ކުރީގެ ރައީސް ޔާމީން ދައުލަތަށް ދައްކަންޖެހޭ 5 މިލިއަން ޑޮލަރު ދައްކައިފިތަ؟
5 އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކޮށްފައިވޭ
ކުރީގެ ރައީސް އަބްދުﷲ ޔާމީން- ރައީސް ޔާމީނަށް ކުރި ޙުކުމުގައި ޖޫރިމަނާ ދެއްކުމަށް ބަޔާންކޮށްފައިވާ މުއްދަތު ހަމަވާން ބާކީ އިނީ 15 ދުވަސް
ކުރީގެ ރައީސް ޢަބްދުﷲ ޔާމީނުގެ މައްޗަށް ދައުލަތުން އުފުލާފައިވާ މަނީ ލޯންޑަރިންގެ ދަޢުވާ އެމަނިކުފާނުގެ މައްޗަށް ސާބިތުވެ ފަސް މިލިއަން ޑޮލަރުން ޖޫރިމަނާ ކުރުމަށް ޙުކުމް ކޮށްފައި ވާއިރު، އެ ފައިސާ ދެއްކުމުގެ މުއްދަތު ހަމަވާން ގާތް ވެއްޖެއެވެ.
މިދިޔަ އަހަރުގެ ނޮވެންބަރު މަހުގެ 28 ވަނަ ދުވަހު ކްރިމިނަލް ކޯޓުން ރައީސް ޔާމީނުގެ މައްޗަށް ކުރި ޙުކުމުގައި ބުނެފައި ވަނީ، މަނީ ލޯންޑަރިންގެ ދަޢުވާ އެމަނިކުފާނުގެ މައްޗަށް ސާބިތުވެ 5 އަހަރަށް ޖަލަށް ލައި ފަސް މިލިއަން ޑޮލަރުން ޖޫރިމަނާ ކުރުމަށް ނިންމާފައިވާ ކަމަށެވެ. އަދި ދައުލަތަށް ދައްކަންޖެހޭ 5 މިލިއަން ޑޮލަރު 6 މަސް ދުވަހުގެ ތެރޭގައި އިންލަންޑް ރެވެނިއު އޮތޯރިޓީ (މީރާ)އަށް ދެއްކުމަށް ވެސް ރައީސް ޔާމީނުގެ މައްޗަށް ކޮށްފައިވާ މި ހުކުމުގައި ބުނެފައި ވެއެވެ.
ޙުކުމުގައި ބަޔާން ކޮށްފައިވާ މުއްދަތު ހަމަވާން 15 ދުވަހަށް ވެފައިވާއިރު، ރައީސް ޔާމީން ދައުލަތަށް ދައްކަން ޖެހޭ ފައިސާ ދައްކާފައިވޭތޯ "ރާއްޖެއެމްވީ"އިން ސުވާލު ކޮށްލުމުން މީރާގެ މީޑިއާ އޮފިޝަލު ވިދާޅުވީ، އެފަދަ މައުލޫމާތުތައް ހާމަ ކުރެވެން ނެތް ކަމަށެވެ. އަދި މީރާއިން ވަކިވަކި ޓެކްސްޕޭޔަރުންގެ މައުލޫމާތު ހާމަ ނުކުރާކަން ފާހަގަކުރައްވައި އޭނާ ވިދާޅުވީ، ޙުކުމުގެ ފައިސާ ދައްކާ ފަރާތްތައް ވެސް މީރާއިން ބަލަނީ "ޓެކްސްޕޭޔަރ"އެއްގެ ގޮތުގައި ކަމަށެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް ވިދާޅުވީ، މީރާއަށް ދައްކާ ފައިސާގެ ވަކިވަކި މައުލޫމާތު ހާމަ ނުކުރެވޭނެ ކަމަށާއި، ނަމަވެސް ފައިސާ ދައްކާ ފަރާތުގެ ހުއްދައާއެކު އެ މައުލޫމާތެއް ހިއްސާ ކުރެވިދާނެ ކަމަށެވެ.
މި ފައިސާ ރައީސް ޔާމީން ދައްކާފައި ވާކަން ނުވަތަ ނޫންކަން ކަށަވަރުވެފައި ނުވާއިރު، ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، ރައީސް ޔާމީނު ފައިސާ ދެއްކެވިކަން މީރާއިން މިހާތަނަށް ކޯޓަށް އަންގާފައ ނުވާ ކަމަށެވެ.
އެކަމާ ގުޅޭގޮތުން ރައީސް ޔާމީނުގެ ޤާނޫނީ ވަކީލު އާދަމް އާސިފްގެ ބަހެއް ހޯދުމަށް ރާއްޖެއެމްވީން ކުރި މަސައްކަތް ކާމިޔާބުވެފައެއް ނުވެއެވެ.
ރައީސް ޔާމީނުގެ މައްޗަށް ސާބިތުވެފައިވާ މަނީ ލޯންޑަރ ކުރުމުގެ ކުށުގެ ދައުވާއަކީ މޯލްޑިވްސް މަރކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ގެ ބޮޑު ޚިޔާނާތުގެ ފައިސާ އެސްއޯއެފްގެ އެކައުންޓެއް މެދުވެރިކޮށް އެމަނިކުފާނުގެ އަމިއްލަފުޅު އިސްލާމިކް ބޭންކް އެކައުންޓަށް ޖަމާކޮށްފައި ވާކަމުގެ ދައުވާއެވެ. އެސްއޯއެފުން އެމަނިކުފާނުގެ އެކައުންޓަށް ޖަމާކޮށްފައި ވަނީ 500،000.00 (ފައްސަތޭކަ ހާސް) ޑޮލަރުގެ ދެ ޗެކެކެވެ. ޖުމުލަ އެއް މިލިއަން ޑޮލަރެވެ.
