްލަބު ޓޮޓެންހަމް ހޮޓްސްޕާ އިންނެވެ.

އެކަމަކު ބޭލްގެ އޭޖެންޓް ބުނީ އޭނާ އެނބުރި ޓޮޓެންހަމަށް ދިޔުމަކީ ވަރަށް ނާދިރު ކަމެއް ކަމަށެވެ. އެގޮތުން މިވަގުތު ބޭލް ރެއާލްގައި ހުރީ ހިތްހަމަޖެހިގެން ކަމަށާއި، އެހެން ޓީމަކަށް ބަދަލުވުމާއި މެދު ގޮތެއް ނިންމާލީ ރެއާލް އާއެކު ހަދާފައިވާ އެއްބަސްވުން ހަމަވުމުން ކަމަށްވެސް ބުންޏެވެ.

ބޭލް ވަނީ ރެއާލްއަށް މިހާތަނަށް ކުޅުނު 249 މެޗުގައި 105 ލަނޑު ކާމިޔާބުކޮށް، އެ ކްލަބާއެކު ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕަ ކަޕް ތިން ފަހަރު، ކްލަބު ވޯލްޑް ކަޕް ތިން ފަހަރު، ސްޕެނިޝް ލީގު އެއް ފަހަރު، ސްޕެނިޝް ކަޕް އެއް ފަހަރު އަދި ސްޕެނިޝް ސުޕަ ކަޕް އެއް ފަހަރު ކާމިޔާބުކޮށްފައެވެ.