ފިހާރައަށް އެންމެ ގިނަވެގެން ވަދެވޭނެ ކަސްޓަމަރުންގެ އަދަދު ބޭރަށް ފެންނާނެހެން ބަހައްޓަން ޖެހޭ!
11 މެއި 2020 | ހޯމަ 05:13އުސޫލާ އެއްގޮތަށް އަމަލު ނުކުރާނަމަ ހުއްދަ ބާޠިލު ކުރާނެ
ލޮކްޑައުންގެ ހާލަތުގައި ކަސްޓަމަރުންނަށް ވިޔަފާރި ކުރުމަށް ވަދެވޭނީ ވަކި އަދަދަކަށް
ލޮކްޑައުންގެ ޙާލަތުގައި ވިޔަފާރިކުރުމުގެ ހުއްދަ ނަގާފައިވާ ފިހާރަތަކުން އެންމެ ގިނަވެގެން ވަދެވޭނެ ކަސްޓަމަރުންގެ ޢަދަދު ބޭރަށް ފެންނާނެހެން ބަހައްޓަންޖެހޭ ކަމަށާއި، ނުބަހައްޓާނަމަ ހުއްދަ ބާޠިލު ކުރާނެ ކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ބުނީ ޢާންމު ޞިއްޙަތު ރައްކާތެރިކުރުމުގެ ޤާނޫނު ގެ ދަށުން ޤާންމު ޞިއްޙަތުގެ ކުއްލި ނުރައްކަލުގެ ޙާލަތު އިޢުލާނުކުރުމާ ގުޅިގެން، ގޭބިސީތަކުން ބޭރަށް ނުކުމެ އުޅެވޭނީ ފުލުހުންގެ ޚާއްޞަ ހުއްދައެއްގެ ދަށުން ކަމަށެވެ. އަދި ފުލުހުންގެ ހުއްދައެއްގެ ދަށުން ޒަރޫރީ ބޭނުންތަކަށް މުދާ ވިއްކާ ފިހާރަތަކުން ކަނޑައަޅާފައިވާ އުޞޫލުތައް ފުރިހަމަކޮށްފައި ނުވާނަމަ، އެތަންތަނަށް ފުލުހުން ދޫކޮށްފައިވާ ހުރިހާ ހުއްދައެއް ބާޠީލުކުރަން ނިންމާފައިވާ ކަމަށް މިނިސްޓްރީން ބުނެއެވެ.
އެގޮތުން ފިހާރައިގެ ކުޑަ ބޮޑު މިނަށް ބަލައި، އެންމެ ގިނަވެގެން ވަދެވޭނެ ކަސްޓަމަރުންގެ ޢަދަދު ބޭރަށް ފެންނާނެހެން ބަހައްޓަންޖެހޭ ކަމަށާއި، ފިހާރައިގައި މަސައްކަތްކުރާ ކޮންމެ މުވައްޒަފަކު ވެސް ޚިދުމަތްދޭ ގަޑީގައި ހުންނަން ޖެހޭނީ ނޭފަތާއި އަނގަމަތި ފޮރުވޭ ގޮތަށް، މާސްކު އަޅައި، ދެ އަތް ތިލައަށް އަންގިލައްވައިގެން ކަމަށެވެ.
އިކޮނޮމިކް މިނިސްޓްރީން ބުނީ ފިހާރައިގެ އެތެރޭގައި، އެ ފިހާރައެއްގައި މަސައްކަތްކުރުމުގެ ހުއްދަ ފުލުހުން ދޫކޮށްފައިވާ ފަރާތްތައް ފިޔަވައި، އިތުރު މީހުން ތިބިގެން ނުވާނެކަމަށެވެ. އަދި ހުއްދަ ދީފައިވާ ފިހާރައެއްނަމަ، އެ ފިހާރައަކުން ޚިދުމަތް ދިނުމަށް ހުޅުވިފައި ހުންނަ ގަޑިތަކުގައި، ޤަވާއިދުން ހުޅުވަން ޖެހޭ ކަމަށެވެ.
މިކަންތައްތަކަށް ރިޢާޔަތްކޮށްގެން ވިޔަފާރިކުރުމުގެ ހުއްދަ އޮތް ފަރާތްތަކުން ޢާމަލުކުރުމަށް އިކޮނޮމިކް މިނިސްޓްރީން ވަނީ އިލްތިމާސްކޮށްފައެވެ.
