ބޭރުގައި ތިބި ދިވެހިން ގެނައިގޮތަށް މާލޭގައި ތާށިވި މީހުންނަށް އަނބުރާ ރަށަށް ދެވޭނެ ގޮތް ހަދަންޖެހޭ: އަލީ ހުސައިން
12 މެއި 2020 | އަންގާރަ 06:53މާލޭގައި ރަށަށް ދާން ބޭނުންވާ 5،000 މީހުން މިހާރުވެސް އެބަތިބި، މިއަދަދު 10،000 އިތުރުވާނެ ކަމަށް ލަފާކުރެވޭ
ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން: ރަށަށް ނުދެވި މާލޭގައި 5،000 މީހުން ތާށިވެފައި ތިބިކަމަށް ސަރުކާރުން ބުނޭ
ކޮވިޑް-19ގެ ޙާލަތާއި ގުޅިގެން ރާއްޖެއިން ބޭރުގައި ތިބި ދިވެހިން ރާއްޖެ ގެނައި ގޮތަށް، ދަތުރުވަރެއްގައި މާލެ އައިސް ރަށަށް ނުދެވި ތިބި މީހުންނަށް ވެސް އަވަހަށް ރަށަށް ދޭވޭނެ އިންތިޒާމުތައް ހަމަޖައްސައި ދޭންޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެ އެވެ.
އަލީ ހުސައިން ކުރެއްވި ޓްވީޓެއްގައި ވިދާޅުވެފައިވަނީ، އެެހެން ޤައުމުތަކުގައި، އެތަކެއް ސަތޭކަ މޭލު ދުރުގައި ތިބި ދިވެހިންވެސް ރާއްޖެ ގެންނަ ގޮތަށް، ދަތުރުވަރުގައި މާލެ އައިސް ތާށިވެ ޙާލުގައި ޖެހިފައިތިބި މީހުންނަށް އެމީހުންގެ ރަށްރަށަށް އަނބުރާ ދެވޭނެ އިންތިޒާމުތައްވެސް ވީހާވެސް އަވަހަކަށް ހަމަޖެެހެން އެބަޖެހޭ ކަމަށެވެ.
ޢަލީ ހުސައިން އެ ވިދާޅުވި ގޮތަށް، ވަރަށް އުނދަގުލުން އަދި ވަރަށް ބޮޑެތި ޚަރަދުތަކެއް ކޮށްގެން ރާއްޖެއިން ބޭރުގައި ތިބި ދިވެހިން ގެނައުމުގެ މަސައްކަތް ސަރުކާރުން މިހާރުވެސް ދަނީ ކުރަމުން ނެވެ.
ހޯމަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓުއަރިޒަމް މިނިސްޓަރ އަލީ ވަހީދު ވިދާޅުވެފައިވަނީ، ރަށްރަށުން މާލެ އައިސް ތިބި ފަރާތްތަކުގެ ތެރެއިން އެނބުރި ރަށަށް ދާން ބޭނުންވެ, ނަން ނޯޓު ކޮށްފައިވާ 5000 މީހުން އެބަތިބި ކަމަށެވެ. އޭގެ ތެރެއިން ކޮންމެހެން ފުރުޞަތު ދޭން ޖެހޭ މީހުން ޝޯޓް ލިސްޓް ކުރުމުގެ މަސައްކަތް ކަމާބެހޭ އިދާރާތަކާއި ގުޅިގެން ކުރައްވަމުން ގެންދަވާކަމަށް މިނިސްޓަރު ވިދާޅުވެފައި ވެއެވެ.
މީގެ އިތުރުން މިނިސްޓަރު ވިދާޅުވެފައިވަނީ، ކަރަންޓީން ފެސިލިޓީތަކުގެ ގޮތުގައި ރަށްރަށުގައި ޤާއިމު ކުރެވިފައިވާ ފެސިލިޓީތައް ބޭނުންކުރުން ވަގުތީ ގޮތުން މެދުކަނޑާލާފައިވާ ކަމަށާއި، އިތުރު ގޮތެއް ނިންމަންދެން ކުރިއަށް އޮތް ދުވަސްތަކުގައި ބޭނުންކުރާނީ ހަމައެކަނި "ޓްރާންސިޓް" ކަރަންޓީން ފެސިލިޓީތައް ކަމަށެވެ. ކޮވިޑް-19 އާއި ގުޅިގެން ރަށްރަށަށް ދާން ބޭނުންވާ މީހުންގެ ޢަދަދު މިހާރުވެސް 5،000ށް އަރާފައިވާ ކަމަށާއި އަދި މި ޢަދަދު 10،000ށް ވެސް އަރާނެކަމަށް ލަފާކުރެވޭ ކަމަށާއި، މި ދަނޑިވަޅުގައި ކެތްތެރިކަން އިސްކުރުމަށް ޓުއަރިޒަމް މިނިސްޓަރ ޢަލީ ވަހީދު ވަނީ އިލްތިމާސްކުރައްވާފަ އެވެ.
ކޮވިޑް-19 އާއި ގުޅިގެން އިންޑިއާ، ނޭޕާލް، ބަންގްލަދޭޝް، ޔޫއޭއީ ގައި ތިބި ބައެއް ދިވެހިން ގެނެސްފައިވާއިރު، ފުރުޞަތު ލިބުނު ވަރަކުން ދުނިޔޭގެ އެކި ޤައުމުތަކުގައި ތިބި ދިވެހި ގެނައުމުގެ މަސައްކަތް ކުރަމުންދާނެ ކަމަށް މިނިސްޓްރީ އޮފް ފޮރިން އެފެއަރޒުން ވަނީ ބުނެފައެވެ.
