މި އަންނަ ހަފްތާގައި ކުޅުމަށް ހަމަޖެހިފައިވާ ރަހުމަތްތެރިކަމުގެ މެޗުތަކަށް ޕޯޗުގަލްއިން ނެގި ސްކޮޑުން ރެއާލްގެ ތަރި ކްރިސްޓިއާނޯ ރޮނާލްޑޯ ބާކީކޮށްފިއެވެ.
މި އަންނަ ހަފްތާގައި ސައުދީ އަރަބިއްޔާއާއި އެމެރިކާއާ ދެކޮޅަށް ޕޯޗުގަލްގެ ގައުމީ ޓީމުން ކުޅޭ ރަހުމަތްތެރިކަމުގެ މެޗުތަކަށް އެ ގައުމުން ނެގި ސްކޮޑުން ރޮނާލްޑޯ ބާކީކޮށްފައިވަނީ އޭނާއަށް އަރާމު ކުރަން ފުރުސަތު ދިނުމުގެ ގޮތުންނެވެ. ރޮނާލްޑޯ ޕޯޗުގަލްގެ ސްކޮޑުން ބާކީކޮށްފައިވާއިރު އޭނާއަށް މި ސީޒަނުގައި ރެއާލްގައި މާ އެދެވޭ ކުޅުމެއް ދެއްކިފައެއް ނުވެއެވެ. އެގޮތުން ސްޕެނިޝް ލަލީގާގައި އޭނާއަށް މިހާތަނަށް ޖެހިފައިވަނީ އެންމެ ލަނޑެކެވެ.
ރޮނާލްޑޯ ޕޯޗުގަލްގެ ސްކޮޑުން ބާކީކުރިއިރު އޭނާއާއެކު ރިކާޑޯ ކުރެސްމާގެ އިތުރުން ލުއިސް ނާނީއަށް ވެސް ފުރުސަތު ދީފައެއް ނުވެއެވެ. ޕޯޗުގަލްގެ ގައުމީ ޓީމުގެ ކޯޗު ފެނާންޑޯ ސަންޓޯސް ބުނެފައިވަނީ މިފަހަރުގެ ސްކޮޑުން ކުޅުންތެރިންނަށް ޖާގަ ދީފައިވަނީ އަޖުމަ ބަލާލުމުގެ ގޮތުން ކަމަށާއި މިފަދަ މެޗުތަކަކީ އެހެން ބައްރުތަކުގެ ފުޓްބޯޅަ ތަޖުރިބާ ކުރުމަށް ލިބޭ ވަރަށް ބޮޑު ފުރުސަތެއް ކަމަށެވެ. އަދި ސްކޮޑުން ކޮންމެ ކުޅުންތެރިޔަކަށް ވެސް ޖާގަ ހޯދޭނެ ކަމަށް ވެސް އޭނާ ބުނެފައިވެއެވެ.
އާޖެންޓީނާގެ ގައުމީ ޓީމު އަންނަ ހަފްތާގައި ރަޝިއާ އާއި ނައިޖީރިއާ ދެކޮޅަށް ކުޅޭ މެޗުތަކަށް އެ ޓީމުން ނެގި ސްކޮޑުން މިފަހަރުވެސް ޔުވެންޓަސްގެ ފޯވާޑް ގޮންޒާލޯ ހިގުއައިންއަށް ޖާގަ ދީފައެއް ނުވެއެވެ. އަންނަ އަހަރު ރަޝިއާގައި އޮންނަ ވޯލްޑް ކަޕަށް ތައްޔާރުވުންތަށް ފެށުމުގެ ގޮތުން އާޖެންޓީނާއިން ކުޅޭ ފަރިތަކުރުންތަކުގެ މެޗުން އޭނާއަށް ޖާގަ ދީފައި ނުވާއިރު ރޯމާގެ ފޯވާޑް ޑިއެގޯ ޕެރޯޓީއަށް ވަނީ ފުރުސަތު ދީފައެވެ.
އާޖެންޓީނާގެ ކޯޗުކަމާ ސަމްޕައޯލީ ހަވާލުވި ފަހުން ހިގުއައިންއަށް އެ ޓީމުގެ ސްކޮޑުން ފުރުސަތު ލިބިފައިވަނީ އެންމެ ފަހަރަކުއެވެ. އެހެނަސް އޭނާ އަންނަނީ ޔުވެންޓަސްގައި ރަނގަޅު ކުޅުމެއް ދައްކަމުންނެވެ. އެގޮތުން އޭނާ ވަނީ އެންމެ ފަހުން ވެސް އެ ޓީމަށް ކުޅުނު ތިން މެޗުގައި ހަތަރު ލަނޑު ޖަހައިދީފައެވެ.
މި އަންނަ ހަފްތާއަކީ އިންޓަނޭޝަނަލް ބްރޭކް ލިބޭ ހަފްތާއަކަށްވާއިރު މި ހަފްތާގައި ގިނަ އަދަދެއްގެ ރަހުމަތްތެރި ކަމުގެ މެޗުތަށް ކުޅުމަށް ވަނީ ނިންމާފައެވެ.
