އަނިޔާގެ ސަބަބުން ޓޮޓެންހަމް ހޮޓްސްޕަރސްގެ މިޑްފީލްޑަރ ޑެލޭ އަލީ އިނގިރޭސި ސްކޮޑުން ބާކީކޮށްފި އެވެ.

މި ނޮވެމްބަރު މަހު އިނގިރޭސި ޤައުމީ ފުޓްބޯޅަ ޓީމް ޖަރުމަނުވިލާތާއި ބްރެޒިލް އާއި ދެކޮޅަށް ކުޅޭ ރަހުމަތްތެރިކަމުގެ ދެ މެޗަށް ނެގި އިނގިރޭސި ސްކޮޑުން އަލީ ބާކީ ކުރީ ފަލަމަސްގަނޑަށް ލިބިފައިވާ އަނިޔާ އާއިގުޅިގެންނެވެ.

އިނގިރޭސި ސްކޮޑުން އަލީ ބާކީ ކުރި ނަމަވެސް، އޭނާގެ ބަދަލުގައި ސްކޮޑަށް ނެގި ކުޅުންތެރިޔަކު ހާމަކޮށްފައެއްނުވެއެވެ.

އިނގިރޭސިވިލާތް ކުޅޭ ރަހުމަތްތެރިކަމުގެ ފުރަތަމަ މެޗުގައި ނޮވެމްބަރު މަހުގެ 10 ވަނަ ދުވަހު، ވެމްބްލީ ސްޓޭޑިއަމްގައި ނުކުންނާނީ ޖަރުމަނުވިލާތާއި ދެކޮޅަށެވެ. ރަހުމަތްތެރިކަމުގެ ދެވަނަ މެޗުގައި މިމަހުގެ 14 ވަނަ ދުވަހު ނުކުންނާނީ ބްރެޒިލް އާއިދެކޮޅަށެވެ.

އަލީގެ އަނިޔާ އާއިގުޅޭ ގޮތުން ޓޮޓެންހަމްގެ ކޯޗު މައުރީސިއޯ ޕޮޗެއްޓީނޯ މީގެ ކުރިން ވަނީ، 21 އަހަރުގެ މިޑްފީލްޑަރުގެ އަނިޔާ ސީރިއަސް ނޫން ކަމަށް ބުނެފަ އެވެ. އެހެން ނަމަވެސް، އަނިޔާގެ ސަބަބުން އިނގިރޭސި ޕްރިމިއަރ ލީގުގައި އާދީއްތަ ދުވަހު ކްރިސްޓަލް ޕެލަސް އާދެކޮޅަށް ކުޅޭ މެޗު އޭނާ އަށް ގެއްލޭނެކަން މިހާރު ވަނީ ކަށަވަރު ވެފައެވެ.

އަނިޔާގެ ސަބަބުން އަލީ ދެ ހަފްތާ އަށް ކުޅުމާއި ދުރަށް ދާން ޖެހިފައިވާ ކަމަށް ބައެއް މީޑިއާތަކުން ރިޕޯޓް ކޮށްފައިވެއެވެ.

މިމެޗަށް ފަހު އިންޓަރނޭޝަނަލް ބްރޭކަށް ލީގުގެ ކުޅުން މެދުކަނޑާލާއިރު، ބްރޭކަށް ފަހު ޓޮޓެންހަމް ކުޅެންޖެހޭ ފުރަތަމަ މެޗުގައި ނޮވެމްބަރު މަހުގެ 18 ވަނަ ދުވަހު ނުކުންނާނީ އާސެނަލް އާއިދެކޮޅަށެވެ.

މިސީޒަނުގައި ރަނގަޅު ކުޅުމެއް ދައްކަމުން އަންނަ އަލީ ވަނީ، ޓޮޓެންހަމް އަށް ކުޅެދިން 16 މެޗުގައި 7 ލަނޑު ޖަހާފައެވެ. އޭގެ ތެރޭގައި އެންމެ ފަހުން ކުޅުނު 4 މެޗުގައި ޖެހި 4 ލަނޑު ހިމެނެއެވެ.

އަލީ ވަނީ ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ އަމިއްލަ ދަނޑުގައި އެންމެ ފަހުގެ ޗެމްޕިއަން ރެއާލް މެޑްރިޑް އަތުން ތިން ލަނޑު އެއް ލަނޑުން ޓޮޓެންހަމް މޮޅުވި މެޗުގައި މޮޅު ކުޅުމެއް ދައްކާ ދެލަނޑު ޖަހައިދީފައެވެ.

އިނގިރޭސި ޤައުމީ ޓީމަށް 2015 ވަނަ އަހަރު ކުޅެން ފެށި އަލީ ވަނީ، ޤައުމީ ޓީމަށް 22 މެޗު ކުޅެ، ދެ ލަނޑު ޖަހައިދީފައެވެ.