ކޮވިޑް-19އާ ގުޅިގެން އިންޑިއާގައި ތާށިވެފައި ތިބި ދިވެހިން ހޯމަ ދުވަހު ގެނެވޭނެ ކަމަށް މޯލްޑިވްސް އިމިގްރޭޝަނުން ބުނެފިއެވެ.

ރާއްޖެޓީވީ ކޮވީޑް-19ގެ ޚާއްޞަ ކަވަރޭޖަށް ދެއްވި އިންޓަވިއުއެއްގައި ހެޑް އޮފް އެއަރޕޯޓް އިމިގްރޭޝަން އަހްމަދު ވަހީދު ވިދާޅުވީ އިންޑިއާގައި ތާށިވެފައި ތިބި ދިވެހިން ގެނައުމުގެ މަސައްކަތް ކުރަމުން އަންނަ ކަމަށެވެ.

ހޯމަ ދުވަހުގެ މެންދުރު 250 ނުވަތަ 230 ދިވެހިން ރާއްޖެއަށް ގެނެވޭނެ ކަމަށާއި، އޮޕްރޭޝަންގެ މަސައްކަތްތައް ކުރިއަށްދާ ކަމަށް ވަހީދު ވިދާޅުވިއެވެ.

އިންޑިއާގެ 9 ސިޓީއެއްގައި ތިބި 200 ދިވެހިން އަންނަ ރާއްޖެއަށް ގެނައުމުގެ މަސައްކަތް ކުރަމުންދާ ކަމަށް މީގެ ކުރިން ފޮރިން މިނިސްޓްރީން ބުނެފައިވެއެވެ.

މި 9 ސިޓީއަކީ ޕަންޖާބް، ކަލްކަތާ، ގުރްގާއޯން، ރިޝިކޭޝް، ނިއު ދިއްލީ، ވެއްލޫރު، ޗެންނާނީ، ޓްރިވެންޑްރަމް، ކޮޗިންއެވެ. އެމީހުން ގެންނާނީ މޯލްޑިވިއަންގެ ޗާޓަރު ފްލައިޓެއްގައެވެ. ފްލައިޓް ދަތުރުކުރާ ރޫޓަކީ މާލެ – ދިއްލީ – ޓްރިވެންޑްރަމް – މާލެ އެެވެ.

ފްލައިޓް ޖައްސާ 2 ސިޓީ ނޫން އެހެން ސިޓީތަކުގައި ތިބި ދިވެހިން، ފްލައިޓް ޖައްސާ ސިޓީތަކަށް ގެންދިޔުމުގައި ނިއު ދިއްލީގައި ހުންނަ ދިވެހިރާއްޖޭގެ ހައިކޮމިޝަނުންނާއި ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލް އިން އެހީތެރިކަން ފޯރުކޮށްދޭނެ ކަމަށް ފޮރިން މިނިސްޓްރީން މަޢުލޫމާތު ދެއެވެ.

މި ފްލައިޓްގައި ބޭސްފަރުވާއަށް އިންޑިއާއަށް ގޮސް ފްލައިޓް ކެންސަލްވި ފަރާތްތަކާ، ބޮޑެތި ބަލިތަކަށް ފަރުވާކުރުމަށް އިންޑިއާއަށް ދަތުރުކޮށް، 'ލޮކްޑައުން'ގެ ސަބަބުން ފަރުވާ ހުއްޓިފައިވާ ފަރާތްތަކާއި، ރިޕެޓްރިއޭޝަން ފްލައިޓްތަކުގައި އައުމަށް އެއަރޕޯޓްތަކަށް ދިޔުމަށް ދަތި ދުރު ހިސާބުތަކުގައި ތިބި ދިވެހިންނާއި، ކުރު މުއްދަތުގެ ވިސާގައި އިންޑިއާގައި ތިބި ދިވެހިން ހިމެނެއެވެ.

މި ފްލައިޓްއިން ދަތުރުކުރާ ފަރާތްތަކުން އަންނާނީ ޓިކެޓް ގަނެގެން ކަަމަށާއި ޓިކެޓިންގެ މަސައްކަތް ކުރިއަށްގެންދާނީ މޯލްޑިވިއަން އިންކަމަށް ފޮރިން މިނިސްޓްރީން ބުންޏެވެ. މި ފްލައިޓުގައި އަންނަ އެންމެންވެސް 14 ދުވަހުގެ މުއްދަތަށް ކަރަންޓީން ކުރުމަށް ވަނީ ހަމަޖެހިފައެވެ.