އަނިޔާއިން ރަނގަޅުވެ، ރެއާލް މެޑްރިޑްގެ ފަރިތަކުރުންތަކުގައި ބެލްޖިއަމްގެ މިޑްފީލްޑަރު އެޑެން ހަޒާޑް ބައިވެރިވާން ފަށައިފި އެވެ.

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މިދިޔަ މާރޗު މަހު ސްޕެނިޝް ލީގުގެ ކުޅުން ހުއްޓާލި ނަމަވެސް، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުން ވަނީ ދީފަ އެވެ. އެއާއެކު ރެއާލް މެޑްރިޑްގެ ކުޅުންތެރިން ވަނީ މިދިޔަ ހޯމަ ދުވަހު އެކަނި ތަމްރީނުތަކަށް ނުކުމެފައެވެ.

ގިނަ ދުސްވަސްތަކަކަށް ފަހު އަނިޔާ އިން ރަނގަޅުވެ ހަޒާޑް ފަރިތަކުރަން ނުކުތްއިރު، އޭނާ އަށް އަނިޔާވީ ސްޕެނިޝް ލީގުގައި ފެބްރުއަރީ މަހުގެ 22 ވަނަ ދުވަހު ލެވަންޓޭ އަތުން 1-0 އިން ރެއާލް ބަލިވި މެޗުގައެވެ. އެ ފަހަރު ހަޒާޑަށް އަނިޔާވީ، އޭނާ ތިން މަސް ދުވަހު ކުޅުމާއި ދުރަށް ދިޔުމަށްފަހު އެނބުރި ކުޅުމުގެ ތެރެއަށް އައިތާ ހަފުތާއެއް ވެސް ނުވަނީސް އެވެ.

ޗެލްސީގައި ތަފާތު މޮޅު ކުޅުމެއް ދައްކަމުން އައި ހަޒާޑަށް މި ސީޒަނުގައި އޭނާގެ އެންމެ މޮޅު ކުޅުން ރެއާލްގައި ނުދެއްކެނީ އަނިޔާގެ ސަބަބުންނެވެ. އެގޮތުން މި ސީޒަނުގައި ރެއާލަށް އޭނާ އަށް ކުޅެދީފައިވަނީ އެންމެ 15 މެޗެވެ. އަދި މި 15 މެޗުން އޭނާ އަށް ކާމިޔާބު ކުރެވިފައިވަނީ އެންމެ ލަނޑެކެވެ.