ރެނަން ލޯޑީ ޕޮޒިޓިވް، އެތުލެޓިކޯގެ ބާކީ ތިބި ކުޅުންތެރިން އެކަނި ތަމްރީނުތަކަށް

އެތުލެޓިކޯ މެޑްރިޑަށް ކުޅެމުން އަންނަ ބްރެޒިލްގެ ޑިފެންޑަރު ރެނަން ލޯޑީ ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

އުމުރުން 22 އަހަރުގެ ރެނަން ލޯޑީ ކޮވިޑް-19 އަށް ޕޮޒިޓިވްވި ނަމަވެސް، އޭނާގެ ހަށިގަނޑުން ވައިރަހުގެ އަލާމާތެއް ފެނިފައެއް ނުވެއެވެ.

އެތުލެޓިކޯ އިން ބުނީ ރެނަން ލޯޑީގެ ހާލު ރަނގަޅު ކަމަށާއި، އޭނާ ފަރިތަކުރުންތަކަށް ނުކުންނާނީ ވައިރަހަށް ނެގެޓިވްވުމުން ކަމަށެވެ. އަދި އޭނާ މިވަގުތު ހުރީ ހޯމް-އައިސޮލޭޝަނުގައި ކަމަށްވެސް ވަނީ ބުނެފައެވެ.

ރެނަން ލޯޑީ ކޮވިޑް-19 އަށް ޕޮޒިޓިވްވި ނަމަވެސް، އެ ކްލަބުގެ އެހެން ހުރިހާ ކުޅުންތެރިން ވަނީ ކޮވިޑް-19 އަށް ނެގެޓިވްވެފައެވެ. އެއާއެކު އެތުލެޓިކޯގެ ކުޅުންތެރިން އަންނަނީ އެ ކްލަބުގެ ޓްރެއިނިން ސެންޓަރުގައި އެކަނި ތަމްރީނުތައް ހަދަމުންނެވެ.

މެދުކަނޑާލި ސްޕެނިޝް ލީގު ޖޫން މަހު 20 ވަނަ ދުވަހު އަލުން ފެށަން ސްޕެނިޝް ފުޓްބޯލް ފެޑެރޭޝަނުން މަސައްކަތް ކުރަމުން އަންނައިރު، މިމަހުގެ ހަތަރުވަނަ ދުވަހުން ފެށިގެން ކުޅުންތެރިން އެކަނި ތަމްރީނުތައް ހެދުމުގެ ހުއްދަ ސްޕެއިން ސަރުކާރުން ވަނީ ދީފައެވެ.

އެހެންކަމުން ސްޕެނިޝް ލީގުގެ ގިނަ ކްލަބުތަކުން ވަނީ ކުޅުންތެރިން ކޮވިޑް-19 އަށް ޓެސްޓު ކުރުމަށް ފަހު، ކުޅުންތެރިން އެކަނި ތަމްރީނުތައް ފަށާފައެވެ. އެގޮތުން ބާސެލޯނާގެ ކުޅުންތެރިން ހުކުރު ދުވަހު ތަމްރީނުތައް ފަށާފައިވާއިރު، އަންނަ ހޯމަ ދުވަހު ރެއާލް މެޑްރިޑްގެ ކުޅުންތެރިން ތަމްރީނުތައް ފަށާނެ ކަމަށް ރިޕޯޓުތައް ބުނެއެވެ.

ސްޕެނިޝް ލީގު ފުރިހަމަ ކުރަން ސްޕެނިޝް ފުޓްބޯލް ފެޑެރޭޝަނުން މަސައްކަތް ކުރަމުން އަންނައިރު، ރިޕޯޓުތައް ބުނާ ގޮތުން ލަލީގާގެ ވިސްނުމަކީ މި މަހު 18 ވަނަ ދުވަހު ޓީމުތަކުގެ ހުރިހާ ކުޅުންތެރިން އެކުގައި ތަމްރީނުތައް ހަދަން ފެށުމެވެ.

އަދި ސީޒަން ފުރިހަމަ ކުރަން ހުރިހާ މަސައްކަތެއް ކުރާނެ ކަމުގެ ޔަގީންކަން ލަލީގާއިން ޔުއެފާއަށް ދީފައިވާ ކަމަށްވެސް ރިޕޯޓުތައް ބުނެއެވެ.