އަސަދުﷲ ބާކީކޮށް ގައުމީ ސްކޮޑަށް އެންމެ ފަހުން ދަގަނޑޭ ނަގައިފި

މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ އަސަދުﷲ އަބްދުﷲ (އަސައްކޮ) ބާކީކޮށް، ގައުމީ ސްކޮޑަށް އެންމެ ފަހުން ނިއުރޭޑިއަންޓް ސްޕޯޓްސް ކްލަބްގެ އަލީ އަޝްފާގު (ދަގަނޑޭ) ނަގައިފި އެވެ.

ބުދަ ދުވަހު އެފްއޭއެމް އިން ނެރުނު ބަޔާނެއްގައި ބުނީ އަންނަ މަހުގެ ފަސް ވަނަ ދުވަހު އޭޝިއަން ކަޕް ކޮލިފައިންގައި އޮމާންއާ ދެކޮޅަށް ކުޅޭ މެޗަށް ނެގި ސްކޮޑުގައި އަސައްކޮ ހިމެނި ނަމަވެސް އޭނާގެ މެޑިކަލް ރިވިއު ކުރުމަށްފަހު ޓީމާއެކު ފަރިތަކުރަން ފިޓްނޫން ކަމަށް މެޑިކަލް ޓީމުން ނިންމާފައިވާ ކަމަށެވެ. އަސައްކޮ އަށް އަނިޔާވީ އެންމެ ފަހުން މިލަންދޫއާ ދެކޮޅަށް މާޒިޔާ ކުޅުނު މެޗުގައެވެ.

އަންގާރަ ދުވަހު ގައުމީ ސްކޮޑު އެކުލަވާލިއިރު، ދަގަނޑޭ އެއްކޮށް ފިޓްނޫން ކަމަށް ބުނެ އޭނާ ސްކޮޑަށް ނަގާފައިނުވެއެވެ.

އެހެންނަމަވެސް ދަގަނޑޭގެ މެޑިކަލް ރިވިއު ކުރުމަށްފަހު އޭނާ ގައުމީ ޓީމާއެކު ފަރިތަކުރަން ފިޓްކަމަށް މެޑިކަލް ޓީމުން ނިންމާފައިވާ ކަމަށްވެސް އެފްއޭއެމް އިން ވަނީ ބުނެފައެވެ.

ޖުމްލަ 23 ކުޅުންތެރިންނާއެކު ގައުމީ ޓީމުގެ ސްކޮޑު އެކުލަވާލާފައިވާއިރު، ނިއުރޭޑިއަންޓްގެ ނުވަ ކުޅުންތެރިޔަކު ހިމެނެއެވެ. މާޒިޔާގެ ހަ ކުޅުންތެރިޔަކު ހިމެނޭއިރު، ޓީސީގެ ތިން ކުޅުންތެރިން، ގްރީން ސްޓްރީޓްގެ ދެ ކުޅުންތެރިން، ތިނަދޫގެ ދެ ކުޅުންތެރިން އަދި މިލަންދޫގެ ކުޅުންތެރިޔަކު ވެސް ހިމެނެއެވެ.

ގައުމީ ޓީމުގެ ސްކޮޑަށް ގިނަ ދުވަސްތަކެއް ފަހުން މިފަހަރު ވަނީ ނިއުގެ ރިލްވާން ވަހީދު (ރިލޭ) ނަގާފައެވެ. އޭނާގެ އިތުރުން ދެން ނިއުގެ ސްކޮޑަށް ނަގާފައިވަނީ ކީޕަރު މުހައްމަދު ފައިސަލް، މުހައްމަދު ރަޝީދު (ހޮކޭ)، އަހުމަދު އަބްދުﷲ (ލިލީ)، އަލީ ފާސިރު (ސެންޓޭ)، ހަމްޒާ މުހައްމަދު، އަކްރަމް އަބްދުލް ގަނީ އަބްދުﷲ ޒިޔަޒަން އަދި ދަގަނޑޭ އެވެ.

މާޒިޔާ ޓީމުން ސްކޮޑަށް ނަގާފައިވަނީ އަމްދާން އަލީ (އެންޑީ)، ސަމޫހް އަލީ، އަސްހަދު އަލީ (އަޑުބަރޭ)، މުހައްމަދު އުމެއިރު، އިސްމާއިލް އީސަ (މެސީ) އަދި މުހައްމަދު އިރުފާން (އިރޭ) އެވެ. މިފަހަރު ވެސް މާޒިޔާގެ މިޑްފިލްޑަރު މުހައްމަދު އާރިފް (ބަކާ) ގައުމީ ސްކޮޑަށް ނަގާފައެއް ނުވެއެވެ.

ގްރީންގެ ސްކޮޑަށް އަހުމަދު ޝާފިއު އާއި އަހުމަދު ރަޝީދު (އައްމަޑޭ) ނަގާފައިވާއިރު، ޓީސީ ސްޕޯޓްސް ކްލަބުން ނަގާފައިވަނީ ޒާދު އަހުމަދު، ނާއިޒް ހަސަން އަދި އިބްރާހިމް ވަހީދު ހަސަން އެވެ. ތިނަދޫ އިން ނަގާފައިވަނީ އިމްރާން ރަޝީދު އަދި އަހުމަދު ރިޒުވާން އެވެ. މިލަންދޫ އިން ނަގާފައިވަނީ ކީޕަރު މުހައްމަދު އިމްރާން އެވެ.

ގައުމީ ޓިމު އޮމާންއާ ދެކޮޅަށް ކުޅޭ މެޗު އަންނަ މަހުގެ ފަސް ވަނަ ދުވަހު އޮމާންގައި އޮންނައިރު، ތަމްރީން ހެދުމަށް ގައުމީ ޓީމު މި މަހުގެ 27 ވަނަ ދުވަހު ގަތަރަށް ފުރާނެ އެވެ.