ހަތަރު ކުޅުންތެރިން ބާކީކޮށް ގައުމީ ސްކޮޑް އިއުލާން ކޮށްފި

އޭޝިއަން ކަޕް ކޮލިފައިންގައި ބޫޓާނާއި ދެކޮޅަށް ކުޅޭ މެޗާއި، އަފްޣާނިސްތާނާ ދެކޮޅަށް ކުޅޭ އެކުވެރިކަމުގެ މެޗުގައި ކުޅޭ ދެ މެޗުގައި ވާދަކުރާ ގައުމީ ސްކޮޑް އިއުލާން ކޮށްފިއެވެ.

27 ކުޅުންތެރިންގެ ސްކޮޑަކާއެކު ފަރިތަކުރުންތަށް ފެށި ނަމަވެސް މި ދެ މެޗުގައި ވާދަކުރާ ރަސްމީ ސްކޮޑު 23 ކުޅުންތެރިންނާއި އެކު އިއުލާން ކޮށްފައި ވާއިރު، ބާކީ ކޮށްފައިވާ ކުޅުންތެރިންނަކީ ޓީސީ ސްޕޯޓްސް ކުލަބުގެ މުހަންމަދު އައްޒާމާއި، އެޓީމުގެ އިބްރާހިމް ވަހީދު ހަސަންގެ އިތުރުން، ދެ ކީޕަރުން ކަމަށްވާ މާޒިޔާގެ ހުސައިން ޝަރީފް އަދި ނިއުރޭޑިއަންޓްގެ އަބްދުﷲ ޒިމާމް އެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފައިވާގޮތުގައި، ޓީސީގެ މުހަންމަދު އައްޒާމް ސްކޮޑުން ބާކީކޮށްފައިވަނީ އޭނާއަށް ލިބިފައިވާ އަނިޔާގެ ސަބަބުންނެވެ.

23 ކުޅުންތެރިންނާއި އެކު އެކުލަވާލާފައިވާ ރަސްމީ ސްކޮޑުގައި މާޒިޔާ ސްޕޯޓްސް އެންޑް ރެކްރިއޭޝަންގެ 7 ކުޅުންތެރިން ހިމެނެއެވެ. އެއީ، އަމްދާން އަލީ (އެންޑީ) އާއި، މުހަންމަދި އިރުފާން (އިރޭ) އާއި، އަސަދުﷲ ޢަބަދުﷲ (އަސަކޯ) އާއި، އައްސަދު ޢަލީ (އަޑުބަރޭ) އާއި، މުހަންމަދު އުމައިރު އާއި، ސަމޫހު އަލީ (ސަމުއްޓޭ) އަދި ހުސައިން ނިޔާޒް މުހަންމަދު (ބޮކުރީ) އެވެ.

ސްކޮޑުގައި ހިމެނިފައިވާ ނިއުރޭޑިއަންޓްގެ ފަސް ކުޅުންތެރިންނަކީ ހަމްޒާ މުހަންމަދު (ހަމްޕު) އާއި، މުހަންމަދު ރަޝީދު (ހޮކޭ) އާއި، އަލީ ފާސިރު (ސެންޓޭ) އާއި، އަހުމަދު އަބްދުﷲ (ލިލީ) އަދި އަކުރަމް އަބްދުލްޣަނީ (އަކޫ) އެވެ.

ކްލަބް އީގަލްސްއިން އިމްރާން ނަޝީދް އާއި، އަހުމަދު ރިޒުވާން އާއި، އަހުމަދު ޒާދުގެ އިތުރުން ގޯލް ކީޕަރު މުހަންމަދު ޝަފީއު (ޗެކް) ވަނީ ސްކޮޑުގައި ހިމެނިފައެވެ.

ވެލެންސިއާއިން، ޗާފިއު މުހަންމަދު (ޝާފ) އާއި، ކީޕަރު މުހަންމަދު ފައިސަލް ހިމަނާފައި ވާއިރު، ވިކްޓްރީން ހިމެނިފައިވަނީ އިސްމައިލް އީސް (މެސީ) އަދި ކީޕަރު ކީޕަރު މުހަންމަދު އިމްރާން އެވެ. މީގެ އިތުރުން ގްރީން ސްޓްރީޓްގެ ދެ ކުޅުންތެރިއަކުވެސް ވަނީ ސްކޮޑުގައި ހިމެނިފައެވެ. އެއީ މުހަންމަދު ސާއިފް އާއި، އަހްމަދު ރަޝީދް (އައްމަޑޭ) އެވެ. ފައިނަލް ސްކޮޑުން ޖާގަ ލިބިފައިވާ ޓިސީގެ ހަމައެކަނި ކުޅުންތެރިއަކީ ހަސަން ނާއިޒް (ދާދު) އެވެ.

އަފްޣާނިސްތާނާއި ދެކޮޅަށް ކުޅޭ ރަހުމަތްތެރިކަމުގެ މެޗުގައި މިމަހުގެ 6 ވަނަ ދުވަހު ރައްޖެ ނިކުންނައިރު، އޭޝިއަން ކަޕް ކޮލިފައިންގައިންގައި ބޫޓާނާއި ދެކޮޅަށް ރާއްޖެ ނިކުންނާނީ މ މަހުގެ 13 ވަނަ ދުވަހުއެވެ.